US Green Card Rules | అమెరికా గ్రీన్ కార్డ్ నిబంధనలపై యూ-టర్న్: భారతీయ టెకీలు, H-1B వీసాదారులకు భారీ ఊరట

• గ్రీన్ కార్డ్ కోసం దరఖాస్తు చేసుకున్నవారు అమెరికాలోనే ఉండి ప్రాసెస్ పూర్తి చేసుకోవచ్చని DHS స్పష్టం చేసింది.
• గతంలో స్వదేశానికి వెళ్లి దరఖాస్తు చేసుకోవాలన్న ప్రతిపాదనపై వెనక్కి తగ్గింది.
• దీనివల్ల H-1B, F-1 వీసాలపై అమెరికాలో ఉంటున్న వేలాది మంది భారతీయులకు భారీ ఊరట లభించింది.
• H-1B వీసాలకు 'డ్యూయల్ ఇంటెంట్' ఉన్నందున తాజా నిబంధనల వల్ల వారికి ఎలాంటి ముప్పు లేదని నిపుణులు తెలిపారు.

US Green Card Rules | త్రినేత్ర.న్యూస్ : అమెరికాలో స్థిరపడాలని కలలు కంటున్న విదేశీయులకు, ముఖ్యంగా వేలాది మంది భారతీయ ఐటీ నిపుణులకు అమెరికా డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) భారీ ఊరటనిచ్చింది. గ్రీన్ కార్డ్ (Green Card) దరఖాస్తుదారులు తమ అప్లికేషన్ రివ్యూలో ఉన్న సమయంలో స్వదేశానికి వెళ్లాల్సిన అవసరం లేదని, అమెరికాలోనే ఉంటూ ప్రక్రియను పూర్తి చేసుకోవచ్చని స్పష్టం చేసింది.

కొద్ది రోజుల క్రితం అమెరికా పౌరసత్వ, వలసల సేవల సంస్థ (USCIS) చేసిన ఓ ప్రకటన వలసదారుల్లో తీవ్ర ఆందోళన రేకెత్తించింది. గ్రీన్ కార్డ్ కోసం అప్లై చేసేవారు ప్రాసెసింగ్ సమయంలో తప్పనిసరిగా తమ సొంత దేశాలకు తిరిగి వెళ్లాలని, కేవలం 'అసాధారణ' పరిస్థితుల్లో మాత్రమే అమెరికాలో ఉండేందుకు అనుమతిస్తామని ఆ ప్రకటన సారాంశం. దీంతో ఇమ్మిగ్రెంట్లు, ఐటీ కంపెనీలు, అటార్నీలలో ఒక్కసారిగా కలకలం రేగింది.

కానీ, ఈ వ్యతిరేకత నేపథ్యంలో DHS వెనక్కి తగ్గింది. న్యూయార్క్ టైమ్స్ నివేదిక ప్రకారం.. ప్రస్తుత ఇమ్మిగ్రేషన్ పాలసీలో ఎలాంటి భారీ మార్పులు చేయలేదని డిపార్ట్‌మెంట్ వెల్లడించింది. దరఖాస్తుదారులు అమెరికా బయటి నుండి గ్రీన్ కార్డ్ ప్రాసెస్ పూర్తి చేయాలా వద్దా అనేది ఇమ్మిగ్రేషన్ ఆఫీసర్లు ఎప్పటిలాగే వారి వ్యక్తిగత కేసులను బట్టి నిర్ణయిస్తారని స్పష్టం చేసింది.

'అడ్జస్ట్‌మెంట్ ఆఫ్ స్టేటస్' యథాతథం

ప్రస్తుతం ఉన్న విధానం ప్రకారం.. అర్హులైన వలసదారులు 'అడ్జస్ట్‌మెంట్ ఆఫ్ స్టేటస్' (Adjustment of Status) ద్వారా పర్మినెంట్ రెసిడెన్సీకి దరఖాస్తు చేసుకోవచ్చు. అంటే దరఖాస్తు పెండింగ్‌లో ఉన్నంత కాలం వారు అమెరికాలోనే చట్టబద్ధంగా నివసించవచ్చు. సాధారణంగా వీరిని ఏదైనా కంపెనీ (Employer) లేదా దగ్గరి బంధువులు స్పాన్సర్ చేస్తుంటారు. తాజా ప్రకటనతో ఈ వెసులుబాటు యథాతథంగా కొనసాగనుంది. 2024లో జారీ చేసిన 1.4 మిలియన్ల గ్రీన్ కార్డుల్లో ఎక్కువ శాతం అమెరికాలో ఉంటూ ఈ పద్ధతి ద్వారా పొందినవే కావడం గమనార్హం.

ట్రంప్ ప్రభుత్వ కఠిన వలస నిబంధనల్లో భాగంగా.. అమెరికాలో తాత్కాలికంగా ఉంటూ గ్రీన్ కార్డ్ కోరుకునే వారు ఇకపై సొంత దేశానికి వెళ్లి అప్లై చేయాల్సి ఉంటుందని USCIS ప్రతినిధి జాక్ కహ్లర్ గత వారం వ్యాఖ్యానించారు. చట్టంలోని లొసుగులను అరికట్టడానికే ఈ నిర్ణయమని అప్పట్లో ఆయన సమర్థించుకున్నారు. కానీ దేశ ఆర్థిక వ్యవస్థకు లాభం చేకూర్చే వారికి, జాతీయ ప్రయోజనాలు ఉన్నవారికి మినహాయింపులు ఉంటాయని తాజాగా ఆయన వివరణ ఇచ్చారు.

H-1B, F-1 వీసాదారులకు సేఫ్

మే 21న వచ్చిన మెమోరాండం.. ముఖ్యంగా F-1 స్టూడెంట్ వీసా, టూరిస్ట్ వీసాలపై ఉన్నవారిని తీవ్రంగా భయపెట్టింది. అప్లికేషన్ పెండింగ్‌లో ఉన్నా తాము దేశం విడిచి వెళ్లాల్సి వస్తుందేమోనని ఆందోళన చెందారు. ఇక H-1B వీసాదారుల్లోనూ గందరగోళం నెలకొంది. అమెరికా జారీ చేసే H-1B వీసాల్లో దాదాపు 70 శాతం భారతీయులకే దక్కుతాయి కాబట్టి ఈ రూల్స్ ఎఫెక్ట్ మన వాళ్ల పైనే ఎక్కువగా ఉంటుంది.

అయితే, వీరికి ఎలాంటి ముప్పు లేదని ఇమ్మిగ్రేషన్ నిపుణులు స్పష్టం చేస్తున్నారు. H-1B ప్రోగ్రామ్ అనేది "డ్యూయల్ ఇంటెంట్" (Dual Intent) సూత్రంపై పనిచేస్తుంది. అంటే వీరు అమెరికాలో తాత్కాలికంగా పని చేసుకుంటూనే, అదే సమయంలో శాశ్వత నివాసం (Green Card) కోసం ప్రయత్నించవచ్చు. చట్టబద్ధంగా ఉన్న ఈ వెసులుబాటు కారణంగా, తాజా వలస నిబంధనల మార్పులు H-1B వీసాదారులపై పెద్దగా ప్రభావం చూపవని నిపుణులు భరోసా ఇస్తున్నారు.