Supreme Court | డొనాల్డ్‌ ట్రంప్‌కు షాక్‌.. సుంకాలు చట్ట విరుద్ధమన్న అమెరికా సుప్రీంకోర్టు..!

Supreme Court | అమెరికా అధ్యక్షుడు డొనాల్డ్‌ ట్రంప్‌కు భారీ షాక్‌ తగిలింది. గతంలో పలు దేశాలపై ఎడాపెడా విధించిన టారిఫ్‌లు చట్టవిరుద్ధమంటూ అమెరికా సుప్రీంకోర్టు శుక్రవారం కీలక తీర్పును వెలువరించింది. ప్రపంచదేశాలపై విస్తృత స్థాయిలో ట్రంప్‌ టారిఫ్లు విధించడం ఫెడరల్‌ చట్టానికి విరుద్ధమని కోర్టు స్పష్టం చేసింది. కోర్టు తీర్పు వైట్‌ హౌస్‌కు భారీ ఎదురుదెబ్బగా భావిస్తున్నారు. గతేడాది గత ఏడాది వలసలు, స్వతంత్ర సంస్థల అధిపతుల తొలగింపు, ప్రభుత్వ ఖర్చుల్లో కోతలు తదితర అంశాల్లో కోర్టు అధ్యక్షుడి పక్షాన తీర్పులు ఇచ్చిన విషయం తెలిసిందే.

తాజాగా ఆయనకు వ్యతిరేకంగా కోర్టు తీర్పును ఇచ్చింది. ఈ కేసులో ప్రధాన న్యాయమూర్తి జాన్‌ మెజారిటీ అభిప్రాయాన్ని వెల్లడించారు. 6-3 మెజారిటీతో కోర్టు సుంకాల విధానం చట్టం నిర్దేశించిన పరిమితులను మించిందని తేల్చింది. అధ్యక్షుడు పరిమితి లేకుండా, ఎంతకాలమైనా, ఎంత మొత్తానికైనా సుంకాలు విధించే అధికారం ఉందని వాదించారు. అయితే, అలాంటి అధికారం వినియోగించాలంటే కాంగ్రెస్ నుంచి స్పష్టమైన అనుమతి ఉండాలని రాజ్యాంగం సూచిస్తోంది. ట్రంప్ ఆధారంగా చూపిన అత్యవసర అధికారాలు ఈ సందర్భంలో సరిపోవని కోర్టు స్పష్టం చేసింది. ఈ తీర్పుతో ట్రంప్‌ వాణిజ్య విధానాలపై ప్రభావం పడే అవకాశముందని విశ్లేషకులు భావిస్తున్నారు.