Iran‑Israel War | ఇరాన్-ఇజ్రాయెల్ యుద్ధం: 1000 దాటిన మృతుల సంఖ్య

• తీవ్రమవుతున్న గల్ఫ్ సంక్షోభం
• భారతీయుల భద్రత కోసం హెల్ప్‌లైన్లు ఇవే

Iran‑Israel War | త్రినేత్ర.న్యూస్ : పశ్చిమాసియాలో భీకర యుద్ధం కొనసాగుతోంది. అమెరికా, ఇజ్రాయెల్ సంయుక్తంగా ఇరాన్‌పై చేస్తున్న వైమానిక దాడుల్లో భారీ ప్రాణనష్టం సంభవిస్తోంది. దాడులు ప్రారంభమైన నాటి నుంచి ఇప్పటివరకు ఇరాన్‌లో మరణించిన వారి సంఖ్య 1045కి చేరుకున్నట్లు నివేదికలు చెబుతున్నాయి. తమ సుప్రీం లీడర్ అయతుల్లా అలీ ఖమేనీ అమెరికా-ఇజ్రాయెల్ దాడుల్లో మరణించడంతో రగిలిపోతున్న ఇరాన్, గల్ఫ్ దేశాల వ్యాప్తంగా ఉన్న అమెరికా, ఇజ్రాయెల్ లక్ష్యాలపై క్షిపణులు, డ్రోన్లతో ప్రతీకార దాడులకు దిగుతోంది.

దద్దరిల్లుతున్న గల్ఫ్ దేశాలు

ఇరాన్ ప్రతిదాడులతో గల్ఫ్ ప్రాంతం ఉద్రిక్తంగా మారింది. ఇరాన్ దాడుల కారణంగా గల్ఫ్ దేశాల్లో ఇప్పటివరకు ఏడుగురు పౌరులు సహా 13 మంది మరణించారు. గత శనివారం నుంచి ఆరుగురు అమెరికన్ సైనికులు మరణించగా, వారిలో నలుగురు కువైట్‌లో చనిపోయినట్లు పెంటగాన్ ప్రకటించింది. కువైట్‌లో ఇరాన్ ప్రయోగించిన డ్రోన్ శకలాలు పడి 11 ఏళ్ల బాలిక ప్రాణాలు కోల్పోవడం విషాదకరం.

ఖతార్‌పై దాడి

ఖతార్‌లోని అల్-ఉదీద్‌లో ఉన్న అమెరికా సైనిక స్థావరంపై ఇరాన్ బాలిస్టిక్ క్షిపణితో దాడి చేసినట్లు ఖతార్ రక్షణ మంత్రిత్వ శాఖ ధృవీకరించింది. ఒక క్షిపణిని అడ్డుకోగా, మరొకటి స్థావరాన్ని తాకిందని, అయితే ఎలాంటి ప్రాణనష్టం జరగలేదని అధికారులు తెలిపారు.

యూఏఈ, ఖతార్‌లలో డ్రోన్ల కలకలం

ఇరాన్ ఏకధాటిగా ప్రయోగిస్తున్న డ్రోన్లు, క్షిపణులను అడ్డుకుంటున్నట్లు యూఏఈ, ఖతార్ ప్రకటించాయి. యూఏఈ మూడు బాలిస్టిక్ క్షిపణులు, 121 డ్రోన్లను అడ్డుకోగా, ఖతార్ 10 డ్రోన్లు, రెండు క్రూయిజ్ క్షిపణులను కూల్చివేసింది.

నాటో వార్నింగ్

ఈ యుద్ధం అంతర్జాతీయ సంబంధాలపై తీవ్ర ప్రభావం చూపుతోంది. టర్కీ గగనతలంలోకి దూసుకొచ్చిన ఇరాన్ క్షిపణిని నాటో రక్షణ వ్యవస్థలు కూల్చివేశాయి. నాటో, టర్కీ ఇరాన్‌ను తీవ్రంగా హెచ్చరించాయి.

స్పెయిన్‌పై ట్రంప్ బెదిరింపులు

ఇరాన్‌పై దాడుల కోసం తమ దేశంలోని స్థావరాలను ఉపయోగించుకునేందుకు స్పెయిన్ ప్రధాని పెడ్రో సాంచెజ్ నిరాకరించారు. దీనిపై ఆగ్రహించిన అమెరికా అధ్యక్షుడు డొనాల్డ్ ట్రంప్, స్పెయిన్‌తో వాణిజ్య సంబంధాలు తెంచుకుంటామని బెదిరించారు. ఈనేపథ్యంలో స్పెయిన్‌కు యూరోపియన్ యూనియన్ మద్దతుగా నిలిచింది.

బ్రిటన్ మద్దతు: అమెరికా యుద్ధ విమానాలు బ్రిటన్ స్థావరాల నుంచి ఆపరేట్ చేస్తున్నాయని, ఇది తమ దేశాల మధ్య ఉన్న 'ప్రత్యేక బంధానికి' నిదర్శనమని బ్రిటన్ ప్రధాని కీర్ స్టార్మర్ తెలిపారు.

భారతీయుల భద్రత కోసం హెల్ప్‌లైన్ నంబర్లు

గల్ఫ్‌లో యుద్ధ వాతావరణం నెలకొన్న నేపథ్యంలో, ఆయా దేశాల్లో ఉన్న భారతీయుల కోసం భారత రాయబార కార్యాలయాలు ఎమర్జెన్సీ హెల్ప్‌లైన్ నంబర్లను విడుదల చేశాయి. అత్యవసర పరిస్థితుల్లో సహాయం కోసం ఈ క్రింది నంబర్లను సంప్రదించవచ్చు.

ఇరాన్ : +98 9128109115 / +98 9128109102 / +98 9128109109 / +98 9932179359

ఇజ్రాయెల్ : +972 54 7520711 / +972 54 2428378

యూఏఈ : +971 543090571 (WhatsApp) / 800 46342 (Toll free)

సౌదీ అరేబియా (రియాద్): +966 11 4884697 / 800 247 1234 (Toll free)

సౌదీ అరేబియా (జెద్దా): +966 126648660 / +966 12 2614093

ఖతార్ : +974 55647502

కువైట్ : +965 65501946

ఒమన్ : +968 98282270 (WhatsApp) / 80071234 (Toll free)

బహ్రెయిన్ : +973 39418071

ఇరాక్ : +964 771 651 1185 / +964 770444 4899

లెబనాన్ : +961 76860128

జోర్డాన్ : +962 770 422 276

రామల్లా, పాలస్తీనా: +970 592916418

పరిస్థితులు వేగంగా మారుతున్న నేపథ్యంలో, ఆయా దేశాల్లోని భారతీయులు స్థానిక అధికారుల సూచనలు పాటించాలని, ఎప్పటికప్పుడు భారత ఎంబసీలతో టచ్‌లో ఉండాలని కోరుతున్నారు.