China | ఆ వాస‌న భ‌రించ‌లేక‌పోతున్నాం.. జిమ్‌లో ఓ వ్య‌క్తికి చేదు అనుభ‌వం..!

China | త్రినేత్ర‌.న్యూస్ : బాడీ ఫిట్‌నెస్( Body Fitness ) కోసం చాలా మంది జిమ్‌( Gym )కు వెళ్తుంటారు. క‌నీసం రెండు గంట‌ల పాటైనా జిమ్‌లోనే స‌మ‌యాన్ని వెచ్చిస్తుంటారు. అలా జిమ్‌కు వెళ్లే ఓ వ్య‌క్తికి చేదు అనుభ‌వం ఎదురైంది. మీ నుంచి వ‌చ్చే దుర్వాస‌న‌ను భ‌రించ‌లేక‌పోతున్నాం.. జిమ్ నుంచి వెళ్లిపోవాల‌ని సిబ్బంది చెప్ప‌డంతో బాధిత వ్య‌క్తి షాక్‌కు గుర‌య్యాడు.

చైనాలోని హ్యాంగ్‌జుహు ప్రాంతానికి చెందిన షీ అనే వ్య‌క్తి తన బాడీ ఫిట్‌నెస్ కోసం.. స్థానికంగా ఉన్న జిమ్‌లో చేరాడు. మూడేండ్ల కాలానికి అంటే 2025 మే నెల‌లో దాదాపు రూ. 89,587 చెల్లించాడు. ఈ స‌భ్య‌త్వం కాల‌ప‌రిమితి 2028 ఏప్రిల్ వ‌ర‌కు ఉంది. ఇక రెగ్యుల‌ర్‌గా షీ జిమ్‌కు వ‌చ్చి వ‌ర్కవుట్ చేస్తున్నాడు. సీన్ క‌ట్ చేస్తే..

ఊహించ‌ని షాక్

ఈ ఏడాది జూన్ నెల‌లో షీకి ఊహించ‌ని ప‌రిణామం ఎదురైంది. మీ నుంచి విప‌రీత‌మైన దుర్వాస‌న వ‌స్తుంది.. ఇక నుంచి మీరు జిమ్‌కు రావాల్సిన అవ‌స‌రం లేదు. మిగిలిన కాల‌ప‌రిమితికి సంబంధించిన న‌గ‌దును మ‌ళ్లీ చెల్లిస్తున్నామ‌ని జిమ్ సిబ్బంది అత‌నికి తెలిపారు. చేసేదేమీ లేక షీ అక్క‌డ్నుంచి శాశ్వ‌తంగా వెళ్లిపోయారు.

ఆ ఒత్తిడి భరించ‌లేక‌నే..

అయితే షీ పట్ల ఇలాంటి నిర్ణ‌యం తీసుకోవ‌డానికి జిమ్‌కు వ‌చ్చే మిగ‌తా వారి ఒత్తిడి వ‌ల్లే అని తేలింది. ఎందుకంటే.. షీ నుంచి విప‌రీత‌మైన దుర్వాస‌న వ‌స్తుంద‌ని, ఆ స‌మ‌యంలో మేం వ‌ర్క‌వుట్ చేయ‌లేక‌పోతున్నామ‌ని జిమ్ సిబ్బందికి మిగ‌తా వారు తెలిపారు. ఆ వాస‌న మ‌మ్మ‌ల్ని అసౌక‌ర్యానికి గురి చేస్తుంద‌ని వాపోయారు.