China Electric Passenger Plane | ఫ్యూయల్ లేకుండా ఎగిరే 19 సీట్ల ఎలక్ట్రిక్ విమానం సక్సెస్.. ఒక్క ఛార్జ్‌తో 400 కి.మీ. ప్రయాణం!

జెట్ ఇంధనంతో పనిలేకుండా కేవలం బ్యాటరీతో నడిచే 19 సీట్ల ఎలక్ట్రిక్ విమానాన్ని చైనా విజయవంతంగా పరీక్షించింది. ఒక్కసారి ఛార్జ్ చేస్తే ఎన్ని కిలోమీటర్లు వెళ్తుందో తెలుసా?

Jagadeesh

International | Published On Nov 15, 2026, 7.29 pm IST

China Electric Passenger Plane | ఫ్యూయల్ లేకుండా ఎగిరే 19 సీట్ల ఎలక్ట్రిక్ విమానం సక్సెస్.. ఒక్క ఛార్జ్‌తో 400 కి.మీ. ప్రయాణం!

సంక్షిప్త సారాంశం

జెట్ ఇంధనానికి బదులుగా పూర్తిగా బ్యాటరీతో నడిచే ప్రపంచపు మొట్టమొదటి 19 సీట్ల ఎలక్ట్రిక్ ప్యాసింజర్ విమానం 'CE-25A' ను చైనా విజయవంతంగా పరీక్షించింది. నవంబర్ 14న షాన్‌డాంగ్ ప్రావిన్స్‌లోని బిన్‌జౌలో ఇద్దరు పైలట్లు, ఒక ఫ్లైట్-టెస్ట్ ఇంజనీర్‌తో కలిసి ఈ విమానం తొలిసారిగా 16 నిమిషాల 38 సెకన్ల పాటు గాల్లో విహరించింది. ప్రభుత్వ రంగ సంస్థ కోమాక్ (COMAC), బ్యాటరీ దిగ్గజం క్యాట్ల్ (CATL) సంయుక్తంగా అభివృద్ధి చేసిన ఈ విమానం ఒక్కసారి ఛార్జ్ చేస్తే 400 కిలోమీటర్ల వరకు ప్రయాణించగలదు. వాణిజ్య కార్యకలాపాలకు కీలకమైన 'టైప్ సర్టిఫికెట్' దరఖాస్తును చైనా పౌర విమానయాన సంస్థ (CAAC) ఇప్పటికే ఆమోదించింది.

విమానయాన రంగంలో చైనా మరో అద్భుతం

China Electric Passenger Plane | త్రినేత్ర న్యూస్ : ఇప్పటివరకు రోడ్లపై ఎలక్ట్రిక్ కార్లు, బస్సులు పరుగులు తీయడం చూశాం.. కానీ ఇప్పుడు ఆకాశంలోనూ ఎలక్ట్రిక్ విమానాలు ఎగిరే రోజు వచ్చేసింది! ప్రపంచంలోనే మొట్టమొదటి 19 సీట్ల ఎలక్ట్రిక్ ప్యాసింజర్ విమానం 'CE-25A' తొలి పైలట్ సహిత ప్రయాణాన్ని (Maiden Piloted Flight) చైనా విజయవంతంగా పూర్తి చేసింది. నవంబర్ 14న షాన్‌డాంగ్ ప్రావిన్స్‌లోని బిన్‌జౌ నగరంలో జరిగిన ఈ ప్రయోగం విజయవంతం కావడంతో.. వాణిజ్య విమానయాన రంగంలో పెను మార్పులకు బీజం పడినట్లయింది.

తొలి ప్రయాణంలో 60.4 కిలోమీటర్ల విహారం

చైనా ప్రభుత్వ రంగ విమాన తయారీ సంస్థ కోమాక్ (COMAC) ఈ విమానాన్ని రూపొందించింది. చైనా అధికారిక మీడియా సీసీటీవీ (CCTV) కథనం ప్రకారం.. ఈ పరీక్షలో ఇద్దరు పైలట్లు, ఒక ఫ్లైట్-టెస్ట్ ఇంజనీర్ విమానంలో ప్రయాణించారు.

మొత్తం పరీక్ష 57 నిమిషాల 46 సెకన్ల పాటు సాగగా.. విమానం 16 నిమిషాల 38 సెకన్ల పాటు గాల్లో ఎగురుతూ 60.4 కిలోమీటర్ల దూరాన్ని పూర్తి చేసింది.

ప్రయాణ సమయంలో విమానంలోని అన్ని వ్యవస్థలు సాధారణంగా పనిచేశాయని, అంచనాలకు తగ్గట్టే పనితీరు కనబరిచిందని ఇంజనీర్లు వెల్లడించారు.

అంతకుముందు, 2026 ఫిబ్రవరి 2న పైలట్లు లేకుండానే (Autonomous) తొలి ప్రయోగాన్ని నిర్వహించగా, ఆ తర్వాత 19 మానవరహిత పరీక్షలను విజయవంతంగా పూర్తి చేసిన తర్వాతే మనుషులతో పరీక్షించేందుకు అనుమతి లభించింది.

జెట్ ఫ్యూయల్ అవసరం లేదు.. రెక్కల నిండా ఎలక్ట్రిక్ ఫ్యాన్లు

సాధారణ విమానాలు జెట్ ఇంధనం లేదా టర్బోప్రాప్ ఇంజన్లపై ఆధారపడి నడుస్తాయి. కానీ, CE-25A విమానంలో అత్యాధునిక 'డిస్ట్రిబ్యూటెడ్ ఎలక్ట్రిక్ డక్టెడ్-ఫ్యాన్ ప్రొపల్షన్ సిస్టమ్' ఉపయోగించారు. అంటే, విమానం రెక్కల పొడవునా అమర్చిన అనేక ఎలక్ట్రిక్ ఫ్యాన్లు తిరగడం ద్వారా విమానం ముందుకు దూసుకెళ్తుంది. ఈ ఫ్యాన్లకు అవసరమైన శక్తి విమానంలోని బ్యాటరీ వ్యవస్థ నుంచి అందుతుంది.

CE-25A విమానం ముఖ్య ప్రత్యేకతలు ఇవే

ప్రయాణికుల సామర్థ్యం: 19 మంది ప్రయాణికులు (నగరాల మధ్య స్వల్ప దూర ప్రయాణాలకు అనుకూలం)

బరువు: గరిష్ట టేకాఫ్ బరువు 10 టన్నులు (సుమారు 22,000 పౌండ్లు)

వేగం, ఎత్తు: గంటకు 300 కిలోమీటర్ల వేగంతో, 2,400 మీటర్ల ఎత్తులో ప్రయాణించగలదు.

రేంజ్: ఒక్కసారి పూర్తిగా ఛార్జ్ చేస్తే 400 కిలోమీటర్ల వరకు ప్రయాణించేలా దీనిని డిజైన్ చేశారు.

వాణిజ్య సేవలకు అడుగు దూరంలో..

ప్రపంచ ప్రఖ్యాత బ్యాటరీ తయారీ సంస్థ క్యాట్ల్ (CATL), షాంఘై జియావో టోంగ్ విశ్వవిద్యాలయం సహకారంతో కోమాక్ ఈ ప్రాజెక్టును చేపట్టింది. కేవలం ప్రయోగాత్మక చిన్న విమానాలకే పరిమితం కాకుండా, సాధారణ ప్రయాణికులను తీసుకెళ్లే స్థాయికి ఎలక్ట్రిక్ విమానయానాన్ని తీసుకెళ్లడమే దీని ప్రధాన ఉద్దేశం. ఈ విమానాన్ని వాణిజ్యపరంగా ప్రజలకు అందుబాటులోకి తెచ్చేందుకు అవసరమైన 'టైప్ సర్టిఫికెట్' దరఖాస్తును చైనా పౌర విమానయాన సంస్థ (CAAC) ఇప్పటికే అధికారికంగా స్వీకరించింది.

Chinese state-owned aircraft manufacturer COMAC completed the first crewed flight of its CE-25A electric aircraft in Binzhou, state broadcaster CCTV reported https://t.co/Bh49hvp8Tm

— Reuters (@Reuters) November 14, 2026