Needala Prapancham book launch | సమాజ డొల్లతనాన్ని ఎండగట్టిన ‘నీడల ప్రపంచం’: రవీంద్రభారతిలో తిర్మల్ పుస్తకావిష్కరణ

• సామాజిక వాస్తవాలను చిత్రిక పెట్టిన తిర్మల్ నీడల ప్రపంచం

Needala Prapancham book launch | త్రినేత్ర న్యూస్ : సమాజంలో పేరుకుపోయిన డొల్లతనాన్ని ప్రశ్నిస్తూ, వాస్తవాలపై కమ్ముకున్న చీకటి నీడలను తన అక్షర వెలుగులతో నిలదీసిన పుస్తకం ‘నీడల ప్రపంచం’ అని పలువురు ప్రముఖ రచయితలు, విశ్లేషకులు ప్రశంసించారు. సీనియర్ పాత్రికేయుడు, రచయిత ఎన్.తిర్మల్ రచించిన ఈ వ్యాస సంకలన పుస్తకావిష్కరణ సభ సోమవారం సాయంత్రం హైదరాబాద్‌లోని రవీంద్రభారతి మినీ హాల్‌లో సాహిత్య రంగ ప్రముఖుల సమక్షంలో వైభవంగా జరిగింది. ప్రముఖ కవి హనీఫ్ ఈ కార్యక్రమానికి అధ్యక్షత వహించారు.

గ్రంథాలయ సంస్థ మాజీ చైర్మన్ డాక్టర్ ఆయాచితం శ్రీధర్ ముఖ్య అతిథిగా హాజరై 'నీడల ప్రపంచం' పుస్తకాన్ని అధికారికంగా ఆవిష్కరించారు. అనంతరం ఆయన మాట్లాడుతూ.. "కొండను అద్దంలో చూపించినట్లుగా ఎన్.తిర్మల్ ఈ సంకలనంలో అనేక అంశాలను సుస్పష్టంగా ఆవిష్కరించారు. జర్నలిజం, రాజకీయాలు, సామాజిక వాస్తవాలు, తెలంగాణ ఉద్యమ అస్తిత్వాలను లోతుగా విశ్లేషించిన తీరు పాఠకులను ఆలోచింపజేస్తుంది" అని కొనియాడారు.

జర్నలిజం రంగంపై వ్యూహాత్మక విశ్లేషణ: సతీష్ చందర్

కార్యక్రమంలో పాల్గొన్న ప్రముఖ సంపాదకుడు, రచయిత సతీష్ చందర్ మాట్లాడుతూ.. తిర్మల్ సుదీర్ఘమైన జర్నలిజం అనుభవం ఆయన రాతల్లో స్పష్టంగా కనిపిస్తుందన్నారు. "నేటి సమాజంలో చర్చకు రావాల్సిన అసలైన ఎజెండాను తిర్మల్ తన వ్యాసాల ద్వారా తెరపైకి తెచ్చారు. చాలా సాధారణ విషయాలను కూడా తనదైన అసాధారణమైన శైలి, విరుపులతో ఆకట్టుకునేలా రాశారు. పాత్రికేయ రంగ స్థితిగతులు, లోపాలపై ఆయన చేసిన విశ్లేషణలు అద్భుతంగా ఉన్నాయి" అని పేర్కొన్నారు.

50 ఏళ్ల ప్రజా పక్ష పోరాటం: జూలూరి గౌరీశంకర్

తెలంగాణ సాహిత్య అకాడమీ మాజీ చైర్మన్ జూలూరి గౌరీశంకర్ పుస్తకాన్ని సమగ్రంగా సమీక్షించారు. "తిర్మల్ సాహితీ ప్రస్థానం ఒక ధిక్కార స్వరంతో మొదలైంది. గత 50 ఏళ్లుగా ఆయన కలం ఎప్పుడూ ప్రజాపక్షం వహించి పోరాడుతూనే ఉంది. ప్రజా ఉద్యమాలకు వెన్నుదన్నుగా నిలిచిన ఆయన కలం బలాన్ని ఎవరూ విస్మరించలేరు. సమాజంలోని నిచ్చెనమెట్ల అసమానతలను ప్రశ్నించే తిర్మల్ రచనలకు ప్రత్యేకమైన పాఠక లోకం ఉంది" అని ఆయన వివరించారు.

శాంతి సంఘం తెలంగాణ అధ్యక్షుడు డాక్టర్ దిడ్డి సుధాకర్ మాట్లాడుతూ.. తిర్మల్ జీవితం ప్రజలకే అంకితమైందని, 'మట్టి పువ్వు' చదివితే ఆయన సామాజిక నిబద్ధత స్పష్టమవుతుందన్నారు. ఆయన కలం నుంచి రాని పత్రిక అంటూ ఏదీ లేదని కొనియాడారు.

కార్యక్రమం ముగింపులో రచయిత ఎన్.తిర్మల్ మాట్లాడుతూ.. తన పుస్తకావిష్కరణకు తరలివచ్చిన సాహితీవేత్తలు, మిత్రులు, తెలంగాణ భాషా సాంస్కృతిక శాఖ, రవీంద్రభారతి నిర్వాహకులకు హృదయపూర్వక కృతజ్ఞతలు తెలిపారు.