POCSO Case | బాలుడిపై లైంగిక దాడి.. పోక్సో కేసులో టీచ‌ర్‌కు యావ‌జ్జీవ శిక్ష‌

POCSO Case | త్రినేత్ర న్యూస్: ఓ బాలుడిపై లైంగిక దాడికి పాల్ప‌డిన కేసులో నిందితుడైన ఉపాధ్యాయుడికి కోర్టు యావ‌జ్జీవ కారాగార శిక్ష విధించింది. ఈమేర‌కు ఎల్.బి.నగర్‌లోని రంగారెడ్డి జిల్లా రేప్, పోక్సో కేసుల విచారణ ప్రత్యేక ఫాస్ట్ ట్రాక్ కోర్టు న్యాయమూర్తి మంగ‌ళ‌వారం తీర్పు వెలువ‌రించారు. రూ.25,500 జ‌రిమానాతో పాటు బాధితుడికి 2,00,000 ప‌రిహారం అందించాల‌ని ఆదేశించారు.

పహాడీషరీఫ్ సీఐ సీహెచ్‌. జితేందర్ ప్రకారం పూర్తి వివ‌రాలు ఇలా ఉన్నాయి. ఫిర్యాదుదారు పెద్ద‌ కుమారుడు (13) మామిడిపల్లిలోని ఇస్లామియా కాషిఫుల్ ఉలూమ్ మదర్సాలో చదువుకుంటున్నాడు. ఆ బాలుడు అనారోగ్యంతో బాధపడుతుండటంతో 2024, డిసెంబ‌ర్ 26న‌ ఇంటికి తీసుకువచ్చారు. అదే నెల 27న‌ క్లినిక్‌లో వైద్య పరీక్షలు నిర్వహించగా.. బాధితుడి రహస్య అవయవాల వద్ద తీవ్ర ఇన్ఫెక్షన్ ఉన్నట్లు గుర్తించారు. ఆ తర్వాత బాధితుడు తన తల్లికి అసలు విషయం చెప్పాడు.

బీహార్ రాష్ట్రం పూర్ణియా జిల్లా ద‌రియాపూర్ గ్రామానికి చెందిన‌ హఫీజ్ మునావర్ హుస్సేన్ (32) మదర్సాలో టీచర్‌గా పనిచేస్తున్నాడు. ఇక్క‌డే చ‌దువు చెబుతూ మామిడిప‌ల్లిలోనే ఉంటున్నాడు. 2024, డిసెంబ‌ర్ 25న సాయంత్రం సమయంలో బాలుడిని వాహనంపై పహాడీషరీఫ్, రాజీవ్ గాంధీ నగర్‌లోని మసీద్-ఎ-రహమత్ ఉన్నీసా సమీపంలోని ఒక గదికి తీసుకెళ్లాడు. అనంత‌రం లైంగిక దాడికి పాల్పడటంతో పాటు బెదిరింపులకు గురిచేసినట్లు తెలిపాడు. ఈ విషయాన్ని బాధితుడి తల్లి తన భర్తకు తెల‌ప‌గా, ఆయన వెంటనే పోలీసులకు ఫిర్యాదు చేశాడు. దీంతో పోలీసులు కేసు న‌మోదు చేసి ద‌ర్యాప్తు చేప‌ట్టి కోర్టులో ప్ర‌వేశ‌పెట్ట‌గా అడిషనల్ పబ్లిక్ ప్రాసిక్యూటర్ కృష్ణ ప్రసన్న వాద‌న‌లు వినిపించారు. దీంతో నేరం రుజువు కావ‌డంతో కోర్టు శిక్ష విధించింది అని పోలీసులు తెలిపారు.

ఈ కేసులో ముఖ్య పాత్ర పోషించిన‌ మ‌ల్కాజిగిరి సీఐ పీ. గురువారెడ్డి, ఎస్‌హెచ్‌వో బీ లక్ష్మీ నారాయణ రెడ్డి, సీడీవో ఇ.వెంకటేష్, లైజన్ ఆఫీసర్లు, రమేష్, వివేక్ రెడ్డిని పోలీసు ఉన్న‌తాధికారులు అభినందించారు.