Hyderabad-Vijayawada Highway | నడిరోడ్డుపై పల్టీ కొట్టిన లారీ.. విజయవాడ హైవేపై 6 కిమీల మేర ట్రాఫిక్ జామ్

Hyderabad-Vijayawada Highway | హైదరాబాద్-విజయవాడ జాతీయ రహదారిపై (NH65) ప్రయాణిస్తున్న వాహనదారులకు చుక్కలు కనిపిస్తున్నాయి. అబ్దుల్లాపూర్‌మెట్ మండలం ఇనాంగూడ వద్ద జరిగిన లారీ ప్రమాదం కారణంగా భారీగా ట్రాఫిక్ స్తంభించిపోయింది.

అసలేం జరిగిందంటే?

మంగళవారం ఉదయం కట్టెల లోడుతో విజయవాడ వైపు వెళ్తున్న ఒక లారీ ఇనాంగూడ సమీపంలో అదుపు తప్పి బోల్తా పడింది. లారీ రోడ్డుకు అడ్డంగా పడిపోవడంతో పాటు, అందులోని కట్టెలన్నీ రహదారిపై చెల్లాచెదురుగా పడ్డాయి. దీంతో ఆ మార్గంలో వాహనాల రాకపోకలు పూర్తిగా నిలిచిపోయాయి.

6 కిలోమీటర్ల మేర బారులు తీరిన వాహనాలు

ఈ ప్రమాదం కారణంగా ఇనాంగూడ నుంచి ఔటర్ రింగ్ రోడ్ (ORR) ఎగ్జిట్ వరకు సుమారు 6 కిలోమీటర్ల మేర వాహనాలు నిలిచిపోయాయి. పండగ రద్దీతో ఇప్పటికే హైవే రద్దీగా ఉండగా, ఈ ప్రమాదం తోడవ్వడంతో ప్రయాణికులు తీవ్ర ఇబ్బందులు పడుతున్నారు.

రంగంలోకి పోలీసులు

సమాచారం అందుకున్న అబ్దుల్లాపూర్‌మెట్ పోలీసులు వెంటనే ఘటనా స్థలానికి చేరుకున్నారు. క్రేన్ సహాయంతో రోడ్డుకు అడ్డంగా ఉన్న లారీని, చెల్లాచెదురుగా పడిన కట్టెలను తొలగించేందుకు ప్రయత్నిస్తున్నారు. ట్రాఫిక్ క్లియర్ కావడానికి ఇంకా సమయం పట్టే అవకాశం ఉందని, వాహనదారులు ప్రత్యామ్నాయ మార్గాల్లో వెళ్లాలని సూచిస్తున్నారు.