Revanth Reddy | ఆర్టీసీ క్రాస్ రోడ్స్‌లో హై టెన్ష‌న్‌.. భారీగా పోలీసుల మోహ‌రింపు

Revanth Reddy | త్రినేత్ర‌.న్యూస్ : హైద‌రాబాద్ న‌గ‌రంలోని ఆర్టీసీ క్రాస్ రోడ్స్‌తో పాటు చిక్క‌డ‌ప‌ల్లి ప్రాంతాల్లో తీవ్ర ఉద్రిక్త ప‌రిస్థితులు నెల‌కొన్నాయి. ఈ ప్రాంతాల్లో పోలీసులు భారీగా మోహ‌రించారు. ఆర్టీసీ క్రాస్ రోడ్స్‌లో నూత‌నంగా నిర్మించిన ఓడియ‌న్ థియేట‌ర్‌ను సీఎం రేవంత్ రెడ్డి మ‌రికాసేపట్లో ప్రారంభించ‌నున్నారు.

అయితే నిన్న ఇదే ఆర్టీసీ క్రాస్ రోడ్స్, చిక్క‌డ‌ప‌ల్లి ఏరియాల్లో నిరుద్యోగ అభ్య‌ర్థులు ఆందోళ‌న‌కు దిగారు. త‌క్ష‌ణ‌మే ప్ర‌భుత్వ ఉద్యోగ నోటిఫికేష‌న్లు ఇవ్వాల‌ని డిమాండ్ చేశారు. జాబ్ క్యాలెండ‌ర్ హామీ ఏమైంద‌ని నిల‌దీశారు. అంద‌రికీ ప్ర‌భుత్వ ఉద్యోగాలు ఇవ్వ‌లేమ‌ని శాస‌న‌సభా వేదికగా మంత్రి శ్రీధ‌ర్ బాబు చెప్ప‌డంతో నిరుద్యోగులు నిప్పులు చెరుగుతున్నారు. పోని ప్ర‌యివేటు రంగంలో ఎంత మందికి ఉద్యోగ‌, ఉపాధి అవ‌కాశాలు క‌ల్పించార‌ని నిల‌దీస్తున్నారు.

ఈ నేప‌థ్యంలో ఇవాళ కూడా నిరుద్యోగులు ధ‌ర్నాలు, నిర‌స‌న కార్య‌క్ర‌మాలు చేప‌ట్టే అవ‌కాశం ఉంద‌ని భావించిన పోలీసులు.. సీఎం ప‌ర్య‌ట‌న సంద‌ర్భంగా చ‌ర్య‌లు తీసుకుంటున్నారు. పోలీసుల చ‌ర్య‌ల‌తో ఆర్టీసీ క్రాస్ రోడ్స్‌లో ఉద్రిక్త‌త నెల‌కొంది.