KTR SIT Investigation | ఫోన్ ట్యాపింగ్ కేసు: కేటీఆర్ సిట్ విచారణపై సీపీ సజ్జనార్ కీలక వివరణ

KTR SIT Investigation | త్రినేత్ర.న్యూస్: తెలంగాణలో సంచలనం సృష్టించిన ఫోన్ ట్యాపింగ్ కేసు (పంజాగుట్ట పి.ఎస్. క్రైమ్ నంబర్ 243/2024) దర్యాప్తు కీలక దశకు చేరుకుంది. ఈ కేసు దర్యాప్తులో భాగంగా మాజీ మంత్రి, సిరిసిల్ల ఎమ్మెల్యే కేటీఆర్ (KTR)కు ప్రత్యేక దర్యాప్తు బృందం (SIT) నోటీసులు జారీ చేయగా, ఆయన నేడు విచారణకు హాజరయ్యారు. దీనికి సంబంధించి సీపీ సజ్జనార్ కీలక వివరణ ఇచ్చారు.

జూబ్లీహిల్స్ పీఎస్‌లో విచారణ

నోటీసుల ప్రకారం, శుక్రవారం జనవరి 23, 2026 ఉదయం 11:00 గంటలకు కేటీఆర్ జూబ్లీహిల్స్ పోలీస్ స్టేషన్‌లో దర్యాప్తు అధికారి ఎదుట హాజరయ్యారన్నారు. ఈ సందర్భంగా సిట్ అధికారులు ఆయనను సుదీర్ఘంగా విచారించి, కేసుకు సంబంధించిన కీలక అంశాలపై సమాచారాన్ని సేకరించారన్నారు.

పోలీసుల కీలక ఆదేశాలు

కేసుతో సంబంధం ఉన్న సాక్షులను ఎవరినీ సంప్రదించవద్దని లేదా వారిని ప్రభావితం చేసే ప్రయత్నం చేయవద్దని కేటీఆర్‌కు సూచించామని, రికార్డులో ఉన్న సాక్ష్యాధారాలతో ఆయన ఇచ్చిన సమాచారాన్ని అధికారులు విశ్లేషిస్తున్నారన్నారు. దర్యాప్తులో భాగంగా అవసరమైతే విచారణకు మళ్లీ హాజరుకావాల్సి ఉంటుందని ఆయనకు స్పష్టం చేశారని సజ్జనార్ తెలిపారు.

వేలాది మందిపై అక్రమ నిఘా

ఈ విచారణ కేవలం క్రైమ్ నంబర్ 243/2024కు సంబంధించి మాత్రమే జరిగిందని సీపీ సజ్జనర్ స్పష్టం చేశారు. రాజకీయ నాయకులు, వ్యాపారవేత్తలు, జర్నలిస్టులు, న్యాయమూర్తులు, ప్రముఖులతో సహా వేలాది మంది పౌరుల ఫోన్లను అనధికారికంగా, చట్టవిరుద్ధంగా ట్యాపింగ్ (Interception) చేశారనే ఆరోపణలపై ఈ దర్యాప్తు జరుగుతోందని సజ్జనార్ స్పష్టం చేశారు.

తప్పుడు ప్రచారాలను నమ్మవద్దు: సీపీ విజ్ఞప్తి

ఫోన్ ట్యాపింగ్ కేవలం భద్రతా కారణాల దృష్ట్యా జరిగిందని, ఇందులో చట్టవ్యతిరేకత లేదని కొన్ని మీడియా వర్గాలు చేస్తున్న ప్రచారాన్ని సీపీ తీవ్రంగా ఖండించారు. ఈ దర్యాప్తు పూర్తిగా చట్టప్రకారం, నిష్పక్షపాతంగా, వృత్తిపరమైన ప్రమాణాలతో జరుగుతోందని ఆయన తెలిపారు.

అధికారిక సమాచారమే ముఖ్యం

ధృవీకరించని లేదా తప్పుదోవ పట్టించే సమాచారాన్ని ప్రచారం చేయవద్దని ప్రజలను కోరారు. అధికారిక మార్గాల ద్వారా వెల్లడించిన వాస్తవాలను మాత్రమే పరిగణలోకి తీసుకోవాలని విజ్ఞప్తి చేశారు.

https://x.com/SajjanarVC/status/2014705022072971561