Neopolis | నియోపోలిస్‌లో ఎక‌రా రూ.120 కోట్లు.. హెచ్‌డీఏ ఈ-వేలంలో రికార్డు స్థాయి ధ‌ర‌

Neopolis | త్రినేత్ర‌.న్యూస్‌: హైద‌రాబాద్‌లో భూముల‌ను ప్ర‌భుత్వం మ‌రోసారి అమ్ముతున్న‌ది. గండిపేట్ మండలం కోకాపేట ప‌రిధిలోని నియోపోలిస్ (Neopolis) లేఅవుట్‌, గోల్డెన్ మైల్ సైట్‌-1లోని ప్లాట్ల వేలంలో హెచ్ఎండీఏ (HMDA) నిర్వ‌హించిన ఈ-వేలంలో (HMDA e-Auction) రికార్డు స్థాయిలో బిడ్లు న‌మోద‌య్యాయి. నియోపోలిస్ లేఅవుట్‌లోని 4.59 ఎక‌రాల ప్లాట్‌కు ఎక‌రా రూ.120 కోట్ల చొప్పున బిడ్ దాఖ‌లైంది. అలాగే గోల్డెన్ మైల్ సైట్-1లోని 0.70 ఎకరాల ప్లాట్‌కు అత్యంత భారీ స్పందన లభించింది. ఎకరాకు రూ.70 కోట్లుగా నిర్ణయించ‌గా.. అత్యధిక బిడ్ ధర రూ.115 కోట్లుగా నమోదైంది.

హైదరాబాద్ పశ్చిమ ప్రాంతంలోని వ్యూహాత్మకంగా కీలకమైన ప్రాంతాల్లో ఉన్న ప్లాట్లకు కొనసాగుతున్న డిమాండ్‌కు ఇది నిదర్శనంగా నిలిచింది. ఈ రెండు ప్లాట్లు కోకాపేట్‌లో (Kokapet) వ్యూహాత్మకంగా కీలకమైన ప్రాంతాల్లో ఉన్నాయి. ఔటర్ రింగ్ రోడ్ (ORR), ఫైనాన్షియల్ డిస్ట్రిక్ట్, గచ్చిబౌలి, హైటెక్‌సిటీ (HITEC) సిటీ వంటి ప్రధాన ప్రాంతాలకు అద్భుతమైన రవాణా అనుసంధానం కలిగి ఉన్నాయి. హైదరాబాద్ పశ్చిమ ప్రాంతంలోని అభివృద్ధి చెందిన గ్రోత్ కారిడార్‌లో వీటి స్థానం కారణంగా రియల్ ఎస్టేట్ అభివృద్ధి మరియు పెట్టుబడులకు వీటి ఆకర్షణ మరింత పెరుగుతున్న‌ది.