National Sports Day | రీల్స్ కోసం కాదు.. రియల్ లైఫ్ కోసం ఆడండి

• హైదరాబాద్ గచ్చిబౌలి స్టేడియంలో ఘనంగా మేజర్ ధ్యాన్‌చంద్ జయంతి వేడుకలు
• తెలంగాణ హాకీ లీగ్ ఫైనల్ మ్యాచ్‌ను ప్రారంభించిన మంత్రి వాకిటి శ్రీహరి, స్పోర్ట్స్ అథారిటీ చైర్మన్ శివసేన రెడ్డి
• సోషల్ మీడియా రీల్స్ కోసం కాకుండా 'రియల్ లైఫ్' కోసం ఆటలు ఆడాలని యువతకు మంత్రి పిలుపు
• సీఎం రేవంత్ రెడ్డి ఆధ్వర్యంలో తెలంగాణను దేశంలోనే బెస్ట్ 'స్పోర్ట్స్ హబ్'గా మార్చేందుకు ప్రభుత్వ కృషి

National Sports Day | త్రినేత్ర.న్యూస్ : జాతీయ క్రీడా దినోత్సవం (National Sports Day) సందర్భంగా హైదరాబాద్‌లోని గచ్చిబౌలి హాకీ స్టేడియం క్రీడా శోభను సంతరించుకుంది. హాకీ మాంత్రికుడు మేజర్ ధ్యాన్‌చంద్ జయంతిని పురస్కరించుకుని ఇక్కడ నిర్వహించిన వేడుకల్లో రాష్ట్ర క్రీడలు, యువజన సర్వీసుల శాఖ మంత్రి వాకిటి శ్రీహరి పాల్గొని యువతకు దిశానిర్దేశం చేశారు.

స్పోర్ట్స్ అథారిటీ చైర్మన్ శివసేన రెడ్డి, VC&MD సోనిబాలదేవి, హాకీ అసోసియేషన్ ప్రెసిడెంట్ కొండా విజయ్‌తో కలిసి మంత్రి శ్రీహరి.. తొలుత మేజర్ ధ్యాన్‌చంద్ విగ్రహానికి పూలమాలలు వేసి ఘనంగా నివాళులర్పించారు. అనంతరం ఎంతో ఆసక్తిగా ఎదురుచూస్తున్న 'తెలంగాణ హాకీ లీగ్' ఫైనల్ మ్యాచ్‌ను వారు లాంఛనంగా ప్రారంభించారు.

ఈ సందర్భంగా మంత్రి వాకిటి శ్రీహరి చేసిన వ్యాఖ్యలు యువతను విశేషంగా ఆకర్షించాయి. ధ్యాన్‌చంద్ క్రమశిక్షణ, అంకితభావాన్ని కొనియాడిన ఆయన.. ప్రస్తుత తరం క్రీడాకారులకు ఓ ఇంట్రెస్టింగ్ సలహా ఇచ్చారు. సోషల్ మీడియాలో వ్యూస్ కోసం 'రీల్స్' (Reels) చేయడంపై కాకుండా, తమ ఉజ్వల భవిష్యత్తు కోసం క్రీడలపై, అంటే 'రియల్ లైఫ్'పై ఫోకస్ చేయాలని పిలుపునిచ్చారు. ఆటలపై ప్యాషన్, ఫోకస్, క్రమశిక్షణ ఉంటే సక్సెస్ ఆటోమేటిక్‌గా వస్తుందని స్పష్టం చేశారు.

ధ్యాన్‌చంద్ స్ఫూర్తితో తెలంగాణ అథ్లెట్లు నేషనల్, ఇంటర్నేషనల్ లెవెల్‌లో సత్తా చాటాలని, రాష్ట్రానికి పేరు ప్రఖ్యాతులు తీసుకురావాలని మంత్రి ఆకాంక్షించారు. ముఖ్యమంత్రి ఎ. రేవంత్ రెడ్డి దార్శనికతతో రాష్ట్రంలో క్రీడాకారులకు బెటర్ ఇన్ఫ్రాస్ట్రక్చర్, బెస్ట్ ట్రైనింగ్ అందిస్తున్నామని తెలిపారు. అతి త్వరలోనే తెలంగాణను దేశంలోనే నంబర్ వన్ 'స్పోర్ట్స్ హబ్'గా (Sports Hub) తీర్చిదిద్దుతామని ఆయన ధీమా వ్యక్తం చేశారు. క్రీడల పట్ల యువతలో మరింత ఆసక్తిని పెంచేలా ప్రభుత్వం ముందుకెళ్తోందని స్పష్టం చేశారు.