HMDA | స‌ర‌స్సుల పున‌రుద్ధ‌ర‌ణ‌.. రంగంలోకి అంబిఫిబియ‌స్ ఎక్స్‌క‌వేట‌ర్

HMDA | త్రినేత్ర‌.న్యూస్ : హైదరాబాద్ మహానగర అభివృద్ధి సంస్థ (HMDA) సరస్సుల పునరుద్ధరణ, సంరక్షణ కార్యక్రమాలను మరింత సమర్థ‌వంతంగా నిర్వహించేందుకు అత్యాధునిక అంబిఫిబియస్ ఎక్స్‌క‌వేటర్‌ను రూ. 2.87 కోట్ల వ్యయంతో ఈ–ప్రొక్యూర్‌మెంట్ ద్వారా కొనుగోలు చేసింది. ఈ యంత్రాన్ని సోమ‌వారం మంత్రి పొన్నం ప్ర‌భాక‌ర్, ఎమ్మెల్యే దానం నాగేంద‌ర్ క‌లిసి ప్రారంభించారు.

ఈ కార్య‌క్ర‌మంలో హెచ్ఎండీఏకు చెందిన ఉన్న‌తాధికారులు జేఎంసీ వెంక‌న్న‌, చీఫ్ ఇంజినీర్ ర‌వీంద‌ర్, సూప‌రింటెండింగ్ ఇంజినీర్ అప్పారావు, డివిజ‌న్ 3 ఎగ్జిక్యూటివ్ ఇంజినీర్ శ్రీనివాస్‌తో పాటు త‌దిత‌రులు పాల్గొన్నారు.

ఈ అంబిఫిబియస్ ఎక్స్‌క‌వేటర్ నీటితో నిండిన, మడుగు ప్రాంతాల్లో పనిచేసేలా ప్రత్యేకంగా రూపుదిద్దుకుంది. సరస్సుల అడుగుభాగంలో పేరుకుపోయిన మట్టిని తొలగించడం, డ్రెడ్జింగ్ పనులు, బండల బలోపేతం, నీటి మొక్కల తొలగింపు, చెత్త, స్లడ్జ్ తొలగింపు, పాత చెరువుల పునరుద్ధరణ వంటి కార్యక్రమాల్లో విస్తృతంగా వినియోగించబడుతుంది. ముఖ్యంగా హుస్సేన్ సాగర్ సరస్సు పరిస్థితిని మెరుగుపరచడంలో ఈ యంత్రం కీలక పాత్ర పోషించనుంది.

అలాగే గణేశ్ నిమ‌జ్జ‌నం, దుర్గాపూజ, బతుకమ్మ, ఛఠ్ పూజ వంటి ప్రధాన పండుగల సందర్భంగా విగ్రహ నిమజ్జన కార్యక్రమాలను సాఫీగా నిర్వహించడంలో కూడా ఈ యంత్రాన్ని సమర్థ‌వంతంగా వినియోగించనున్నారు. యంత్రం సమర్థవంతంగా పనిచేయడానికి ప్రతి షిఫ్ట్‌లో ఒక నైపుణ్యంతో కూడిన ఆపరేటర్, ఒక సెమీ-స్కిల్డ్ ఆపరేటర్ నియమించబడతారు. అదనంగా, అవసరమైనప్పుడు సర్వీస్ ఇంజనీర్ మద్దతు కూడా అందుబాటులో ఉంటుంది.