Jubilee Hills CI | ఫిర్యాదు చేయ‌డానికి వ‌చ్చిన మ‌హిళ‌ను లోబ‌ర్చుకున్నాడు.. జూబ్లీహిల్స్ సీఐపై సస్పెన్షన్‌ వేటు

Jubilee Hills CI | త్రినేత్ర‌.న్యూస్‌: హైద‌రాబాద్ జూబ్లీహిల్స్ పోలీస్ స్టేష‌న్ సీఐ శ్రీనివాసులు రెడ్డిపై (Jubilee Hills CI) స‌స్పెన్ష‌న్ వేటు ప‌డింది. ఫిర్యాదు చేయ‌డానికి వ‌చ్చి ఓ మ‌హిళ‌ల‌కు మాయ‌మాట‌లు చెప్పి లోబ‌రచుకోవ‌డంతోపాటు, ఆమె వ్య‌క్తిగ‌త వీడియోలు చూపించి డ‌బ్బులు వ‌సూలు చేసిన‌ట్లు తేల‌డంతో సీపీ స‌జ్జ‌నర్ ఆయ‌న‌ను స‌స్పెండ్ (suspended) చేస్తూ ఉత్త‌ర్వులు జారీచేశారు. దీంతో జూబ్లీహిల్స్ పీఎస్‌ బాధ్యతలు చేపట్టిన 4 నెలల్లోనే సస్పెన్షన్‌కు గురికావడం గ‌మ‌నార్హం.

పోలీస్‌స్టేష‌న్‌కు ఫిర్యాదు చేసేందుకు వచ్చిన బాధితురాలిని న‌మ్మించిన ఇన్‌స్పెక్టర్‌.. ఆమెతో సన్నిహితంగా మెలుగుతూ ఫొటోలు, వీడియోలు తీసుకున్నాడు. వాటిని చూపి పెద్దఎత్తున డబ్బు వ‌సూలు చేసిన‌ట్లు పోలీసు ఉన్నతాధికారులకు బాధితురాలు ఫిర్యాదు చేశారు. తనపై పలుమార్లు లైంగికదాడికి పాల్పడ్డాడని, అబార్షన్‌ చేయించినట్టు ఫిర్యాదులో పేర్కొన్నారు. దీంతో పోలీసు ఉన్నతాధికారులు ఇన్‌స్పెక్టర్‌పై అంతర్గత విచారణకు ఆదేశించారు.

మ‌హిళ వ్య‌క్తిగ‌త వీడియోల‌ను అడ్డంగా పెట్టుకుని డ‌బ్బులు వ‌సూలు చేసిన‌ట్లు అధికారులు గుర్తించారు. కొంత‌కాలంపాటు సీఐ శ్రీనివాసులు రెడ్డి (Srinivasulu Reddy), బాధిత మ‌హిళ ఒకే ఇంట్లో ఉన్న‌ట్లు తేలింది. అనంత‌రం ఆమెను వ‌దిలించుకునేందుకు సీఐ ప్ర‌య‌త్నాలు చేసిన‌ట్లు తేలడంతో శాఖాప‌ర‌మైన చ‌ర్య‌ల్లో భాగంగా సీఐని విధుల నుంచి స‌స్పెండ్ చేశారు.