Fake Number Plates Hyderabad | ట్రాఫిక్ చలాన్ల నుంచి తప్పించుకోవడానికి నకిలీ నంబర్ ప్లేట్లు వాడుతున్నారా?

• వెహికిల్ నంబర్ ప్లేట్‌తో 'గేమ్స్' ఆడుతున్నారా?
• ఏకంగా క్రిమినల్ కేసులే
• హైదరాబాద్ ట్రాఫిక్ పోలీసుల వార్నింగ్

Fake Number Plates Hyderabad | త్రినేత్ర.న్యూస్ : ట్రాఫిక్ చలాన్ల నుంచి తప్పించుకోవడానికి నంబర్ ప్లేట్లను వంచడం, అక్షరాలు చెరిపేయడం, నకిలీ నంబర్లు వాడటం లాంటివి చేస్తున్నారా? అయితే మీరు తీవ్ర చిక్కుల్లో పడ్డట్టే! నకిలీ, మార్పులు చేసిన నంబర్ ప్లేట్లపై హైదరాబాద్ ట్రాఫిక్ పోలీసులు (Hyderabad Traffic Police) ఉక్కుపాదం మోపుతున్నారు. పౌరుల నుంచి వస్తున్న ఫిర్యాదుల మేరకు నగరవ్యాప్తంగా స్పెషల్ ఎన్‌ఫోర్స్‌మెంట్ డ్రైవ్ (Special Enforcement Drive) చేపట్టి అక్రమార్కుల భరతం పడుతున్నారు.

5 క్రిమినల్ కేసులు.. వాహనాలు సీజ్

బండి అసలు గుర్తింపును దాచడం, మోటారు వాహనాల చట్టాన్ని ఉల్లంఘించడం తీవ్రమైన నేరంగా పోలీసులు పరిగణిస్తున్నారు. ఈ స్పెషల్ డ్రైవ్‌లో భాగంగా గత వారంలోనే ఐదుగురిపై ఏకంగా క్రిమినల్ కేసులు (Criminal cases) నమోదు చేశారు. రూల్స్ బ్రేక్ చేసిన వాహనాలను అక్కడికక్కడే సీజ్ చేశారు.

ఈ క్రిమినల్ కేసులు కింది లా అండ్ ఆర్డర్ పోలీస్ స్టేషన్ల పరిధిలో నమోదయ్యాయి

• జుబ్లీహిల్స్ పోలీస్ స్టేషన్ (Jubilee Hills PS)
• మలక్‌పేట్ పోలీస్ స్టేషన్ (Malakpet PS)
• బేగంబజార్ పోలీస్ స్టేషన్ (Begumbazar PS)
• అబిడ్స్ పోలీస్ స్టేషన్ (Abids PS)
• కాచిగూడ పోలీస్ స్టేషన్ (Kachiguda PS)

HSRP నంబర్ ప్లేట్లు మస్ట్‌

ప్రభుత్వం ఆమోదించిన హై-సెక్యూరిటీ రిజిస్ట్రేషన్ ప్లేట్లు (HSRP) మాత్రమే వాహనాలకు ఉండాలని ట్రాఫిక్ పోలీసులు స్పష్టం చేశారు. నంబర్ ప్లేట్లపై రంగులు పూయడం, అదనపు మార్పులు చేయడం, ఫాంట్ సైజులు మార్చడం లేదా టెంపరరీ స్టిక్కర్లు వాడటం చట్టవిరుద్ధమని తేల్చి చెప్పారు.

జీరో టాలరెన్స్.. ఇక ఉపేక్షించేది లేదు

నకిలీ రిజిస్ట్రేషన్ పద్ధతులపై తమది 'జీరో టాలరెన్స్' (Zero Tolerance) విధానమని ట్రాఫిక్ పోలీసులు పునరుద్ఘాటించారు. ఎవరైనా ఉద్దేశపూర్వకంగా నంబర్ ప్లేట్ ట్యాంపరింగ్ చేసినట్లు పట్టుబడితే.. క్రిమినల్ ప్రాసిక్యూషన్‌తో పాటు వాహనాన్ని తక్షణమే సీజ్ చేస్తామని హైదరాబాద్ సిటీ ట్రాఫిక్ జాయింట్ కమిషనర్ ఆఫ్ పోలీస్, డి. జోయల్ డెవిస్ (IPS) తీవ్రంగా హెచ్చరించారు.

ప్రజా భద్రత, నేరాల నియంత్రణ కోసం ఈ తనిఖీలు నగరవ్యాప్తంగా మరింత కఠినంగా కొనసాగుతాయని పోలీసులు స్పష్టం చేశారు. కాబట్టి, వాహనదారులంతా వెంటనే తమ బండ్ల నంబర్ ప్లేట్లను చెక్ చేసుకుని, నిబంధనల ప్రకారం ఉండేలా చూసుకోవడం ఉత్తమం.