Chinese Manja Ban Hyderabad | చైనా మాంజా అమ్మితే కటకటాలకే: వ్యాపారులకు హైదరాబాద్ పోలీసుల తీవ్ర హెచ్చరిక.. అడ్వాన్సులు ఇస్తే అంతే సంగతులు

Chinese Manja Ban Hyderabad | త్రినేత్ర న్యూస్ : ప్రాణాంతక చైనా మాంజా (సింథటిక్/నైలాన్ దారం)పై హైదరాబాద్ సిటీ పోలీసులు ముందస్తుగానే కొరడా ఝుళిపించారు. గాలిపటాల పండుగ సీజన్ సమీపిస్తున్న నేపథ్యంలో అక్రమ వ్యాపారానికి తెరలేపాలని చూసే వారికి గట్టి వార్నింగ్ ఇచ్చారు. గోల్కొండ జోన్ పరిధిలోని నాంపల్లి ఎగ్జిబిషన్ గ్రౌండ్స్‌లో గురువారం నగరంలోని కైట్ షాపుల యజమానులు, టోకు వ్యాపారులతో పోలీస్ శాఖ అత్యవసర సమావేశం నిర్వహించింది.

గోల్కొండ జోన్ డిప్యూటీ కమిషనర్ ఆఫ్ పోలీస్ (DCP) జె. రాఘవేందర్ రెడ్డి అధ్యక్షతన జరిగిన ఈ సదస్సులో గోషామహల్ ఏసీపీ కే. చంద్రశేఖర్ రెడ్డి, కుల్సుంపుర ఏసీపీ వి. తిరుపతితో పాటు పలువురు ఇన్‌స్పెక్టర్లు పాల్గొని వ్యాపారులకు స్పష్టమైన మార్గదర్శకాలు జారీ చేశారు.

అడ్వాన్సులు ఇచ్చి స్టాక్ బుక్ చేస్తే వ్యాపారాలు బంద్

పండుగ డిమాండ్‌ను ఆసరాగా చేసుకుని వ్యాపారులు ముందస్తుగా చైనా మాంజా ఆర్డర్లు ఇవ్వడం, అడ్వాన్స్ పేమెంట్లు చేయడం లేదా రహస్యంగా గోదాముల్లో నిల్వ ఉంచడం వంటివి చేయవద్దని పోలీసులు స్ట్రాంగ్ వార్నింగ్ ఇచ్చారు. ముందుగా పెట్టుబడి పెడితే, తర్వాత ఆ డబ్బును రికవరీ చేసుకునేందుకు దొంగచాటుగా విక్రయించే ముప్పు ఉందని అధికారులు స్పష్టం చేశారు.

"రూల్స్ తెలియవనో లేదా ఇప్పటికే పెట్టుబడి పెట్టేశామనో వ్యాపారులు చెప్పే ఏ సాకునూ పోలీస్ శాఖ అంగీకరించదు. ఎవరైనా చైనా మాంజాను కొనుగోలు చేసినా, నిల్వ ఉంచినా, రవాణా చేసినా దుకాణాలను సీజ్ చేయడంతో పాటు నాన్-బెయిలబుల్ కేసులు నమోదు చేస్తాం" అని డీసీపీ రాఘవేందర్ రెడ్డి తేల్చిచెప్పారు.

ప్రాణాలు తీసిన పదునైన దారం.. గత చేదు అనుభవాలు

చైనా మాంజా గాల్లో ఎగిరే పండుగ సంతోషాన్ని ఎలా విషాదంగా మారుస్తోందో అధికారులు గత సంఘటనల ద్వారా గుర్తుచేశారు.

జనవరి 2024: లంగర్‌హౌజ్ ఇందిరారెడ్డి ఫ్లైఓవర్‌పై బైక్‌పై వెళ్తున్న ఇండియన్ ఆర్మీ నాయక్ కైగితల కోటేశ్వర రెడ్డి మెడకు చైనా మాంజా చుట్టుకుని, తీవ్ర రక్తస్రావమై అక్కడికక్కడే మృతి చెందారు.

జనవరి 2023 & 2025: నాగోల్ వద్ద తండ్రితో బైక్‌పై వెళ్తున్న ఆరేళ్ల చిన్నారి మెడ కోసుకుపోయి ప్రాణాపాయ స్థితికి చేరగా, నారాయణగూడ ఫ్లైఓవర్‌పై విధుల్లో ఉన్న పోలీస్ కానిస్టేబుల్ మెడ తెగి తీవ్ర గాయాలపాలయ్యారు.

మూగజీవాల పరిస్థితి మరింత దయనీయంగా ఉంది. ఒక్క 2024లోనే నగర పరిసరాల్లో మాంజాలో చిక్కుకున్న 1,175 పక్షులను జంతు ప్రేమికులు రక్షించగా, అందులో తీవ్ర గాయాలతో దాదాపు 400 పక్షులు ప్రాణాలు విడిచాయి.

బైకర్లు, తల్లిదండ్రులకు పోలీసుల విజ్ఞప్తి

నైలాన్, ప్లాస్టిక్ రసాయనాలతో పాటు గాజు పొడి పూతతో తయారయ్యే ఈ దారం అత్యంత పదునుగా ఉండి కంటికి కూడా సరిగ్గా కనిపించదు. ఫ్లైఓవర్లు, చెట్లు, కరెంట్ స్తంభాలకు వేలాడుతూ ప్రయాణికుల పాలిట మృత్యుపాశాలుగా మారుతోంది. ముఖ్యంగా ద్విచక్ర వాహనదారులు ఫ్లైఓవర్లపై వెళ్లేటప్పుడు హెల్మెట్, మెడకు రక్షణగా స్కార్ఫ్ వంటివి ధరించి అత్యంత అప్రమత్తంగా ఉండాలని సూచించారు.

పిల్లలకు సాధారణ కాటన్ (నూలు) దారాలను మాత్రమే కొనివ్వాలని, మార్కెట్లో ఎవరైనా చైనా మాంజా విక్రయిస్తున్నట్లు గుర్తిస్తే వెంటనే డయల్ 100 ద్వారా పోలీసులకు సమాచారం అందించాలని అధికారులు కోరారు. ఆకాశంలో ఎగిరే గాలిపటం ఆనందాన్ని పంచాలి తప్ప, ఎవరి ప్రాణాలనూ బలిగొనకూడదని పోలీస్ శాఖ స్పష్టం చేసింది.