VC Sajjanar | మ‌న సంతోషం.. మ‌రొక‌రి ప్రాణాల‌కు ముప్పుగా మారొద్దు..

చైనీస్ మాంజాపై పోలీసుల ఉక్కుపాదం.. నగరంలో రూ.1.24కోట్ల నిషేధిత మాంజా స్వాధీనం మాంజా విక్రయిస్తే ఉపేక్షించే పరిస్థితి లేదు.. తల్లిదండ్రులు బాధ్యతగా వ్యవహరించాలి హైదరాబాద్ సీపీ వీసీ సజ్జనార్ VC Sajjanar | పర్యావరణంతో పాటు పక్షులకు ముప్పుగా మారిన నిషేధిత చైనీస్ మాంజాపై హైదరాబాద్ నగర పోలీసులు ఉక్కుపాదం మోపారు. ఈ మేరకు నగరంలో గురువారం నగర కమిషనరేట్ పరిధిలో స్పెషల్ డ్రైవ్ నిర్వహించి.. పెద్ద ఎత్తున నిషేధిత మాంజాను స్వాధీనం చేసుకున్నారు. ఈ సందర్భంగా సజ్జనార్ వీసీ సమావేశం ఏర్పాటు చేసి, మీడియాకు వివరాలు వెల్లడించారు. ఈ సందర్భంగా ఆయన మాట్లాడుతూ.. సంక్రాంతి అంటేనే పతంగుల పండుగ, ఆనందాల హేళ అన్నారు. మన సంతోషం మరొకరి ప్రాణానికి ముప్పుగా మారకూడదన్నారు. పర్యావరణానికి, మనుషుల ప్రాణాలకు హాని కలిగించే ‘చైనీస్ మాంజా’పై ప్రభుత్వం సంపూర్ణ నిషేధం విధించిందని తెలిపారు. నిషేధాజ్ఞలు ఉన్నప్పటికీ కొందరు గుట్టుచప్పుడు కాకుండా వీటిని విక్రయిస్తున్నారని, నగరంలో ఎవరైనా చైనా మాంజాను విక్రయించినా, గోదాముల్లో నిల్వ చేసినా, అక్రమ రవాణాకు పాల్పడినా ఉపేక్షించే ప్రసక్తే లేదన్నారు. ఈ-కామర్స్ వెబ్సైట్స్పై నిఘా.. నిబంధనలు అతిక్రమిస్తే తక్షణమే క్రిమినల్ కేసులు నమోదు చేసి అరెస్ట్ చేస్తామని హెచ్చరించారు. దుకాణాల్లో తనిఖీలు ముమ్మరం చేయడంతో వ్యాపారులు ఆన్లైన్ బాట పట్టినట్లు తమ దృష్టికి వచ్చిందని, ఈ-కామర్స్ వెబ్సైట్లు, సోషల్ మీడియా వేదికగా సాగే క్రయవిక్రయాలపై 24 గంటల పాటు ప్రత్యేక నిఘా ఉంచామన్నారు. ఆన్లైన్లో మాంజా కొనుగోలు చేసినా, విక్రయించినా కఠిన చర్యలు తప్పవని స్పష్టం చేశారు. ప్లాస్టిక్, గాజు పెంకులు, మెటాలిక్ కోటింగ్ ఉండే ఈ మాంజా వల్ల పిల్లలకు విద్యుత్ షాక్ కొట్టే ప్రమాదం ఉందని, తల్లిదండ్రులు బాధ్యతగా వ్యవహరించి సంప్రదాయ నూలు దారాలనే ప్రోత్సహించాలని కోరారు. ఎవరైనా మాంజా విక్రయిస్తే డయల్ 100, వాట్సాప్ నెంబర్ 94906 16555కి సమాచారం ఇవ్వాలని సజ్జనార్ విజ్ఞప్తి చేశారు. రూ.1.24కోట్ల విలువైన మాంజా సీజ్ నగరవ్యాప్తంగా అన్ని జోన్లలో నిర్వహించిన దాడుల్లో ఇప్పటివరకు మొత్తం 103 కేసులు నమోదయ్యాయని, 143 మందిని అరెస్టు చేశామన్నారు. నిందితుల నుంచి రూ.1.24కోట్ల విలువైన విలువైన 6,226 మాంజా బాబిన్లను పోలీసులు స్వాధీనం చేసుకున్నామన్నారు. సౌత్ వెస్ట్ జోన్లో అత్యధికంగా 34 కేసులు నమోదు కాగా, 46 మందిని అరెస్టు చేసి, రూ.65.30లక్షల విలువైన 3,265 బాబిన్లను సీజ్ చేశామన్నారు. ఆ తర్వాతి స్థానంలో సౌత్ జోన్లో 27 కేసులు నమోదు కాగా, 35 మందిని అరెస్టు చేసి రూ. 37.22లక్షల విలువైన 1,861 బాబిన్లను స్వాధీనం చేసుకున్నారు. ఈస్ట్ జోన్లో 18 కేసులు, సౌత్ ఈస్ట్ జోన్లో 9, సెంట్రల్ జోన్లో 6 కేసులు, నార్త్ జోన్లో 5 కేసులు, వెస్ట్జోన్లో 4 కేసులు నమోదయ్యాయని వివరించారు. ఈ దాడుల్లో సిటీ టాస్క్ ఫోర్స్ కీలక పాత్ర పోషించిందని సజ్జనార్ అభినందించారు. మొత్తం నమోదైన కేసుల్లో 67 కేసులు టాస్క్ ఫోర్స్ ఆధ్వర్యంలోనే నమోదు కాగా, 87 మందిని అదుపులోకి తీసుకొని రూ. 68.78 లక్షల విలువైన సరుకును సీజ్ చేశారు. కార్యక్రమంలో క్రైమ్స్ అడిషనల్ సీపీ శ్రీనివాసులు, డీసీపీలు కారె కిరణ్ ప్రభాకర్, జీ చంద్రమోహన్, గైక్వాడ్ వైభవ్ రఘునాథ్, అడిషనల్ డీసీపీ అందె శ్రీనివాస్ రావు పాల్గొన్నారు.