Hash oil | విలాసాల కోసం హ్యాష్ ఆయిల్ విక్ర‌యం.. ముగ్గురు అరెస్ట్

Hash oil | త్రినేత్ర‌.న్యూస్ : ఆర్థిక ఇబ్బందుల‌ను అధిగ‌మించేందుకు ఓ ఇద్ద‌రు యువ‌కులు అక్ర‌మ సంపాద‌న‌కు తెర‌లేపారు. నిషేధిత మ‌త్తు ప‌దార్థాల‌ను విక్ర‌యిస్తూ విలాస జీవితానికి అల‌వాటు ప‌డ్డారు. అయితే మ‌త్తు ప‌దార్థాల‌ను విక్ర‌యిస్తూ పోలీసుల‌కు అడ్డంగా దొరికిపోయారు. ఈ ఘ‌ట‌న‌లో ముగ్గురు యువ‌కుల‌ను జూబ్లీహిల్స్ జోన్ టాస్క్‌ఫోర్స్ పోలీసులు అరెస్టు చేశారు. వీరి నుంచి రూ. 1,02,500 విలువైన హ్యాస్ ఆయిల్‌ను స్వాధీనం చేసుకున్నారు.

హైద‌రాబాద్ కిస్మ‌త్‌పూర్‌కు చెందిన శంక‌రుల్ల అఖిల్‌(30) ఆర్థిక ఇబ్బందుల‌తో స‌త‌మ‌త‌మ‌వుతున్నాడు. ఈ ఇబ్బందుల‌ను ఎలా అధిగ‌మించాల‌నే దానిపై దృష్టి సారించాడు. హైద‌రాబాద్ న‌గ‌రంలో హ్యాస్ ఆయిల్‌కు డిమాండ్ ఎక్కువ‌గా ఉంద‌ని గ్ర‌హించాడు. దీంతో ఆ మ‌త్తు ప‌దార్థంపై శోధించి విశాఖ‌ప‌ట్ట‌ణం వెళ్లాడు. ఇక అక్క‌డ్నుంచి అక్ర‌మంగా హ్యాస్ ఆయిల్‌ను త‌ర‌లిస్తూ న‌గ‌రంలో విక్ర‌యించ‌డం మొద‌లుపెట్టాడు.

ఈ క్ర‌మంలో ర‌హ‌మ‌త్‌న‌గ‌ర్‌కు చెందిన పోఖ్రేల్ సందీప్‌(25), వెంట‌క‌గిరి వాసి షేక్ అన్వ‌ర్(28) ప‌రిచ‌యం అయ్యారు. వీరితో పాటు మ‌రికొంద‌రికి హ్యాస్ ఆయిల్ విక్ర‌యిస్తూ లాభాల ఆర్జించాడు. దీంతో విలాస‌వంత‌మైన జీవితానికి అల‌వాటుప‌డ్డాడు.

అయితే హ్యాస్ ఆయిల్ విక్ర‌యిస్తున్న‌ట్లు టాస్క్ ఫోర్స్ పోలీసుల‌కు ప‌క్కా స‌మాచారం అందింది. దాంతో దాడులో నిర్వ‌హించి ఈ ముగ్గురిని అరెస్టు చేశారు. వారి నుంచి 45 సీసాల హ్యాస్ ఆయిల్ (ప్ర‌తి సీసా ప‌రిమాణం 5 మి.లీ.), సుమారు 185 గ్రాముల విడిగా ఉన్న హ్యాస్ ఆయిల్, మూడు మొబైల్స్ స్వాధీనం చేసుకున్నారు. వీటి విలువ రూ. 1,02,500 ఉంటుంద‌ని పోలీసులు తెలిపారు.

ఈ ఆపరేషన్ వెస్ట్ జోన్ టాస్క్ ఫోర్స్ ఇన్‌స్పెక్టర్ యదేందర్, జుబ్లీహిల్స్ జోన్ టాస్క్ ఫోర్స్ ఎస్ఐజీ సందీప్ రెడ్డి, వారి సిబ్బంది, జుబ్లీహిల్స్ పోలీసుల పర్యవేక్షణలో నిర్వహించబడింది.