Haleem | హ‌లీం ప్రియుల‌కు అల‌ర్ట్.. ఈసారి కొండెక్క‌నున్న హ‌లీం ధ‌ర‌లు..!

ప్లేట్ హ‌లీంపై రూ. 10 నుంచి రూ. 15కు పెంపు

Haleem | త్రినేత్ర‌.న్యూస్ : రంజాన్ ప‌ర్వ‌దినం నేప‌థ్యంలో హైద‌రాబాద్ న‌గ‌ర వ్యాప్తంగా గ‌ల్లీ గ‌ల్లీకో హ‌లీం బ‌ట్టి ద‌ర్శ‌న‌మిస్తోంది. హ‌లీం రుచిని చూసేందుకు హైద‌రాబాదీలు కూడా ఆత్రుత ప‌డుతున్నారు. ర‌క‌ర‌కాల హ‌లీంల‌ను ఆర‌గించి.. ఆ రుచిని ఆస్వాదించేందుకు ఆశ‌గా ఎదురుచూస్తున్నారు. అయితే హ‌లీం ధ‌ర‌లు ఈ సారి కొండెక్క‌నున్నాయ‌ని నిర్వాహ‌కులు పేర్కొంటున్నారు. అంటే భారీ మొత్తంలో ధ‌ర‌లు పెర‌గ‌న‌ప్ప‌ట‌కీ, కాస్త స్వ‌ల్పంగా పెరిగే అవ‌కాశం ఉంద‌ని చెబుతున్నారు.

గ‌తేడాది ప్లేట్ హ‌లీంను రూ. 250 నుంచి రూ. 280 వ‌ర‌కు విక్ర‌యించారు. అయితే ఈ ధ‌ర ఆయా రెస్టారెంట్ల‌లో కూడా వ్య‌త్యాసంగా ఉంది. పేరొందిన రెస్టారెంట్ల‌లో రూ. 300 దాకా కూడా విక్ర‌యించారు. ఈ ఏడాది ఈ ధ‌ర‌లు స్వ‌ల్పంగా పెరిగే అవ‌కాశం ఉంద‌ని, ఆయా రెస్టారెంట్ల మ‌ధ్య ధ‌ర‌ల తేడాల్లో వ్య‌త్యాసం ఉంటుంద‌ని నిర్వాహ‌కులు పేర్కొన్నారు. ఈసారి ఒక్కో ప్లేట్‌పై రూ. 10 నుంచి రూ. 15 వ‌ర‌కు ధ‌ర‌లు పెరిగే అవ‌కాశం ఉంది. మాంసం, నెయ్యి ధ‌ర‌లు కూడా ఆకాశాన్నాంటాయి. ఈ నేప‌థ్యంలోనే హ‌లీం ధ‌ర‌లు కూడా పెంచాల్సి వ‌స్తుంద‌న్నారు.

పిస్తా హౌజ్, షాగౌస్ రెస్టారెంట్, కేఫ్ 555, బ‌హార్ కేఫ్, స‌ర్వీ, మెహ్‌ఫీల్‌, మ‌దీనా హోట‌ల్‌, షాదాబ్ వంటి రెస్టారెంట్ల‌లో రుచిక‌ర‌మైన హ‌లీం ల‌భిస్తుంది. ఈ రెస్టారెంట్ల‌లో ప్లేట్ హ‌లీం ధ‌ర రూ. 300 వ‌ర‌కు ఉండొచ్చ‌ని నిర్వాహ‌కులు పేర్కొంటున్నారు. ఇక నాగారం, కీస‌ర‌, కుషాయిగూడ‌, అబ్దుల్లాపూర్‌మెట్‌, హ‌య‌త్‌న‌గ‌ర్‌, బొంగులూరు, తుర్కయాంజ‌ల్‌, కొంప‌ల్లి, నాన‌క్‌రాంగూడ‌, చందాన‌గ‌ర్ వంటి ఏరియాల్లో కొత్త అవుట్‌లెట్ల‌ను ఏర్పాటు చేస్తున్న‌ట్లు ఆయా రెస్టారెంట్ల నిర్వాహ‌కులు పేర్కొంటున్నారు.