Hyderabad | పెళ్లి సామాన్లు తీసుకొస్తూ.. మృత్యుఒడిలోకి తండ్రీకుమార్తె

Hyderabad | త్రినేత్ర‌.న్యూస్ : వారం రోజుల్లో పెళ్లి.. అంత‌లోనే మృత్యుఒడిలోకి చేరిపోయారు తండ్రీకుమార్తె. పెళ్లి సామాన్లు తీసుకుని ఇంటికి తిరిగి వ‌స్తుండ‌గా మైలార్‌దేవ్‌ప‌ల్లిలో ఈ విషాద ఘ‌ట‌న చోటు చేసుకుంది.

హైద‌రాబాద్ అత్తాపూర్‌కు చెందిన ఇస్మాయిల్(48) త‌న కుమార్తె బుష్రా బేగం(21) పెళ్లికి సిద్ధ‌మ‌య్యారు. మ‌రో వారం రోజుల్లోనే పెళ్లి. అయితే పెళ్లి సామాన్లు తీసుకొని ఇంటికి తిరిగి వ‌స్తున్న క్ర‌మంలో కాటేదాన్ రోడ్డులో వారి బైక్‌ను టిప్ప‌ర్ ఢీకొట్టింది. ఈ ప్ర‌మాదంలో అక్క‌డిక‌క్క‌డే తండ్రీకుమార్తె చ‌నిపోయారు. స‌మాచారం అందుకున్న పోలీసులు ఘ‌ట‌నాస్థ‌లానికి చేరుకుని మృత‌దేహాల‌ను స్వాధీనం చేసుకున్నారు. టిప్ప‌ర్ అతివేగంగా దూసుకురావ‌డం వ‌ల్లే ఈ ప్ర‌మాదం జ‌రిగిన‌ట్లు స్థానికులు తెలిపారు.

మరో వారం రోజుల్లో కూతురు పెళ్లి ఉండడంతో తండ్రి, కూతుళ్లు పెళ్లి పనుల్లో నిమ‌గ్న‌మ‌య్యారు. ఈ క్ర‌మంలో గురువారం పెళ్లి ప‌నుల నిమిత్తం టీవీఎస్ చాంప్ బైక్‌పై వెళ్తున్నారు. ఈ స‌మ‌యంలో హైయ‌త్‌న‌గ‌ర్ నుంచి అత్తాపూర్ వైపు కంక‌ర లోడుతో టిప్ప‌ర్ లారీ వెళ్తోంది. ఆరంఘ‌ర్‌కు రాగానే టిప్ప‌ర్ లారీ మితిమీరిన వేగంతో వెళ్లి బైక్‌ను ఢీకొట్టి కొంత దూరం వ‌ర‌కు ఈడ్చుకుంటూ వెళ్లింది. దీంతో తండ్రి కూతుళ్లు లారీ చ‌క్రాల కింద పడి న‌లిగిపోయారు. ప్ర‌మాద తీవ్ర‌త ఎక్కువ ఉండ‌డంతో స్పాట్‌లో ప్రాణాలు విడిచారు.

స‌మాచారం అందుకున్న పోలీసులు హుటాహుటిన సంఘటన స్థలానికి చేరుకున్నారు. మృతదేహాలను అతి కష్టం మీద లారీ చక్రాల కింద నుంచి బయటకు తీసి పోస్టుమార్టం నిమిత్తం ఉస్మానియా ఆసుపత్రికి తరలించారు. వారం రోజుల్లోనే పెండ్లి ఉండడంతో కుటుంబ సభ్యులు గుండెల‌విసేలా రోదిస్తున్నారు. పెళ్లి పీట‌లు ఎక్కాల్సిన యువ‌తి ఇలా అర్ధాంత‌రంగా చ‌నువు చాలించ‌డంతో అత్తాపూర్‌లో విషాద ఛాయ‌లు అలుముకున్నాయి.