CP Sajjanar | సైబర్ నేరాలపై సమరం.. పోలీసులతో ఇన్‌ఫ్లుయెన్సర్ల జత!

‘జాగృత్‌ హైదరాబాద్‌ - సురక్షిత్‌ హైదరాబాద్‌’ క్యాంపెయిన్‌లో సరికొత్త పంథా
షార్ట్ వీడియోలతో సైబర్ మోసాలపై వినూత్న అవగాహన
నవ్విస్తూనే కళ్లు తెరిపిస్తున్న కంటెంట్ క్రియేటర్లు
సామాజిక బాధ్యతగా ముందుకు రావాలని నగర సీపీ సజ్జనర్ పిలుపు

CP Sajjanar | త్రినేత్ర‌.న్యూస్ : సైబర్ నేరాలను సమర్థవంతంగా అరికట్టేందుకు హైదరాబాద్ సిటీ పోలీసులు సరికొత్త వ్యూహంతో ముందుకు వెళ్తున్నారు. కేవలం అధికారిక హెచ్చరికలకే పరిమితం కాకుండా, సామాన్యులకు సైతం సులువుగా అర్థమయ్యే రీతిలో సోషల్ మీడియా ఇన్‌ఫ్లుయెన్సర్ల ద్వారా విస్తృత అవగాహన కల్పిస్తున్నారు. హైదరాబాద్ నగర పోలీస్ కమిషనర్ సజ్జనర్ ఆధ్వర్యంలో విజయవంతంగా కొనసాగుతున్న ‘జాగృత్‌ హైదరాబాద్‌ - సురక్షిత్‌ హైదరాబాద్‌’ కార్యక్రమంలో భాగంగా చేపట్టిన ఈ నూతన విధానానికి విశేష స్పందన లభిస్తోంది.

పోలీసుల పిలుపు మేరకు పలువురు ప్రముఖ సోషల్ మీడియా ఇన్‌ఫ్లుయెన్సర్లు స్వచ్ఛందంగా ముందుకు వచ్చి, సైబర్ నేరాల తీరుతెన్నులను వివరిస్తూ తమదైన శైలిలో వీడియోలు రూపొందిస్తున్నారు. వీటిని హైదరాబాద్ సిటీ పోలీస్ క‌మిష‌న‌ర్ వీసీ సజ్జనర్, ఇన్‌స్టాగ్రామ్‌ ఖాతాలతో ‘కొలాబరేట్‌’ చేయడం ద్వారా లక్షలాది మందికి చేరువ చేస్తున్నారు. వినోదాత్మకంగా ఉంటూనే, అత్యంత కీలకమైన సైబర్ భద్రతా సూచనలను ఈ వీడియోలు ప్రజలకు అందిస్తున్నాయి.

ఆలోచింపజేస్తున్న వీడియోలు..

ఇన్‌ఫ్లుయెన్సర్లు ఇటీవల రూపొందించిన వీడియోలు ఎంతో వైవిధ్యంగా ఉండి నెటిజన్లను విశేషంగా ఆకట్టుకుంటున్నాయి.

లాటరీ మోసాలపై కళ్లు తెరిపిస్తూ:

"దేశీ మామ్ వర్సెస్ స్కామర్" కాన్సెప్ట్‌తో రూపొందిన వీడియో ప్రాక్టికల్‌గా ఆలోచింపజేస్తోంది. "మీకు రూ.25 లక్షల లాటరీ తగిలింది. ప్రాసెసింగ్ ఫీజు కోసం ఓటీపీ చెప్పండి" అంటూ వచ్చే ఫేక్ కాల్స్‌ను ఓ గృహిణి ఎంత చాకచక్యంగా తిప్పికొట్టిందనేది ఇందులో చూపించారు. అత్యాశకు పోకుండా, అపరిచితులతో బ్యాంక్ వివరాలు, ఓటీపీలు పంచుకోకూడదనే స్పష్టమైన సందేశాన్ని బలంగా వినిపించారు.

‘డిజిటల్ అరెస్ట్’పై కనువిప్పు:

ప్రస్తుతం తీవ్ర కలకలం రేపుతున్న ‘డిజిటల్ అరెస్ట్’ మోసాల గుట్టును మరో వీడియో ద్వారా విప్పారు. సైబర్ నేరగాళ్లు సీబీఐ, పోలీస్, ఆర్బీఐ అధికారులమంటూ నకిలీ యూనిఫామ్స్ ధరించి.. వీడియో కాల్స్ ద్వారా ఏ విధంగా భయభ్రాంతులకు గురిచేస్తారో కళ్లకు కట్టారు. "భారతదేశంలో ఏ ప్రభుత్వ దర్యాప్తు సంస్థా వీడియో కాల్ ద్వారా విచారణ చేయదు" అన్న వాస్తవాన్ని ప్రజలకు స్పష్టం చేశారు.

సైబర్ నేరగాళ్ల నుంచి ఫేక్ కాల్స్ వస్తే భయపడకుండా.. తక్షణమే 1930 టోల్ ఫ్రీ నెంబర్‌కు డయల్ చేయాలని లేదా cybercrime.gov.in పోర్టల్‌లో ఫిర్యాదు చేయాలని ఈ వీడియోల ద్వారా అవగాహన కల్పిస్తున్నారు. సామాన్యుల‌కు సైతం సులువుగా అర్థమయ్యేలా పోలీసులు, ఇన్‌ఫ్లుయెన్సర్లు సంయుక్తంగా చేస్తున్న ఈ ప్రయోగానికి నెటిజన్ల నుంచి అద్భుతమైన మద్దతు, ప్రశంసలు లభిస్తున్నాయి.

ఫాలోయింగ్‌ను సమాజ హితం కోసం వాడండి

సైబర్ నేరాల కట్టడికి మరింత మంది సోషల్ మీడియా ఇన్‌ఫ్లుయెన్సర్లు, కంటెంట్ క్రియేటర్లు ముందుకు రావాలని పోలీస్ కమిషనర్ సజ్జనర్ విజ్ఞప్తి చేశారు. "సామాజిక మాధ్యమాల్లో మీకు విశేషమైన ఫాలోయింగ్‌, గుర్తింపు ఉన్నాయి. దాన్ని సమాజ మార్పు కోసం వినియోగించండి. మీ మాటలకు ప్రజల ఆలోచనా విధానాన్ని మార్చే శక్తి ఉంది. సైబర్‌ నేరాలపై ప్రభావవంతమైన షార్ట్ వీడియోలు రూపొందించి మీ ప్లాట్‌ఫామ్స్ ద్వారా షేర్‌ చేయండి. సురక్షితమైన, చైతన్యవంతమైన సమాజ నిర్మాణం మనందరి ఉమ్మడి బాధ్యత," అని ఆయన పిలుపునిచ్చారు.