Air Gun Pellet | బాలుడి కంటిలో ఎయిర్ గ‌న్ పెల్లెట్.. విజ‌య‌వంతంగా తొలగించిన వైద్యులు

Air Gun Pellet | హైదరాబాద్ : ఓ మూడేండ్ల బాలుడి కంటిలో ఎయిర్ గన్ పెల్లెట్ ప్రత్యక్షమైంది. దీంతో బాధిత బాలుడు తీవ్ర ఇబ్బందులు పడ్డాడు. బాలుడి కంటిలో ఉన్న పెల్లెట్ను హైదరాబాద్ నగరంలోని శంకర కంటి ఆస్పత్రి వైద్యులు విజయవంతంగా తొలగించారు. కొద్ది రోజుల క్రితం బాధిత బాలుడు తన సోదరులతో కలిసి ఇంట్లో ఆడుకుంటున్నాడు. ఆ సమయంలో ఎయిర్ గన్ పెల్లెట్ ప్రమాదవశాత్తు బాలుడి ముక్కులో నుంచి కంటి వద్దకు చేరింది. దీంతో కంటిచూపు మందగించడంతో పాటు తీవ్ర ఇబ్బందులు పడ్డాడు. చేసేదేమీ లేక తల్లిదండ్రులు అతన్ని శంకర కంటి ఆస్పత్రికి తరలించారు. బాధితుడిని వైద్యులు పరిశీలించారు. యాంటీరియర్ ఆర్బిటోటమీ సర్జరీ నిర్వహించి పెల్లెట్ను విజయవంతంగా తొలగించారు. ఈ మెటాలిక్ పెల్లెట్ 7 నుంచి 8 మి.మీ. వ్యాసార్థంలో ఉన్నట్లు వైద్యులు తెలిపారు. శంకర ఐ హాస్పిటల్ క్యాటరాక్ట్ సర్జన్ డాక్టర్ శిరీష్ పొల్కంపల్లి ఆధ్వర్యంలో శస్త్ర చికిత్స నిర్వహించారు. చీఫ్ మెడికల్ ఆఫీసర్ డాక్టర్ శ్రీరామ్ సీమకుర్తి మాట్లాడుతూ.. ప్రస్తుతం బాలుడి ఆరోగ్య పరిస్థితి నిలకడగా ఉందని పేర్కొన్నారు. భవిష్యత్లో కంటి సమస్యలు వచ్చినా కూడా నివారించేలా చర్యలు తీసుకున్నామని తెలిపారు.