Uppal Sky Walk lift | ఉప్ప‌ల్ స్కైవాక్ లిఫ్ట్‌లో ఇరుక్కుపోయిన యువ‌కుడు.. అర్ధ‌రాత్రి 2 గంట‌ల పాటు న‌ర‌క‌యాత‌న‌

Uppal Sky Walk lift | త్రినేత్ర‌.న్యూస్ : ఓ 20 ఏళ్ల యువ‌కుడు ఉప్ప‌ల్ స్కైవాక్ లిఫ్ట్‌( Uppal Sky Walk lift )లో ఇరుక్కుపోయాడు. సుమారు 2 గంట‌ల పాటు లిఫ్ట్‌లోనే ఉండిపోయాడు. ఈ ఘ‌ట‌న గురువారం అర్ధ‌రాత్రి చోటు చేసుకుంది.

వివ‌రాల్లోకి వెళ్తే.. మ‌హ‌బూబ్‌న‌గ‌ర్ జిల్లాకు చెందిన రాహుల్(20) అనే యువ‌కుడు ఉప్ప‌ల్‌లోని ఓ ప్ర‌యివేటు హాస్ట‌ల్‌లో ఉంటున్నాడు. ఓ ప్ర‌యివేటు కంపెనీలో ఉద్యోగం చేస్తున్నాడు. అయితే త‌న విధులు ముగిశాక హాస్ట‌ల్‌కు చేరుకునేందుకు ఉప్ప‌ల్ స్కై వాక్ లిఫ్ట్ ఎక్కాడు. మ‌ధ్య‌లోనే లిఫ్ట్ ఆగిపోయింది. అప్పుడు స‌మ‌యం రాత్రి 11 గంట‌లు.

గ‌మ‌నించిన ప్ర‌యాణికులు, వాహ‌న‌దారులు పోలీసుల‌ను అప్ర‌మ‌త్తం చేశారు. ఘ‌టనాస్థ‌లానికి చేరుకున్న పోలీసులు ప‌రిస్థితిని స‌మీక్షించి, లిఫ్ట్ టెక్నిషీయ‌న్స్‌కు స‌మాచారం అందించారు. వారు వ‌చ్చి రెండు గంట‌ల పాటు శ్ర‌మించిన త‌ర్వాత లిఫ్ట్ డోర్లు తెరుచుకున్నాయి. అర్ధ‌రాత్రి 1.15 గంట‌ల‌కు రాహుల్ బ‌య‌ట‌కు వ‌చ్చాడు.

ప్రాణాల‌తో బ‌య‌ట‌ప‌డ్డ రాహుల్ మీడియాతో మాట్లాడుతూ.. లిఫ్ట్‌లో మ‌ధ్య‌లోనే ఆగిపోయేస‌రికి ప్రాణం పోయినంత ప‌నైంది. రెండు గంట‌ల పాటు లిఫ్ట్‌లోనే ఉండేస‌రికి తీవ్ర ఆందోళ‌న‌కు గుర‌య్యాను. త‌న ప్రాణాల‌ను కాపాడిన పోలీసుల‌కు, టెక్నిషీయ‌న్స్‌కు ప్ర‌త్యేక ధ‌న్య‌వాదాలు. ఇలాంటి ఘ‌ట‌న‌లు పున‌రావృతం కాకుండా చ‌ర్య‌లు తీసుకోవాల‌ని రాహుల్ చెప్పారు.