WhatsApp | వాట్సాప్‌లో షెడ్యూల్డ్ మెసేజ్‌లు.. ఐఫోన్ యూజర్లకు కొత్త ఫీచర్..

WhatsApp | ప్రపంచవ్యాప్తంగా కోట్లాది మంది ఉపయోగిస్తున్న వాట్సాప్ త్వరలో ఐఫోన్ యూజర్ల కోసం ఎంతో ఉపయోగకరమైన కొత్త ఫీచర్‌ను తీసుకురావడానికి సిద్ధమవుతోంది. ప్రస్తుతం అభివృద్ధి దశలో ఉన్న ఈ ఫీచర్ ద్వారా యూజర్లు మెసేజ్‌లను వెంటనే పంపకుండా, తమకు నచ్చిన తే, సమయానికి ఆటోమేటిక్‌గా పంపేలా షెడ్యూల్ చేసుకునే అవకాశం పొందనున్నారు. ఫీచర్ ట్రాకర్ డబ్ల్యూఏబీటాఇన్ఫో వెల్లడించిన వివరాల ప్రకారం, ఈ షెడ్యూల్డ్ మెసేజింగ్ ఫీచర్ వ్యక్తిగత చాట్‌లతోపాటు గ్రూప్ చాట్‌లలో కూడా పనిచేయనుంది. యూజర్లు ముందుగానే మెసేజ్ టైప్ చేసి, అది ఎప్పుడు పంపాలనుకుంటున్నారో సమయాన్ని ఎంపిక చేసుకోవచ్చు. నిర్ణయించిన సమయం రాగానే వాట్సాప్ ఆ మెసేజ్‌ను ఆటోమేటిక్‌గా పంపుతుంది. అయితే ప్రస్తుతం ఈ ఫీచర్ ఇంకా అభివృద్ధి దశలోనే ఉంది. ఇంకా టెస్ట్‌ఫ్లైట్ బీటా యూజర్లకు కూడా అందుబాటులోకి రాలేదు. ఫీచర్ ఎప్పుడు విడుదల అవుతుందనే విషయంపై వాట్సాప్ అధికారికంగా ఎలాంటి ప్రకటన చేయలేదు. అయితే బీటా టెస్టింగ్ అనంతరం సాధారణ యూజర్లకు అందుబాటులోకి వచ్చే అవకాశం ఉందని సమాచారం.

ఎలా పంప‌వ‌చ్చు..?

చాట్‌లోని సెండ్ బటన్‌ను కొద్దిసేపు నొక్కి ఉంచడం ద్వారా షెడ్యూలింగ్ ఆప్షన్ కనిపించే అవకాశం ఉంటుంది. అక్కడ యూజర్లు పంపాల్సిన సమయాన్ని ఎంపిక చేస్తే, ఆ మెసేజ్ క్యూ‌లో చేరి నిర్ణీత సమయంలో మెసేజ్ సెండ్ చేయ‌బ‌డుతుంది. అంతేకాకుండా, షెడ్యూల్ చేసిన మెసేజ్‌ల నిర్వహణ కోసం ప్రత్యేక సెక్షన్‌ను కూడా వాట్సాప్ అభివృద్ధి చేస్తున్నట్లు తెలుస్తోంది. ఈ విభాగంలో ఇంకా పంపని పెండింగ్ మెసేజ్‌లు కనిపిస్తాయి. అలాగే చాట్‌లలో కూడా మెసేజ్ షెడ్యూల్ చేయబడిందని సూచించే ప్రత్యేక ఇండికేటర్లు ఉండే అవకాశం ఉంది. యూజర్లు షెడ్యూల్ చేసిన మెసేజ్‌ను పంపే ముందు తొలగించే అవకాశం కూడా పొందనున్నారు. ముఖ్యంగా, మెసేజ్‌ను రద్దు చేసిన విషయం గ్రహీతలకు ఎలాంటి నోటిఫికేషన్ రూపంలోనూ తెలియదు. గ్రూప్ చాట్‌ల విషయంలో కూడా కొన్ని పరిమితులు ఉండనున్నాయి. ఒక మెసేజ్ ను షెడ్యూల్ చేసిన సమయంలో గ్రూప్‌లో ఉన్న సభ్యులకు మాత్రమే అది పంపబడుతుంది. తర్వాత గ్రూప్‌లో చేరిన సభ్యులకు ఆ షెడ్యూల్ చేసిన పాత మెసేజ్‌లు అందవు.

ఎంత ముందుగా షెడ్యూల్ చేయ‌వ‌చ్చు..?

మెసేజ్‌లను ఎంత ముందుగా షెడ్యూల్ చేయవచ్చన్న అంశంపైనా వాట్సాప్ పని చేస్తోంది. ప్రస్తుతం ఉన్న అభివృద్ధి సమాచారం ప్రకారం, మెసేజ్ సృష్టించిన 10 నిమిషాల తర్వాత నుంచి గరిష్ఠంగా రెండు వారాల ముందువరకు షెడ్యూల్ చేసే అవకాశం క‌ల్పించ‌నున్నారు. మొదట ఈ ఫీచర్‌ను వ్యక్తిగత చాట్‌ల కోసం మాత్రమే రూపొందిస్తున్నట్లు సమాచారం వచ్చినప్పటికీ, గ్రూప్ చాట్‌లకు కూడా మద్దతు విస్తరిస్తున్నట్లు తెలుస్తోంది. దీంతో యూజర్ అనుభవాన్ని మరింత మెరుగుపర్చే ప్రయత్నం జరుగుతోంది. పుట్టినరోజు శుభాకాంక్షలు, ముఖ్యమైన రిమైండర్లు, ప్రకటనలు, కార్యాలయ సందేశాలు వంటి సమయానికి పంపాల్సిన మెసేజ్‌ల కోసం ఈ ఫీచర్ ఎంతో ఉపయోగపడే అవకాశం ఉంది. అలాగే వేర్వేరు టైమ్ జోన్‌లలో ఉన్న వ్యక్తులతో కమ్యూనికేషన్ చేయడంలో కూడా ఇది సహాయపడుతుంది. ప్రస్తుతం వాట్సాప్ ఈవెంట్స్ ఫీచర్ ద్వారా కాల్‌లను షెడ్యూల్ చేసే సదుపాయం ఉన్నప్పటికీ, టెక్స్ట్ మెసేజ్‌ల కోసం అంతర్నిర్మిత షెడ్యూలింగ్ ఆప్షన్‌ను ఇప్పటివరకు అందించలేదు.