Hash Oil | హైద‌రాబాద్‌లో 14.2 కిలోల హాషిష్ ఆయిల్ స్వాధీనం

Hash Oil | త్రినేత్ర‌.న్యూస్ : హైద‌రాబాద్ న‌గ‌రంలో భారీగా హాషిష్ ఆయిల్ ప‌ట్టుబ‌డింది. ఎల్‌బీన‌గ‌ర్ ఎస్‌వోటీ, నాగోల్ పోలీసులు చేప‌ట్టిన సంయుక్త ఆప‌రేష‌న్‌లో 14.2 కిలోల హాషిష్ ఆయిల్ స్వాధీనం చేసుకున్న‌ట్లు పోలీసులు తెలిపారు. ప‌ట్టుబ‌డ్డ ఆయిల్ విలువ సుమారు రూ. 1.75 కోట్లు ఉంటుంద‌ని పేర్కొన్నారు.

నిందితులు త‌ల్లే నాగ‌రాజు(30), నాగుల నారాయ‌ణ అలియాస్ కిర‌ణ్‌(39) క‌లిసి ఈనెల 21న గౌరెల్లి ఎక్స్ రోడ్ మీదుగా బైక్‌పై వెళ్తుండ‌గా పోలీసులు ప‌ట్టుకున్నారు. వాహ‌నాన్ని త‌నిఖీ చేయ‌గా.. మొత్తం 14 ప్యాకెట్ల‌లో 14.2 కిలోల హాషిష్ ఆయిల్‌ను స్వాధీనం చేసుకున్నారు. నిందితుల నుంచి రెండు సెల్‌ఫోన్లు, య‌మ‌హా ఎంటీ -15 బైక్, రూ. 2500 న‌గ‌దు స్వాధీనం చేసుకున్నారు. వీరిద్ద‌రూ కూడా అల్లూరి సీతారామ‌రాజు జిల్లాకు చెందిన వార‌ని, గ‌తంలోనూ గంజాయి కేసుల్లో ప‌ట్టుబ‌డ్డార‌ని తెలిపారు. ఒడిశాకు చెందిన స‌ర‌ఫ‌రాదారు త‌మ‌రా గోపాల్ ప‌రారీలో ఉన్న‌ట్లు స‌మాచారం.

అయితే హైద‌రాబాద్‌లో డ్ర‌గ్స్ డెలివ‌రీ చేయ‌డానికి ఒక్కొక్క‌రికి రూ. ల‌క్ష చొప్పున ఇస్తామ‌ని ఒప్పందం చేసుకున్న‌ట్లు విచార‌ణ‌లో తేలింది. నిందితుల‌పై నాగోల్ పోలీసు స్టేష‌న్‌లో ఎన్డీపీఎస్ యాక్ట్ కింద కేసు న‌మోదు చేశామ‌న్నారు.