Cool Drinks | వేస‌విలో చ‌ల్ల‌ద‌నం కోసం సోడాలు, కూల్‌డ్రింక్స్ అధికంగా తాగుతున్నారా..? అయితే జాగ్ర‌త్త‌.. వైద్యుల హెచ్చ‌రిక‌..

Cool Drinks | వేస‌వికాలంలో చల్లని పానీయాల‌ను తాగితే వెంటనే ఉపశమనం లభించిన భావన కలుగుతుంది. అయితే అవి నిజంగా దాహాన్ని తీర్చుతున్నాయా? లేక శరీరానికి మరింత హాని చేస్తున్నాయా? అనే అంశంపై వైద్య నిపుణులు త‌మ అభిప్రాయాలను వెల్ల‌డిస్తున్నారు. ముఖ్యంగా కూల్‌ డ్రింక్స్, చల్లని సోడాలు, అధిక చక్కెర కలిగిన పానీయాలు దాహాన్ని తాత్కాలికంగా తగ్గించినా, అసలు సమస్యను దాచిపెడతాయని వైద్యులు హెచ్చరిస్తున్నారు. డాక్టర్ సుచిస్మిత రాజమణ్య తెలిపిన ప్రకారం, చల్లని పానీయాలు గొంతును చల్లబరచడం వల్ల దాహం తగ్గిన భావన కలుగుతుంది. కానీ అది శరీరం పూర్తిగా హైడ్రేట్ అయిందని అర్థం కాదన్నారు. ఈ చల్లదనం మెదడుకు తాత్కాలిక సిగ్నల్ పంపి దాహం తగ్గినట్లు భావింపజేస్తుందని చెప్పారు. ఫలితంగా శరీరానికి ఇంకా నీటి అవసరం ఉన్నప్పటికీ అదనంగా నీరు తాగకుండా ఉండే ప్రమాదం ఉంటుందని వివరించారు. ముఖ్యంగా వేసవిలో ఇది మరింత ప్రమాదకరమని పేర్కొన్నారు.

డయాబెటిస్‌, ఫ్యాటీ లివ‌ర్ వ‌చ్చే ప్ర‌మాదం..

అసలు సమస్య పానీయాల ఉష్ణోగ్రతలో కాకుండా వాటి పదార్థాలలో ఉంద‌ని ఆమె తెలిపారు. అధిక చక్కెర, కార్బొనేషన్, కెఫీన్ కలిగిన కూల్‌ డ్రింక్స్ శరీరంలో దాహాన్ని గుర్తించే విధానాన్ని ప్రభావితం చేస్తాయని చెప్పారు. ఈ పానీయాలు తాగిన తర్వాత కొంతసేపు సంతృప్తి కలిగించినా, రోజంతా సరిపడా నీరు తీసుకునే అలవాటును తగ్గిస్తాయని హెచ్చరించారు. చల్లని సాఫ్ట్ డ్రింక్స్‌లో అధిక ఫ్రక్టోజ్, చక్కెర ఉండటం వల్ల ఇన్సులిన్ రెసిస్టెన్స్, టైప్-2 డయాబెటిస్, ఫ్యాటీ లివర్ వంటి సమస్యల ప్రమాదం పెరుగుతుందని అన్నారు. అలాగే వీటిలోని ఫాస్ఫారిక్, కార్బోనిక్ యాసిడ్లు దంతాల ఎనామెల్‌ను దెబ్బతీసి క్యావిటీలకు కారణమవుతాయని తెలిపారు. ఎముకలలో కాల్షియం శోషణను కూడా ప్రభావితం చేసే అవకాశం ఉందని అన్నారు.

అధిక కెఫీన్‌తో మాన‌సిక స‌మ‌స్య‌లు..

కూల్‌ డ్రింక్స్‌లో ఉండే ఎంప్టీ కేలరీల‌ను కూడా ప్రధాన సమస్యగా చెప్పారు. ఇవి శరీరానికి అవసరమైన పోషకాలు ఇవ్వకుండా అదనపు కేలరీలను మాత్రమే అందిస్తాయి. లిక్విడ్ కేలరీలు తీసుకున్న‌ భావనను కలిగించకపోవడంతో మొత్తం కేలరీ వినియోగం పెరిగి ఊబకాయం, గుండె సంబంధిత వ్యాధుల ప్రమాదం పెరుగుతుందని చెప్పారు. చాలా సాఫ్ట్ డ్రింక్స్‌లో కెఫీన్ ఉండటం వల్ల గుండె వేగం పెరగడం, ఆందోళన, నిద్రలేమి వంటి సమస్యలు కూడా తలెత్తుతాయ‌ని హెచ్చరించారు. ముఖ్యంగా రోజంతా నీటికి బదులు సోడాలు, చల్లని కాఫీలు, ఎనర్జీ డ్రింక్స్ తీసుకోవడం వల్ల శరీరంలో నీటి సమతుల్యత దెబ్బతింటుందని అన్నారు. ఎండ నుంచి ఇంటికి వచ్చిన వెంటనే ఐస్ కోల్డ్ వాటర్ లేదా చల్లని డ్రింక్స్ తాగడం వ‌ల్ల శరీరానికి ఒక్కసారిగా టెంపరేచర్ షాక్ త‌గులుతుంద‌ని హెచ్చ‌రించారు.

ఈ పానీయాలు మేలు..

శరీరం వేడిని తగ్గించే ప్రక్రియలో ఉన్న సమయంలో అత్యంత చల్లని నీరు తాగితే రక్త ప్రసరణ, నాడీ మండ‌ల వ్య‌వ‌స్థ‌పై ప్రభావం పడుతుంద‌ని అన్నారు. కొందరిలో తల తిరగడం, ఛాతిలో ప‌ట్టేసిన‌ట్లు ఉండ‌డం, బ్రెయిన్ ఫ్రీజ్ లాంటి లక్షణాలు క‌నిపిస్తాయ‌ని పేర్కొన్నారు. హైడ్రేషన్ కోసం కేవలం చల్లని పానీయాలపై ఆధారపడకుండా సాధారణ నీరు, కొబ్బరి నీరు, మజ్జిగ, పండ్లరసాలు వంటి సహజ పానీయాలను తీసుకోవాలని సూచించారు. రోజంతా కొద్దికొద్దిగా నీరు తాగడం, ఎలక్ట్రోలైట్స్ ఉన్న ఆహారం తీసుకోవడం ద్వారా శరీరానికి సరైన హైడ్రేషన్ లభిస్తుందని పేర్కొన్నారు.