High Court | పార్టీ ఫిరాయింపుల కేసు.. దానంకు హైకోర్టు నోటీసులు

త్రినేత్ర‌.న్యూస్‌: పార్టీ ఫిరాయింపు (Party defection) ఆరోప‌ణ‌లు ఎదుర్కొంటున్న ఖైర‌తాబాద్ ఎమ్మెల్యే దానం నాగేంద‌ర్‌కు హైకోర్టు (High Court) నోటీసులు (Notices) జారీ చేసింది. దానం పార్టీ మార‌లేద‌ని, ఇందుకు ఆధారాలు లేవ‌ని స్పీక‌ర్ త‌న నిర్ణ‌యాన్ని వెల్ల‌డించ‌గా దీన్ని స‌వాల్ చేస్తూ బీజేపీ ఎమ్మెల్యే, శాస‌న‌స‌భా ప‌క్ష నేత‌ ఏలేటి మ‌హేశ్వ‌ర్‌రెడ్డి హైకోర్టులో పిటిష‌న్ దాఖ‌లు చేసిన విష‌యం తెలిసిందే. కర్ణాటక, బీహార్‌లో ఇలాంటి పిటిషన్లపై సుప్రీంకోర్టు ఇచ్చిన తీర్పులను ఆయన కోర్టులో ప్రస్తావించారు. స్పీక‌ర్ తీర్పును కొట్టివేయాల‌ని ఆయ‌న అందులో కోరారు.

ఈ పిటిష‌న్‌పై హైకోర్టు సోమ‌వారం విచార‌ణ చేప‌ట్టింది. నాలుగు వారాల్లో వివ‌ర‌ణ ఇవ్వాల‌ని దానం నాగేంద‌ర్‌తో పాటు అసెంబ్లీ కార్య‌ద‌ర్శికి నోటీసులు పంపింది. త‌దుప‌రి విచార‌ణ‌ను వ‌చ్చే నెల 16వ తేదీకి వాయిదా వేసింది.

మ‌రో ఏడు రిట్ పిటిష‌న్లు దాఖ‌లు..

ఇదిలా ఉండ‌గా పార్టీ ఫిరాయింపు ఎమ్మెల్యేలపై సోమ‌వారం హైకోర్టులో ఏడు రిట్ పిటిష‌న్లు దాఖ‌ల‌య్యాయి. దానం నాగేంద‌ర్‌, తెల్లం వెంక‌ట్రావు, బండ్ల కృష్ణమోహ‌న్ రెడ్డి, ప్ర‌కాశ్‌గౌడ్‌, అరికెపూడి గాంధీ, కాలే యాద‌య్య‌, పోచారం శ్రీ‌నివాస్‌రెడ్డిల‌పై దాఖ‌లైన ఈ పిటిష‌న్ల విచార‌ణ రేపు త్రిస‌భ్య ధ‌ర్మాస‌నం ముందుకు వ‌చ్చే అవ‌కాశం ఉంది.