Vijay Deverakonda | లైంగిక దాడితో స‌మానం …జాన్వీక‌పూర్ డీప్‌ఫేక్ వీడియోపై విజ‌య్ దేవ‌ర‌కొండ రియాక్ష‌న్‌

Vijay Deverakonda |  ఎన్టీఆర్ హీరోగా నటించిన దేవర సినిమాలోని చుట్టమల్లే పాటను ఆర్టిఫీషియ‌ల్ ఇంటెలిజెన్స్ తో మహిళల్ని కించపరిచేలా రూపొందించిన ఘటన టాలీవుడ్ వ‌ర్గాల‌ను దిగ్భ్రాంతికి గురిచేస్తోంది. ఈ ఘటనపై హీరో ఎన్టీఆర్ తీవ్ర ఆగ్ర‌హం వ్యక్తం చేశారు. నీచుల‌ను వ‌దిలిపెట్టేది లేదంటూ వార్నింగ్ ఇచ్చారు. మ‌హిళ‌ల‌ను దేవ‌త‌లుగా పూజించే మ‌నం స‌మాజంలో అమ్మాయిని కించ‌ప‌రిచేలా ఇలాంటి ప‌నులు చేయ‌డం సిగ్గుచేటు అంటూ సోష‌ల్ మీడియాలో పోస్ట్ పెట్టారు. ఈ డీప్ ఫేక్ ఉదంతంపై ఎన్టీఆర్‌కు మద్ధతుగా నిలిచారు విజయ్ దేవరకొండ. మానవీయ విలువల్లో మనం పూర్తిగా దిగజారిపోతున్నామంటూ సోష‌ల్ మీడియాలో ఓ పోస్ట్ పెట్టాడు.

దిగజారిపోతున్నాం...

ఈ మార్ఫింగ్ వీడియోపై విజయ్ దేవరకొండ స్పందిస్తూ - "విలువల పరంగా మనం నీచమైన స్థాయికి దిగజారిపోతున్నాం. ఈ ఘటనకు బాధ్యులైన వారిని వదిలిపెట్టకూడదు. చట్టపరంగా కఠినంగా శిక్షించాలి. మరొకరు ఇలాంటి తప్పు చేయకుండా గుణపాఠం నేర్పాలి. పిల్లల్ని ఎలా పెంచుతున్నాం, మనం ఎలాంటి సమాజంలో జీవిస్తున్నామనే సందేహాన్ని ఈ ఉదంతం క‌లిగిస్తోంది. మరొకరిని బాధపెట్టడంలో సంతోషాన్ని వెతుక్కునేలా మారిపోవడం బాధాకరం. ఏఐ వల్ల ఉద్యోగాలు పోతున్నాయ‌ని ప్రపంచమంతా భయపడుతుంటే మరోవైపు ఆ సాంకేతిక పరిజ్ఞానాన్ని కొందరు ఇలాంటి తప్పుడు పనులకు ఉపయోగించుకుంటున్నారు. డిజిటల్ వేదికలపై జరిగినా దీనిని లైంగిక దాడితో సమానంగా పరిగణించాలి. చట్టప్రకారం ఈ వీడియోల‌ను క్రియేట్ చేసిన వారిని తీవ్రంగా శిక్షించాలి. ఈ ఘటనను వ్యతిరేకిస్తున్న ప్రతి ఒక్కరికీ నా పూర్తి మద్దతు ఉంటుంది" అని విజ‌య్ దేవ‌ర‌కొండ త‌న ట్వీట్‌లో పేర్కొన్నారు.