Sowcar Janaki | దిగ్గ‌జ న‌టి షావుకారు జాన‌కి క‌న్నుమూత – రెండు వంద‌ల తెలుగు సినిమాల్లో హీరోయిన్‌గా!

Sowcar Janaki |అల‌నాటి దిగ్గ‌జ న‌టి షావుకారు జాన‌కి శుక్ర‌వారం క‌న్నుమూశారు. గ‌త కొంత కాలంగా శ్వాస‌కోశ‌, వృద్ధాప్య సంబంధిత స‌మ‌స్య‌ల‌తో బాధ‌ప‌డుతోన్న ఆమె చెన్నైలోని ఓ ప్రైవేటు ఆసుప‌త్రిలో చికిత్స పొందుతూ తుది శ్వాస విడిచారు. 1950 -60 ద‌శ‌కంలో టాలీవుడ్‌లో నంబ‌ర్ వ‌న్‌ హీరోయిన్ల‌లో ఒకరిగా షావుకారు జాన‌కి పేరు తెచ్చుకున్నారు. 1950లో రూపొందిన షావుకారు పెద్ద హిట్ట‌వ్వ‌డంతో ఆ సినిమా పేరే జాన‌కి ఇంటిపేరుగా మారింది.

ర‌క్షా రేఖ‌తో...

జాన‌కి అస‌లు పేరు టేకుమ‌ళ్ల జాన‌కి. ఆంధ్ర‌ప్ర‌దేశ్‌లోని రాజ‌మండ్రిలో 1931 డిసెంబ‌ర్ 12న జ‌న్మించారు జాన‌కి. 1949లో వ‌చ్చిన ర‌క్షా రేఖ సినిమాతో జాన‌కి సినీ ప్ర‌యాణం మొద‌లైంది. ఎన్టీఆర్‌ హీరోగా ఎల్‌వీ ప్ర‌సాద్ ద‌ర్శ‌క‌త్వంలో రూపొందిన షావుకారు సినిమాలో జాన‌కి హీరోయిన్‌గా న‌టించారు. సుబ్బులు పాత్ర‌లో విల‌క్ష‌ణ న‌ట‌న‌తో తెలుగు ప్రేక్ష‌కుల‌ను మెప్పించింది. ఈ సినిమా పెద్ద హిట్ట‌వ్వ‌డంతో జాన‌కి ఇంటిపేరు షావుకారుగా మారిపోయింది.

హీరోయిన్‌గా....

క‌న్యాదానం, వ‌ద్దంటే పెళ్లి, జ‌యం మ‌న‌దే, పాండురంగ మ‌హ‌త్యం, భాగ్య‌రేఖ‌, రేచుక్క ప‌గ‌టిచుక్క‌, డాక్ట‌ర్ చ‌క్ర‌వ‌ర్తితో పాటు ప‌లు సూప‌ర్ హిట్ సినిమాల్లో హీరోయిన్‌గా న‌టించింది. ఓ వైపు క‌థానాయిక‌గా క‌నిపిస్తూనే క్యారెక్ట‌ర్ ఆర్టిస్ట్‌గా కీల‌క పాత్ర‌లు చేసింది. గీతాంజ‌లి, దేవి, శుభాకాంక్ష‌లు, రంగూన్ రౌడీతో పాటు ప‌లు సినిమాల్లో బామ్మ పాత్ర‌ల‌తో మెప్పించింది. చివ‌ర‌గా తెలుగులో అన్నీ మంచి శ‌కున‌ములే సినిమా చేసింది షావుకారు జాన‌కి.

నాలుగు వంద‌ల సినిమాలు...

ఏడు ప‌దుల సుదీర్ఘ సినీ ప్ర‌యాణంలో తెలుగుతో పాటు త‌మిళం, మ‌ల‌యాలం, హిందీ భాష‌ల్లో క‌లిపి నాలుగు వంద‌ల‌కుపైగా సినిమాలు చేశారు షావుకారు జాన‌కి. ఇందులో రెండు వంద‌ల‌కుపైగా సినిమాల్లో హీరోయిన్‌గా క‌నిపించింది. ఎన్టీఆర్‌, ఏఎన్నార్, ఎంజీఆర్ మొద‌లుకొని నేటిత‌రం అగ్ర హీరోలు చిరంజీవి, నాగార్జున‌, వెంక‌టేష్ వ‌ర‌కు అగ్ర హీరోలంద‌రితో క‌లిసి న‌టించింది. సంసారం ఒక చ‌ద‌రంగం సినిమాకుగాను ఉత్త‌మ స‌హాయ‌న‌టిగా నంది అవార్డును అందుకున్నారు జాన‌కి.

తొంభై ఏళ్ల వ‌య‌సులో ప‌ద్మ‌శ్రీ....

షావుకారు జాన‌కి చెల్లెలు కృష్ణ‌కుమారి కూడా తెలుగులో హీరోయిన్‌గా మంచి పేరు తెచ్చుకుంది. సినిమాల్లోకి హీరోయిన్‌గా ఎంట్రీ ఇచ్చే నాటికే షావుకారు జాన‌కికి పెళ్ల‌య్యింది. ప‌దిహేనేళ్ల వ‌య‌సులో ఉన్న‌ప్పుడే శంక‌ర‌మంచి శ్రీనివాస‌రావుతో పెళ్లి చేసుకుంది. ఆర్థిక ఇబ్బందుల కార‌ణంగా సినిమా ఇండ‌స్ట్రీలోకి అడుగుపెట్టింది.

సినీ రంగానికి చేసిన సేవ‌ల‌కు గాను జాన‌కికి కేంద్ర ప్ర‌భుత్వం 2022లో ప‌ద్మ‌శ్రీ పుర‌స్కారం ప్ర‌క‌టించింది. తొంభై ఏళ్ల వ‌య‌సులో ప‌ద్మ‌శ్రీ ఆమెను వ‌రించింది. ప‌ద్మ‌శ్రీతో పాటు క‌ర్ణాట‌క ప్ర‌భుత్వం నుంచి రాజ్యోత్స‌వ అవార్డు, త‌మిళ‌నాడు నుంచి క‌లైమామ‌ణితో పాటు ఎన్నో అత్యున్న‌త పుర‌స్కారాల‌ను అందుకున్నారు జాన‌కి.