Senior Citizen Savings Scheme | పోస్టాఫీస్ ప‌థ‌కం.. నెల‌కు రూ.20వేల ఆదాయం ఇలా..

Senior Citizen Savings Scheme | రిటైర్మెంట్ తర్వాత ప్రతి ఒక్కరి ప్రధాన ఆందోళన సురక్షితమైన, క్రమమైన ఆదాయం. స్టాక్ మార్కెట్ హెచ్చుతగ్గులకు దూరంగా, ఎలాంటి రిస్క్ లేకుండా గ్యారంటీ రాబడిని కోరుకునే వారికి పోస్టాఫీస్ సీనియర్ సిటిజన్ సేవింగ్స్ స్కీమ్ ఒక మంచి ఎంపిక. కేంద్ర ప్రభుత్వం నిర్వహించే ఈ పథకంలో సీనియర్ సిటిజన్ల పెట్టుబడికి భద్రతతోపాటు ఇతర పొదుపు పథకాలతో పోలిస్తే అధిక వడ్డీ కూడా లభిస్తుంది. సీనియర్ సిటిజన్ల కోసం ప్రత్యేకంగా రూపొందించిన ప్రభుత్వ పొదుపు పథకమే సీనియర్ సిటిజన్ సేవింగ్స్ స్కీమ్. 60 ఏళ్లు లేదా అంతకంటే ఎక్కువ వయసు ఉన్నవారు ఇందులో పెట్టుబడి పెట్టవచ్చు. స్వచ్ఛంద పదవీ విరమణ తీసుకున్న వారు 55 ఏళ్ల వయసు తర్వాత కూడా ఈ పథకంలో పెట్టుబడి పెట్టే అవకాశం ఉంటుంది.

నెల‌కు రూ.20వేలు ఇలా..

ఈ పథకంలో ఒక సీనియర్ సిటిజన్ గరిష్ఠంగా రూ.30 లక్షల వరకు పెట్టుబడి పెట్టవచ్చు. పథకం మెచ్యూరిటీ కాలం ఐదేళ్లు. మెచ్యూరిటీ పూర్తయిన తర్వాత మరో మూడేళ్ల పాటు పొడిగించుకునే అవకాశం ఉంటుంది. ప్రస్తుతం సీనియర్ సిటిజన్ సేవింగ్స్ స్కీమ్‌పై ప్రభుత్వం సంవత్సరానికి 8.2 శాతం గ్యారంటీ వడ్డీని అందిస్తోంది. ఈ పథకంలో వడ్డీని ప్రతి మూడు నెలలకు ఒకసారి అంటే త్రైమాసిక ప్రాతిపదికన నేరుగా పెట్టుబడిదారుడి బ్యాంక్ ఖాతాలో జమ చేస్తారు. గరిష్ఠంగా రూ.30 లక్షలను ఒకేసారి పెట్టుబడి పెడితే, సంవత్సరానికి 8.2 శాతం వడ్డీ ప్రకారం ఏడాదిలో మొత్తం రూ.2.46 ల‌క్ష‌ల వడ్డీ వస్తుంది. అంటే ప్రతి మూడు నెలలకు రూ.61,500 చొప్పున వడ్డీ లభిస్తుంది. నెలవారీగా లెక్కిస్తే సగటున రూ.20,500 ఆదాయం వచ్చినట్లవుతుంది. ఐదేళ్ల మొత్తం కాలంలో రూ.12.30 ల‌క్ష‌ల‌ వడ్డీ ఆదాయం లభిస్తుంది.

వ‌డ్డీ లెక్కింపు ఎలా ఉంటుంది..

ఈ పథకం నిబంధనల ప్రకారం వడ్డీని ప్రతి మూడు నెలలకు ఒకసారి, అంటే ఏప్రిల్ 1, జూలై 1, అక్టోబర్ 1, జనవరి 1 తేదీల్లో చెల్లిస్తారు. కాబట్టి నెలకు రూ.20,500 అంటే వాస్తవంగా ప్రతి నెల ఖాతాలో జమ అయ్యే మొత్తం కాదు. ప్రతి త్రైమాసికంలో వచ్చే రూ.61,500ను నెలవారీ సగటుగా విభజిస్తే రూ.20,500 అవుతుంది. సీనియర్ సిటిజన్ సేవింగ్స్ స్కీమ్‌లో పెట్టుబడి పెట్టిన మొత్తానికి ఆదాయపు పన్ను చట్టంలోని సెక్షన్ 80సి కింద సంవత్సరానికి రూ.1.50 లక్షల వరకు పన్ను మినహాయింపు ప్రయోజనం లభిస్తుంది. ఇది భారత ప్రభుత్వ పథకం కావడంతో ఇందులో పెట్టిన అసలు పెట్టుబడికి, అందుకునే వడ్డీకి ప్రభుత్వ పథకం అందించే భద్రత ఉంటుంది. అత్యవసర పరిస్థితుల్లో డబ్బు అవసరమైతే, ఖాతాను ఒక సంవత్సరం పూర్తయిన తర్వాత ముందుగానే మూసివేసే అవకాశం కూడా ఉంటుంది. అయితే నిబంధనల ప్రకారం ఇందుకు పెనాల్టీ చెల్లించాల్సి ఉంటుంది.

ఎలా పెట్టుబ‌డి పెట్టాలి..

సీనియర్ సిటిజన్ సేవింగ్స్ స్కీమ్ ఖాతాను సమీపంలోని పోస్టాఫీస్ లేదా అధీకృత ప్రభుత్వ, ప్రైవేట్ బ్యాంకులో తెరవవచ్చు. ఇందుకోసం ఆధార్ కార్డు, పాన్ కార్డు వంటి గుర్తింపు పత్రాలు, వయసు ధ్రువీకరణ పత్రం, పాస్‌పోర్ట్ సైజు ఫొటో అవసరం. రూ.1 లక్షకు మించిన మొత్తాన్ని పెట్టుబడి పెట్టాలంటే చెక్ లేదా డిమాండ్ డ్రాఫ్ట్ ద్వారా మాత్రమే చెల్లింపు చేయాల్సి ఉంటుంది. రిటైర్మెంట్ తర్వాత మార్కెట్ రిస్క్ లేకుండా స్థిరమైన, గ్యారంటీ ఆదాయం కోరుకునే వారికి రూ.30 లక్షలను సీనియర్ సిటిజన్ సేవింగ్స్ స్కీమ్‌లో పెట్టుబడి పెట్టడం ఒక ఆకర్షణీయమైన ఎంపికగా ఉంటుంది. అయితే పన్ను నిబంధనలు, ముందస్తు ఉపసంహరణ నిబంధనలు, వడ్డీ రేట్లను పెట్టుబడి పెట్టే ముందు సంబంధిత పోస్టాఫీస్ లేదా బ్యాంకులో నిర్ధారించుకోవడం మంచిది.