Sekhar Master | రోడ్డు ప్ర‌మాదంలో శేఖ‌ర్ మాస్ట‌ర్‌కు గాయాలు

Sekhar Master |  టాలీవుడ్ కొరియోగ్రాఫ‌ర్ శేఖ‌ర్ మాస్ట‌ర్ రోడ్డు ప్ర‌మాదంలో గాయ‌ప‌డ్డారు. బుధ‌వారం రాత్రి శేఖ‌ర్ మాస్ట‌ర్ కారును ఓ ట్ర‌క్కు ఢీకొట్టింది. బాల‌కృష్ణ హీరోగా న‌టిస్తోన్న దాదా మూవీ షూటింగ్ ప్ర‌స్తుతం హైద‌రాబాద్‌లో జ‌రుగుతోంది. శేఖ‌ర్ మాస్ట‌ర్ సార‌థ్యంలో ఓ పాట‌ను చిత్రీక‌రిస్తున్నారు. ఈ పాట షూటింగ్‌ను పూర్తిచేసుకొని ఇంటికి తిరిగి వ‌స్తోండ‌గా...ఆయ‌న ప్ర‌యాణిస్తోన్న కారును పండ్ల లోడుతో వెళుతోన్న ఓ ట్ర‌క్కు ఢీకొట్టింది. స్వ‌ల్ప గాయాల‌తో ఈ ప్ర‌మాదం నుంచి బ‌య‌ట‌ప‌డ్డారు శేఖ‌ర్ మాస్ట‌ర్‌. ఆయ‌న కారు మాత్రం పూర్తిగా దెబ్బ‌తిన్న‌ట్లు స‌మాచారం. రోడ్డు ప్ర‌మాదంలో శేఖ‌ర్ మాస్ట‌ర్ గాయ‌ప‌డిన‌ట్లు వార్త‌లు రావ‌డంతో ఆయ‌న అభిమానుల‌తో పాటు టాలీవుడ్ వ‌ర్గాల్లో ఆందోళ‌న వ్య‌క్త‌మ‌వుతోంది.

టాప్ కొరియోగ్రాఫ‌ర్‌

టాలీవుడ్‌లో టాప్ కొరియోగ్రాఫ‌ర్‌గా కొన‌సాగుతోన్నారు శేఖ‌ర్ మాస్ట‌ర్‌. చిరంజీవి, బాల‌కృష్ణ, మ‌హేష్‌బాబు, ఎన్టీఆర్‌, అల్లు అర్జున్‌తో పాటు స్టార్ హీరోలంద‌రి సినిమాల‌కు డ్యాన్స్‌మాస్ట‌ర్‌గా ప‌నిచేశారు. ఓ వైపు కొరియోగ్రాఫ‌ర్‌గా బిజీగా ఉంటూనే టీవీ షోల‌కు హోస్ట్‌గా వ్య‌వ‌హ‌రిస్తోన్నారు.