Punjagutta AI Police Station | దేశంలోనే తొలి ఏఐ పోలీస్ స్టేషన్‌గా పంజాగుట్ట: ఫిర్యాదు మొదలు ఛార్జ్‌షీట్ దాకా అంతా కృత్రిమ మేధతోనే

• దేశంలోనే తొలిసారి
• 'సేతు' కియోస్క్ సదుపాయం
• ఫిర్యాదు నుంచి ఛార్జ్‌షీట్ వరకు
• డిసెంబర్ మొదటి వారంలో ప్రారంభం
• సరికొత్త విప్లవానికి సిటీ పోలీస్ శ్రీకారం

Punjagutta AI Police Station | త్రినేత్ర న్యూస్ : హైదరాబాద్ నగరంలో శాంతిభద్రతల పరిరక్షణ, నేర పరిశోధన సరికొత్త హైటెక్ యుగంలోకి అడుగుపెడుతోంది. భారతదేశంలోనే మొట్టమొదటి కృత్రిమ మేధ (AI) ఆధారిత మోడల్ పోలీస్ స్టేషన్‌గా రాజధానిలోని పంజాగుట్ట ఠాణా రూపుదిద్దుకుంటోందని నగర పోలీస్ కమిషనర్ వీసీ సజ్జనార్ ఐపీఎస్ అధికారికంగా ప్రకటించారు. తెలంగాణ డీజీపీ సీవీ ఆనంద్ మార్గదర్శకత్వంలో ప్రతిష్టాత్మక పైలట్ ప్రాజెక్ట్‌గా చేపట్టిన ఈ నూతన సాంకేతిక వ్యవస్థను వచ్చే డిసెంబర్ మొదటి వారంలో లాంఛనంగా ప్రారంభించనున్నట్లు ఆయన వెల్లడించారు.

పంజాగుట్ట పీఎస్‌లో సీపీ సజ్జనార్ ఆకస్మిక తనిఖీ

బుధవారం పంజాగుట్ట పోలీస్ స్టేషన్‌ను ఆకస్మికంగా సందర్శించిన సీపీ సజ్జనార్.. అక్కడ శరవేగంగా జరుగుతున్న ఏఐ సాంకేతిక ఏర్పాట్లను ఏసీపీ మురళీకృష్ణ, ఇన్‌స్పెక్టర్ జహంగీర్‌లతో కలిసి స్వయంగా పరిశీలించారు. ఈ సందర్భంగా స్టేషన్‌కు వచ్చిన ఫిర్యాదుదారులతో నేరుగా మాట్లాడి సమస్యలను తెలుసుకున్నారు. సిబ్బంది డ్యూటీలు, పనితీరుపై సమీక్ష నిర్వహించి.. రోజువారీ పోలీసింగ్‌లో ఏఐ టూల్స్ వినియోగంపై వారికి ప్రత్యేక నైపుణ్య శిక్షణ ఇస్తున్నట్లు తెలిపారు.

10 భాషల్లో ఫిర్యాదు స్వీకరించే ‘సేతు’ కియోస్క్

హైదరాబాద్ లాంటి కాస్మోపాలిటన్ నగరంలో బాధితులకు ఎదురయ్యే భాషా సమస్యకు ఈ ఠాణా శాశ్వత పరిష్కారం చూపనుంది. రిసెప్షన్ వద్ద ఆధునిక ‘సేతు’ (Sethu) కియోస్క్‌ను అందుబాటులోకి తెచ్చారు. బాధితులు దాదాపు 10 రకాల భాషల్లో నేరుగా తమ ఫిర్యాదును రికార్డు చేయవచ్చు. ఆ ఫిర్యాదును ఏఐ సిస్టమ్ క్షణాల వ్యవధిలోనే స్థానిక అధికారిక భాషలోకి తర్జుమా చేసి, సంబంధిత డ్యూటీ ఆఫీసర్‌కు ఆటోమేటిక్‌గా ఫార్వర్డ్ చేస్తుంది.

ఎఫ్‌ఐఆర్ నుంచి ఛార్జ్‌షీట్ దాకా ఏఐ దన్ను

ఈ సరికొత్త విధానంతో పోలీసులకు పనిభారం తగ్గి, పేపర్‌వర్క్ భారీగా ఆదా కానుంది. బాధితుడు ఫిర్యాదు సమర్పించిన మరుక్షణం నుంచే ఏఐ ప్రాసెసింగ్ ప్రారంభమవుతుంది. ఎఫ్‌ఐఆర్ (FIR) నమోదు, రోజువారీ కేసు డైరీ రూపొందించడం, ఇన్వెస్టిగేషన్ నివేదికలు క్రోడీకరించడం నుంచి కోర్టులో దాఖలు చేసే తుది ఛార్జ్‌షీట్ (Chargesheet) రూపకల్పన వరకు అన్నీ ఏఐ సాంకేతికత ఆధారంగానే చకచకా పూర్తవుతాయి.

క్రైమ్ ప్రిడిక్షన్.. స్మార్ట్ పెట్రోలింగ్

కేవలం కేసుల దర్యాప్తు మాత్రమే కాకుండా నేరాల నియంత్రణకూ ఏఐని అనుసంధానిస్తున్నారు. పంజాగుట్ట పరిధిలోని రద్దీ కూడళ్లు, బస్టాప్‌లు, హాస్టళ్లు, వాణిజ్య సముదాయాలు, పాత నేరాల చరిత్ర తాలూకు డేటాను అల్గారిథమ్స్ నిరంతరం విశ్లేషిస్తాయి. దీని ద్వారా నేరాలు జరిగే అవకాశం ఉన్న హాట్‌స్పాట్‌లను ముందే గుర్తించి, బ్లూకోల్ట్స్, పెట్రోలింగ్ వాహనాలను ఆయా మార్గాల్లో పకడ్బందీగా మోహరిస్తారు.

డిసెంబర్‌లో ప్రారంభమయ్యే ఈ పైలట్ ప్రాజెక్ట్ ఫలితాలు, పనితీరును సమగ్రంగా మదింపు చేసిన తర్వాత.. త్వరలోనే తెలంగాణ రాష్ట్రవ్యాప్తంగా ఉన్న అన్ని పోలీస్ స్టేషన్లలోనూ ఈ అత్యాధునిక ఏఐ విధానాన్ని విస్తరిస్తామని సీపీ సజ్జనార్ స్పష్టం చేశారు.