OTT | థియేట‌ర్ల‌లో ఆడుతుండ‌గానే ఓటీటీలోకి సంక్రాంతి సినిమాలు – హిట్టైన కూడా నెల‌రోజుల్లోపే రిలీజ్‌

OTT | ఈ సంక్రాంతి టాలీవుడ్‌కు క‌లిసివ‌చ్చింది. పండుగ బ‌రిలో నిలిచిన ఐదు సినిమాల్లో మూడు నిర్మాత‌ల‌కు మంచి లాభాల‌ను తెచ్చిపెట్టాయి. ప్ర‌భాస్ రాజాసాబ్‌తో పాటు ర‌వితేజ భ‌ర్త మ‌హాశ‌యుల‌కు విజ్ఞ‌ప్తి మూవీ డిజాస్ట‌ర్లుగా నిలిచాయి.
సంక్రాంతి విన్న‌ర్‌గా...
ఈ సంక్రాంతి విన్న‌ర్‌గా చిరంజీవి మ‌న శంక‌ర వ‌ర‌ప్ర‌సాద్‌గారు నిలిచింది. అనిల్ రావిపూడి ద‌ర్శ‌క‌త్వంలో రూపొందిన ఈ సినిమా నాలుగు వంద‌ల కోట్ల వ‌ర‌కు వ‌సూళ్ల‌ను ద‌క్కించుకుంది. శ‌ర్వానంద్ నారీ నారీ న‌డుమ మురారితో పాటు న‌వీన్ పొలిశెట్టి అన‌గ‌న‌గా ఒక రాజు పెట్టిన పెట్టుబ‌డికి రెట్టింపు లాభాల‌ను తెచ్చిపెట్టాయి.
కాగా ఈ సంక్రాంతి సినిమాలు థియేట‌ర్ల‌లో రిలీజై నెల రోజులు కూడా కాక‌ముందే ఓటీటీలోకి రాబోతున్నాయి. థియేట్రిక‌ల్‌, ఓటీటీ విడుద‌ల‌కు మ‌ధ్య క‌నీసం మూడు వారాల గ్యాప్ కూడా లేక‌పోవ‌డం సినీ ల‌వ‌ర్స్‌తో పాటు టాలీవుడ్ వ‌ర్గాల‌ను విస్మ‌య‌ప‌రుస్తోంది. థియేట‌ర్ల‌లో ఆడుతుండ‌గానే సంక్రాంతి సినిమాల ఓటీటీ రిలీజ్ డేట్స్‌ను ప్ర‌క‌టించ‌డంతో క‌లెక్ష‌న్స్ డ్రాప్ అయ్యాయి. ఇలాగైతే థియేట‌ర్ల మ‌నుగడ ప్ర‌శార్థ‌క‌మ‌వుతుంద‌ని అంటున్నారు.

నారీ నారీ న‌డుమ మురారి...

శ‌ర్వానంద్ హీరోగా న‌టించిన నారీ నారీ న‌డుమ మురారి ఫిబ్ర‌వ‌రి 4 నుంచి అమెజాన్ ప్రైమ్ వీడియోలో స్ట్రీమింగ్ కాబోతుంది. ఈ సినిమాకు రామ్ అబ్బ‌రాజు ద‌ర్శ‌క‌త్వం వ‌హించాడు. రొమాంటిక్ ఎంట‌ర్‌టైన‌ర్‌గా రూపొందిన ఈ మూవీలో సంయుక్త మీన‌న్‌, సాక్షి వైద్య హీరోయిన్లుగా న‌టించారు. స‌రిగ్గా ఇర‌వై రోజుల వ్య‌వ‌ధిలోనే నారీ నారీ న‌డుమ మురారి ఓటీటీలోకి వ‌చ్చేస్తోంది. ఈ సినిమాతో లాంగ్ గ్యాప్ త‌ర్వాత హీరోగా పెద్ద హిట్టు అందుకున్నారు శ‌ర్వానంద్‌.

ప్ర‌భాస్ రాజాసాబ్‌...

ప్ర‌భాస్ రాజాసాబ్ మూవీ ఫిబ్ర‌వ‌రి 6న జియో హాట్‌స్టార్‌లో రిలీజ్ అవుతోంది. హార‌ర్ కామెడీగా రూపొందిన ఈ మూవీకి మారుతి డైరెక్ట‌ర్‌. భారీ అంచ‌నాల న‌డుమ థియేట‌ర్ల‌లోకి వ‌చ్చిన రాజాసాబ్‌ డిజాస్ట‌ర్‌గా నిలిచింది. నిర్మాత‌ల‌కు భారీగా న‌ష్టాల‌ను తెచ్చిపెట్టింది. దారుణ ప‌రాజ‌యంతోనే ఈ సినిమాను త్వ‌ర‌గా ఓటీటీలోకి తీసుకొస్తున్న‌ట్లు వార్త‌లొస్తున్నాయి.

చిరంజీవి సినిమా...

చిరంజీవి మ‌న శంక‌ర వ‌ర‌ప్ర‌సాద్‌గారు మూవీ కూడా నెల రోజులు కూడా కాక‌ముందే ఓటీటీలోకి రానున్న‌ట్లు వార్త‌లు వినిపిస్తున్నాయి. ఈ సినిమా స్ట్రీమింగ్ రైట్స్‌ను జీ5ఓటీటీ ద‌క్కించుకుంది. ఫిబ్ర‌వ‌రి 11న ఈ ఫ‌న్ ఫ్యామిలీ డ్రామా మూవీ ఓటీటీలో సంద‌డి చేయ‌నున్న‌ట్లు ప్ర‌చారం జ‌రుగుతోంది. వెంక‌టేష్ కీల‌క పాత్ర‌లో న‌టించిన ఈ మూవీలో న‌య‌న‌తార హీరోయిన్‌గా న‌టిస్తోంది. థియేట‌ర్ల‌లో ఇప్ప‌టికీ మ‌న శంక‌ర వ‌ర‌ప్ర‌సాద్‌గారు భారీగా వ‌సూళ్ల‌ను రాబ‌డుతోంది. ఓటీటీలోకి ఫిబ్ర‌వ‌రి నెలాఖ‌రు వ‌ర‌కు రిలీజ్ చేస్తే మంచిద‌ని థియేట‌ర్ వ‌ర్గాలు అంటున్నాయి.