Rashmika Mandanna | వైల్డ్ లుక్‌లో ర‌ష్మిక – మైసా ఫ‌స్ట్ సింగిల్ రిలీజ్

Rashmika Mandanna | నేష‌న‌ల్ క్ర‌ష్ ర‌ష్మిక మంద‌న్న హీరోయిన్‌గా న‌టిస్తోన్న లేడీ ఓరియెంటెడ్ మూవీ మైసా. యాక్ష‌న్ థ్రిల్ల‌ర్‌గా డైరెక్ట‌ర్ ర‌వీంద్ర పుల్లె ఈ సినిమాను తెర‌కెక్కిస్తోన్నారు. న‌వంబ‌ర్ 27న ప్రేక్ష‌కుల ముందుకు రాబోతుంది.
మైసా మూవీ ప్ర‌మోష‌న్స్‌ను సోమ‌వారం నుంచి మొద‌లుపెట్టారు. ఫ‌స్ట్ సింగిల్‌ను రిలీజ్ చేశారు. ఓ మైసా రే అంటూ సాగిన ఈ లిరిక‌ల్ వీడియో సాంగ్‌లో వైల్డ్ లుక్‌లో ర‌ష్మిక క‌నిపించింది. రౌద్ర‌స్వ‌రూపంతో ఆక‌ట్టుకుంది. ఆమె ఎన‌ర్జిటిక్ స్టెప్పులు పాట‌కు హైలైట్‌గా నిలిచాయి.

సుద్దాల అశోక్‌తేజ‌...

ఓ మైసా రే సాంగ్‌కు సుద్దాల‌ అశోక్ తేజ సాహిత్యం స‌మ‌కూర్చారు. జేక్స్ బిజోయ్ మ్యూజిక్ అందించిన ఈ పాట‌ను సింధూజ శ్రీనివాస‌న్ ఆల‌పించారు. ఈ పాట‌లో మైసాను ఈషి, ఐషి రూపాల్లో అభివ‌ర్ణించారు సుద్దాల అశోక్‌తేజ‌. స్త్రీ శక్తిని, అర్ధనారీశ్వర స్వరూపాన్ని ప్రతిబింబిస్తూ పాట సాగింది. మహిళల శక్తి సామర్థ్యాలను కీర్తిస్తూ, ధైర్యంగా నిలబడి యుద్ధానికి సిద్ధం కావాలనే స్ఫూర్తిని ఈ పాటలోని పదాలు చాటుతున్నాయి.

ఫ‌స్ట్ సింగిల్‌...

ఓ మైసా రే పాట‌కు బృందా మాస్టర్ కొరియోగ్రఫీ అందించారు. ఫ‌స్ట్ సింగిల్‌లో మైసా కోసం ర‌ష్మిక మంద‌న్న పడిన కష్టం, పాత్ర‌కు న్యాయం చేసేందుకు చూపించిన అంకితభావం ప్రతి ఫ్రేమ్‌లో స్పష్టంగా కనిపిస్తున్నాయి. ఫారెస్ట్ బ్యాక్‌డ్రాప్‌లో చాలా మంది డ్యాన్సర్ల ఈ పాట‌ను చిత్రీక‌రించిన తీరు విభిన్నంగా ఉంది.

యాక్ష‌న్ రోల్‌

ఇందులో మైసా అనే గిరిజ‌న జాతికి చెందిన యువ‌తిగా ర‌ష్మిక క‌నిపించ‌బోతుంది. ఔట్ అండ్ ఔట్ యాక్ష‌న్ రోల్‌లో ఆమె న‌టిస్తోన్న మొద‌టి మూవీ ఇది. ఈ సినిమా కోసం మార్ష‌ల్ ఆర్ట్స్‌లో ప్ర‌త్యేకంగా ట్రైనింగ్ తీసుకుంది. రిస్కీ స్టంట్స్ చేసింది. మైసాలో ఈశ్వ‌రీరావు, గురు సోమ‌సుంద‌రం, రావుర‌మేష్ కీల‌క పాత్ర‌ల్లో క‌నిపించ‌బోతున్నారు. నవంబర్ 27న తెలుగు, హిందీ, తమిళం, కన్నడ, మలయాళ భాషల్లో ఒకేసారి థియేటర్లలో విడుదల కానుంది.