Bollywood | టీవీ షో వివాదం – బాలీవుడ్ న‌టి రాఖీ సావంత్‌కు నాన్ బెయిల‌బుల్ వారెంట్‌

Bollywood | బాలీవుడ్ న‌టి రాఖీ సావంత్ చిక్కుల్లో ప‌డింది. ఓ టీవీ షో వివాదంలో ఉత్త‌ర‌ప్ర‌దేశ్‌లోని ఝాన్సీ జిల్లా కోర్టు ఆమెకు నాన్ బెయిల‌బుల్ వారెంట్‌ను జారీ చేసింది. ప‌ద‌హారేళ్ల క్రితం జ‌రిగిన ఓ ఆత్మ‌హ‌త్య కేసుకు సంబంధించి రాఖీ సావంత్ చాలా కాలంగా విచార‌ణ‌కు హాజ‌రుకాక‌పోవ‌డంపై కోర్టు ఆగ్ర‌హం వ్య‌క్తం చేసింది.

టీవీ షో...

2010లో రాఖీ సావంత్ హోస్ట్‌గా రాఖీ కా ఇన్సాఫ్ పేరుతో ఓ టీవీ షో టెలికాస్ట్ అయ్యింది. దాంప‌త్య జీవితంలో ఏర్ప‌డిన విభేదాల ప‌రిష్కారం అనే కాన్సెప్ట్‌తో రూపొందింది. రాఖీ సావంత్ షోకు ఉత్త‌ర‌ప్ర‌దేశ్‌లోని ప్రేమ్ న‌గ‌ర్ ప్రాంతానికి చెందిన ల‌క్ష్మ‌ణ్ అహిర్వాల్ అనే వ్య‌క్తి హాజ‌ర‌య్యాడు. భార్య అనిత మొద‌లైన గొడ‌వ‌ల‌ను ఈ షో ద్వారా ప‌రిష్క‌రించుకోవాల‌ని అనుకున్నారు.ఈ టీవీ షోకు హాజ‌రైన కొద్ది రోజుల త‌ర్వాత ల‌క్ష్మ‌ణ్ ఆత్మ‌హ‌త్య చేసుకున్నాడు. రాఖీ సావంత్ చేసిన అభ్యంత‌ర‌క‌ర‌ వ్యాఖ్య‌లు త‌ట్టుకోలేక త‌న కొడుకు చ‌నిపోయాడంటూ ల‌క్ష్మ‌ణ్ త‌ల్లి సావిత్రి కేసు పెట్టింది. నపుంస‌కుడు అంటూ హేళ‌న‌గా రాఖీ సావంత్ మాట్లాడింద‌ని, వ్య‌క్తిత్వాన్ని దెబ్బ‌తీయ‌డంతో అవ‌మానం త‌ట్టుకోలేక ఆత‌హ‌త్య చేసుకున్నాడంటూ ఆరోపించింది.

నాన్ బెయిల‌బుల్‌...

ఈ కేసులో టీవీ షో నిర్వ‌హ‌కుల‌తో పాటు రాఖీ సావంత్‌పై కేసు న‌మోదు చేశారు. విచార‌ణ‌కు హాజ‌రుకావాల‌ని ఆదేశించిన రాఖీ సావంత్ కోర్టుకు రాక‌పోవ‌డంతో ఆమెపై నాన్ బెయిల‌బుల్ వారెంట్‌ను జారీ చేశారు. డిసెంబ‌ర్ 1న త‌ప్ప‌కుండా కోర్టుకు రావాల‌ని చెప్పారు. స్పెష‌ల్ సాంగ్స్‌తో బాలీవుడ్‌లో ఫేమ‌స్ అయ్యింది రాఖీ సావంత్‌. కొన్ని సినిమాల్లో కీల‌క పాత్ర‌లు పోషించింది. టీవీ షోల‌లో పాల్గొన్న‌ది. గ‌త కొద్ది రోజులుగా ఎక్కువ‌గా వివాదాల‌తోనే వార్త‌ల్లో నిలుస్తోంది.