Hero Bharath Kanth | ఔటర్ రింగ్ రోడ్డుపై ఘోర రోడ్డు ప్రమాదం.. హీరో భ‌ర‌త్ కాంత్ మృతి

Hero Bharath Kanth | త్రినేత్ర‌.న్యూస్ : ఔట‌ర్ రింగ్ రోడ్డుపై ఘోర రోడ్డు ప్ర‌మాదం జ‌రిగింది. హైద‌రాబాద్ న‌గ‌ర శివార్ల‌లోని బొంగ‌లూరు గేటు వ‌ద్ద అతి వేగంగా వ‌చ్చిన ఓ కారు కంటైన‌ర్‌ను బ‌లంగా ఢీకొట్టింది. ఈ ప్ర‌మాదంలో ఇద్ద‌రు వ్య‌క్తులు అక్క‌డికక్క‌డే ప్రాణాలు కోల్పోయారు.

స‌మాచారం అందుకున్న పోలీసులు ఘ‌టనాస్థ‌లానికి చేరుకుని స‌హాయ‌క చ‌ర్య‌లు చేప‌ట్టారు. కారులో ఇరుక్కుపోయిన రెండు మృత‌దేహాల‌ను బ‌య‌ట‌కు వెలికితీశారు. మృతుల‌ను హీరో భ‌ర‌త్ కాంత్, సినిమాటోగ్ర‌ఫ‌ర్ త్రిలోక్‌గా పోలీసులు గుర్తించారు. వీరిద్ద‌రూ నెల్లూరు నుంచి హైద‌రాబాద్ వ‌స్తున్న‌ట్లు పోలీసులు తెలిపారు.

ఈ ప్ర‌మాద ఘ‌ట‌న‌పై పోలీసులు కేసు న‌మోదు చేసుకుని ద‌ర్యాప్తు చేప‌ట్టారు. మృత‌దేహాల‌ను పోస్టుమార్టం నిమిత్తం ప్ర‌భుత్వ ఆస్ప‌త్రికి త‌ర‌లించారు.

ఇటీవల విడుదలైన టాలెంట్ సినిమాలో భరత్ కాంత్ హీరోగా నటించారు. పలు తెలుగు, హిందీ వెబ్ సిరీస్‌లలో నటించారు. పలు తెలుగు సినిమాలకు త్రిలోక్ సినిమాటోగ్రాఫర్‌గా పనిచేశారు. ఇద్దరూ కలిసి నెల్లూరు వెళ్లి తిరిగి హైదరాబాద్ వస్తుండగా ప్రమాదం చోటుచేసుకుంది.