Deepika Padukone | తల్లయిన నెల రోజులకే కెమెరా ముందుకు దీపికా పడుకోణ్ – షారుఖ్ ఖాన్ కింగ్‌తో రీఎంట్రీ

Deepika Padukone |  గ‌త నెల‌లో మాతృత్వ బంధంలోకి అడుగుపెట్టింది దీపికా ప‌డుకోణ్. రెండోసారి ర‌ణ‌వీర్‌, దీపికా దంప‌తుల‌కు కూతురు పుట్టింది. చిన్నారికి దేవీ ప‌డుకోణ్ సింగ్‌ అనే పేరు పెట్టిన‌ట్లు ద‌స‌రా సంద‌ర్భంగా ఈ బాలీవుడ్ జోడీ ప్ర‌క‌టించారు. త‌ల్లిగా మార‌డంతో దీపికా ప‌డుకోణ్ సినిమాల‌కు ఐదారు నెల‌ల పాటు బ్రేక్ ఇవ్వ‌బోతున్న‌ట్లు ప్ర‌చారం జ‌రుగుతోంది. వ‌చ్చే ఏడాది ఈ బాలీవుడ్ బ్యూటీ తిరిగి రీఎంట్రీ ఇచ్చే అవ‌కాశం ఉన్న‌ట్లు వార్త‌లొచ్చాయి. ఈ రూమ‌ర్ల‌కు తెర‌దించుతూ నెల రోజుల్లోనే తిరిగి కెమెరా ముందుకు రాబోతుంది దీపికా ప‌డుకోణ్. బాలీవుడ్ మూవీ కింగ్ షూటింగ్‌లో జాయిన్ అవుతోంది.

షారుఖ్ ఖాన్ కూతురు...

షారుఖ్‌ఖాన్ హీరోగా సిద్ధార్థ్ ఆనంద్ ద‌ర్శ‌క‌త్వంలో రూపొందుతోన్న కింగ్ మూవీ డిసెంబ‌ర్ 24న‌ ప్రేక్ష‌కుల ముందుకు రాబోతుంది. ఈ సినిమాలో దీపికా ప‌డుకోణ్ హీరోయిన్‌గా న‌టిస్తోంది. దాదాపు 350 కోట్ల బ‌డ్జెట్‌తో రూపొందుతోన్న ఈ స్టైలిష్ యాక్ష‌న్ సినిమాలో షారుఖ్‌ఖాన్ కూతురు సుహానా ఖాన్ ఓ కీల‌క పాత్ర‌లో క‌నిపించ‌బోతుంది.

సాంగ్ షూటింగ్‌...

ఓ పాట మిన‌హా కింగ్ షూటింగ్ మొత్తం పూర్త‌య్యింది. ఆగ‌స్ట్‌లోనే ఈ సాంగ్‌ను సౌతాఫ్రికాలో చిత్రీక‌రించాల‌ని ప్లాన్ చేశారు. కానీ దీపికాతో పాటు ఇత‌ర న‌టీన‌టుల డేట్స్ అడ్జెస్ట్ కాక‌పోవ‌డంతో వాయిదాప‌డింది. తాజాగా అక్టోబ‌ర్ 26 నుంచి ముంబైలోని ఫిల్మ్ సిటీలో ఈ సాంగ్‌ షూట్ మొద‌లుకాబోతుంది. దీపికా ప‌డుకోణ్ కోస‌మే సౌతాఫ్రికాలో అనుకున్న లోకేష‌న్‌కు ముంబైకి మార్చిన‌ట్లు స‌మాచారం.

నెల రోజుల్లోనే...

ఈ పాట చిత్రీక‌ర‌ణ‌లో షారుఖ్‌ఖాన్‌, దీపికా ప‌డుకోణ్‌తో పాటు సుహానా ఖాన్‌, అభిషేక్ బ‌చ్చ‌న్‌, అభ‌య్ వ‌ర్మ క‌నిపించ‌బోతున్న‌ట్లు స‌మాచారం. వైభ‌వ్ మ‌ర్చెంట్ కొరియోగ్ర‌ఫీ అందిస్తున్నారు. కాగా త‌ల్లిగా మారిన నెల‌రోజుల్లోనే దీపికా ప‌డుకోణ్ తిరిగి షూటింగ్‌ల‌లో పాల్గొన‌నుండ‌టంపై బాలీవుడ్ వ‌ర్గాల‌తో పాటు నెటిజ‌న్లు ఆమెపై ప్ర‌శంస‌లు కురిపిస్తున్నారు. వృత్తి ప‌ట్ల‌ ఆమెకు ఉన్న అంకిత‌భావానికి నిద‌ర్శ‌న‌మిద‌ని అంటున్నారు.
దీపికా ప‌డుకోణ్‌, షారుఖ్‌ఖాన్ కాంబినేష‌న్‌లో వ‌స్తోన్న ఆరో మూవీ ఇది. షారుఖ్‌ఖాన్ భార్య గౌరీ ఖాన్ ఈ సినిమాకు ఓ నిర్మాత‌గా వ్య‌వ‌హ‌రిస్తోంది.