Chiranjeevi | చ‌ర‌ణ్ బ‌ర్త్‌డే స్పెష‌ల్‌గా సెల‌బ్రేట్ చేసిన చిరంజీవి – త‌న‌యుడి క‌ల నెర‌వేర్చిన మెగాస్టార్‌

Chiranjeevi |  త‌న‌యుడు రామ్‌చ‌ర‌ణ్ బ‌ర్త్‌డేను మెగాస్టార్ చిరంజీవి గుర్తుండిపోయేలా సెల‌బ్రేట్ చేశారు. చ‌ర‌ణ్ పుట్టిన‌రోజు సంద‌ర్భంగా స్వ‌గృహంలో ఓ హోమం నిర్వ‌హించారు. అంతే కాకుండా ఇటీవ‌ల గ‌ద్ద‌ర్ అవార్డ్స్‌లో భాగంగా తాను స్వీక‌రించిన ఎన్టీఆర్ నేష‌న‌ల్ అవార్డు తాలూకు ప్రైజ్‌మ‌నీని స్వ‌చ్ఛంద సంస్థ‌ల‌కు విరాళంగా అంద‌జేశారు. రామ్‌చ‌ర‌ణ్‌ను క‌ల‌వాల‌ని చాలా రోజులుగా ఎదురుచూస్తోన్న కొంద‌రు వృద్ధుల‌ను కొడుకు పుట్టిన‌రోజునాడు మెగాస్టార్‌ క‌లిశారు. వారికి స్వ‌యంగా భోజ‌నం వ‌డ్డించ‌డ‌మే కాకుండా నూత‌న వ‌స్త్రాలు అంద‌జేశారు. ఇందుకు సంబంధించిన ఫొటోలు, వీడియోలు వైర‌ల్ అవుతోన్నాయి.

శ్రీరామ‌న‌వ‌మి రోజున హోమం...

రామ్‌చ‌ర‌ణ్ బ‌ర్త్‌డే సంద‌ర్భంగా శుక్ర‌వారం స్వ‌గృహంలో కొడుకు చేత ప్ర‌త్యేకంగా ఓ హోమం చేయించారు. ఇందుకు సంబంధించిన వీడియోను అభిమానుల‌తో పంచుకున్నారు చిరంజీవి. ఈ ఏడాది శ్రీరామనవమి రోజు యాదృచ్చికంగా చరణ్ పుట్టినరోజు కలిసి రావడం ఎంతో సంతోషంగా ఉందంటూ ఓ పోస్ట్ పెట్టారు.

ఎంతో మందికి స్ఫూర్తి...

త‌న‌యుడు రామ్‌చ‌ర‌ణ్‌కు ఎమోష‌న‌ల్‌గా పుట్టిన‌రోజు శుభాకాంక్ష‌లు చెప్పారు చిరంజీవి. రామ్‌చ‌ర‌ణ్‌తో క‌లిసి దిగిన కొన్ని రేర్ ఫొటోల‌ను అభిమానుల‌తో పంచుకున్నారు. చిన్నప్పుడు నా చేయి పట్టుకుని నడిచిన స్థాయి నుండి, ఈరోజు ఎంతోమందికి స్ఫూర్తిగా నిలిచే స్థాయికి నువ్వు ఎదిగిన తీరు చూస్తుంటే నాకు చాలా గర్వంగా ఉందంటూ చ‌ర‌ణ్‌ను ఉద్దేశించి సోష‌ల్ మీడియాలో పోస్ట్ పెట్టారు చిరంజీవి.

సినిమాను, ప‌ర్స‌లైఫ్‌ను నువ్వు బ్యాలెన్స్ చేసుకునే తీరు... కుటుంబం పట్ల నీకున్న బాధ్యత గౌర‌వం, దైవభక్తి, క్రమశిక్షణతో పాటు నువ్వు పాటించే విలువలు చూస్తుంటే ఆనందంగా ఉంది.. ఇవన్నీ చూసిన ప్రతిసారీ నీపై నాకున్న ప్రేమాభిమానాలు పెరుగుతూనే ఉన్నాయంటూ ఈ ట్వీట్‌లో చిరంజీవి పేర్కొన్నారు.

ప‌ది ల‌క్ష‌లు విరాళం...

ఇటీవ‌ల తెలంగాణ ప్ర‌భుత్వం ప్ర‌దానం చేసిన గ‌ద్ద‌ర్ అవార్డ్స్‌లో చిరంజీవి ఎన్టీఆర్ నేష‌న‌ల్ అవార్డును అందుకున్న సంగ‌తి తెలిసిందే. ఈ పుర‌స్కారంతో పాటు ప్ర‌భుత్వం ఆయ‌న‌కు ప‌ది ల‌క్ష‌ల ప్రైజ్‌మ‌నీ ఇచ్చింది. ఈ ప్రైజ్‌మ‌నీని చ‌ర‌ణ్ పుట్టిన‌రోజు సంద‌ర్భంగా ఐదు స్వ‌చ్ఛంద సంస్థ‌ల‌కు విరాళంగా ఇస్తున్న‌ట్లు చిరంజీవి వెల్ల‌డించారు. స‌ర్వ్ ఫౌండేష‌న్‌కు చెందిన వృద్ధులు కొంద‌రు గేమ్ ఛేంజ‌ర్ షూటింగ్ స‌మ‌యంలో రామ్‌చ‌ర‌ణ్ క‌లిశారు. త‌న పుట్టిన‌రోజును వారితో సెల‌బ్రేట్ చేసుకుంటాన‌ని ఆ టైమ్‌లో రామ్‌చ‌ర‌ణ్ మాటిచ్చారు. కొడుకు ఇచ్చిన మాట‌ను చిరంజీవి నిజం చేశారు. 30 మంది వృద్ధుల‌ను హైద‌రాబాద్‌కు ర‌ప్పించారు. వారికి స్వ‌యంగా భోజ‌నం వ‌డ్డించ‌డ‌మే కాకుండా నూత‌న వ‌స్త్రాలు బ‌హుక‌రించారు.