Anil Ravipudi | ద‌గ్గుబాటి, నంద‌మూరి హీరోల‌తో అనిల్ రావిపూడి మ‌ల్టీస్టార‌ర్ – టాలీవుడ్‌లో ఫ‌స్ట్ టైమ్‌

Anil Ravipudi | మ‌న శంక‌ర వ‌ర‌ప్ర‌సాద్‌గారుతో సంక్రాంతికి పెద్ద హిట్టు అందుకున్నారు డైరెక్ట‌ర్ అనిల్ రావిపూడి. టాలీవుడ్ టాప్ హీరోలు చిరంజీవి, వెంక‌టేష్ తొలిసారి క‌లిసి న‌టించిన ఈ మూవీ బాక్సాఫీస్‌ను షేక్ చేసింది. 350 కోట్ల‌కుపైగా వ‌సూళ్ల‌ను ద‌క్కించుకుంది. కొణిదెల, ద‌గ్గుబాటి హీరోల త‌ర్వాత మ‌రో ఇంట్రెస్టింగ్ మ‌ల్టీస్టార‌ర్‌ను తెర‌కెక్కించ‌బోతున్నారు అనిల్ రావిపూడి. ఈ సారి ద‌గ్గుబాటి హీరోతో పాటు నంద‌మూరి క‌థానాయ‌కుడిని లైన్‌లో పెట్టారు. వెంక‌టేష్‌, క‌ళ్యాణ్ రామ్‌ల‌తో త‌న త‌దుప‌రి సినిమా చేయ‌బోతున్న‌ట్లు అనిల్ రావిపూడి అఫీషియ‌ల్‌గా ప్ర‌క‌టించారు.

ప‌టాస్‌తోనే డెబ్యూ...

క‌ళ్యాణ్ రామ్ హీరోగా న‌టించిన ప‌టాస్‌తోనే డైరెక్ట‌ర్‌గా అనిల్ రావిపూడి జ‌ర్నీ మొద‌లైంది. లాంగ్ గ్యాప్ త‌ర్వాత మ‌ళ్లీ డెబ్యూ హీరోతో ఈ సినిమా చేయ‌బోతున్నాడు. ఇక అనిల్ రావిపూడికి అచ్చొచ్చిన హీరోగా వెంక‌టేష్ నిలిచారు. వీరిద్ద‌రు క‌లిసి ఇప్ప‌టివ‌ర‌కు నాలుగు సినిమాలు వ‌చ్చాయి. ఈ సినిమాల‌న్నీ బ్లాక్‌బ‌స్ట‌ర్స్‌గా నిలిచాయి. ఈ మ‌ల్టీస్టార‌ర్‌తో ఐదోసారి వెంక‌టేష్‌, అనిల్ రావిపూడి కాంబో తెలుగు ప్రేక్ష‌కుల ముందుకు రాబోతుంది.

వార‌సులు హీరోలుగా...

ద‌గ్గుబాటి నంద‌మూరి హీరోల కాంబినేష‌న్‌లో వ‌స్తోన్న ఫ‌స్ట్ మూవీ ఇది. గ‌తంలో బాల‌కృష్ణ‌, వెంక‌టేష్‌తో పాటు...వెంక‌టేష్‌, జూనియ‌ర్ ఎన్టీఆర్ కాంబినేష‌న్‌లో సినిమాలు చేయాల‌ని చాలా మంది ద‌ర్శ‌క‌నిర్మాత‌లు ప్ర‌య‌త్నించారు. కానీ వ‌ర్క‌వుట్ కాలేదు. ఎన్టీఆర్ మ‌హానాయ‌కుడు, క‌థానాయ‌కుడు సినిమాల్లో రానా ఓ కీల‌క పాత్ర‌లో న‌టించారు. ఈ రెండు ఫ్యామిలీస్‌కు చెందిన వార‌సులు హీరోలుగా ఓ సినిమా రూపొంద‌నుండ‌టం టాలీవుడ్‌లో ఇదే మొద‌టిసారి అని ఫ్యాన్స్ చెబుతోన్నారు.

స్క్రిప్ట్ ప‌నులు ఎండింగ్‌...

వ‌చ్చే సంక్రాంతికి ఈ సినిమాను ప్రేక్ష‌కుల ముందుకు తీసుకురాబోతున్న‌ట్లు అనిల్ రావిపూడి ప్ర‌క‌టించారు. ప్ర‌స్తుతం ఈ సినిమాకు సంబంధించిన స్క్రిప్ట్ ప‌నులు తుది ద‌శ‌కు చేరుకున్న‌ట్లు వెల్ల‌డించారు. త్వ‌ర‌లోనే టైటిల్‌తో పాటు ఇత‌ర న‌టీన‌టులు, సాంకేతిక నిపుణుల వివ‌రాల‌ను వెల్ల‌డించ‌బోతున్నారు.
ప్ర‌స్తుతం త్రివిక్ర‌మ్‌తో ఆద‌ర్శ‌కుటుంబం సినిమా చేస్తున్నారు వెంక‌టేష్‌. ఈ సినిమా షూటింగ్ పూర్త‌యిన వెంట‌నే అనిల్ రావిపూడి మూవీ సెట్స్‌లో వెంక‌టేష్ అడుగుపెట్ట‌బోతున్న‌ట్లు స‌మాచారం.