Postpone | టాలీవుడ్‌లో వాయిదాల ప‌ర్వం.. రామ్‌చ‌ర‌ణ్ దెబ్బ‌కు మ‌రో తేదీ వెతుక్కుంటున్న‌ అఖిల్!

Postpone | త్రినేత్ర‌.న్యూస్‌: టాలీవుడ్‌లో (Tollywood) వాయిదాల ప‌ర్వం కొన‌సాగుతున్న‌ది. ఇప్ప‌టికే రామ్‌చ‌ర‌ణ్ (Ramcharan) ప్రెస్టీజియ‌స్ మూవీ `పెద్ది`.. విడుద‌ల పోస్ట్‌పోన్ (Postpone) అయిన విష‌యం తెలిసిందే. అదేబాట‌లో అడ‌విశేష్ `డెకాయిట్` సైతం వాయిదాప‌డింది. తాజాగా అక్కినేని హీరో అఖిల్ (Akkineni Akhil) మాస్ యాక్ష‌న్ ఎంట‌ర్‌టైన‌ర్ `లెనిన్‌` (Lenin) కూడా మ‌రో తేదీని వెతుక్కునే ప‌నిలో ప‌డింది..!

మార్చి నెల‌లో భారీ సినిమాలు విడుద‌ల‌ కానున్నాయి. ప‌వ‌న్ క‌ల్యాణ్ ఉస్తాద్ భ‌గ‌త్ సింగ్‌ను మార్చి 26న రిలీజ్ చేయ‌నున్న‌ట్లు మేక‌ర్స్ ఇప్ప‌టికే ప్ర‌క‌టించారు. అదే నెల‌లో బాలీవుడ్ స్టార్ రణ్‌వీర్ సింగ్ నటించిన 'ధురంధర్ 2' (Dhurandhar 2), కన్నడ హీరో యష్ నటించిన 'టాక్సిక్‌` విడుద‌ల‌కు సిద్ధంగా ఉన్నాయి. డిసెంబ‌ర్‌లో విడుద‌లై వెయ్యికోట్ల‌కుపైగా వ‌సూళ్లు రాబ‌ట్టిన ధురంధ‌ర్ తొలి పార్ట్.. ప్ర‌స్తుతం ఓటీటీలోనూ దూసుకెళ్తున్న‌ది. ఈ మూవీ సెకండ్ పార్ట్‌పై భారీ క్రేజ్ నెల‌కొంది. ఇక‌ కేజీఎఫ్ త‌ర్వాత య‌ష్ పాన్ ఇండియా స్థాయిలో తెర‌కెక్కిస్తున్న టాక్సిక్‌ మూవీపై అంచ‌నాలున్నాయి.

ఓవైపు బాబాయ్ సినిమా, మ‌రోవైపు ర‌ణ్‌వీర్ సింగ్‌, య‌ష్ పోటీకి వ‌స్తుండ‌టంతో రామ్‌చ‌ర‌ణ్ న‌టించిన‌ `పెద్ది` వాయిదా ప‌డింది. తొలుత ఈ మూవీని మార్చి 27న సినిమాను రిలీజ్ చేయాల‌ని నిర్ణ‌యించారు. అయితే భారీ ప్రాజెక్టులు విడుద‌ల సిద్ధ‌మ‌వ‌డంతో `పెద్ది` టీమ్ ఏప్రిల్ అయితే బెట‌ర్‌గా ఉంటుంద‌ని భావించిన‌ట్లుంది. దీంతో ఏప్రిల్ 30కి విడుద‌ల తేదీని మార్చుకున్న‌ది.

ఈ ప్ర‌భావం అక్కినెని అఖిల్ న‌టించిన లెనిన్‌పై ప‌డింది. అస‌లే ఒక్క హిట్టుకూడా లేక కొట్టుమిట్టాడుతున్న అఖిల్‌కు మే 1న సోలోగా థియేట‌ర్ల‌లోకి రావాల‌నుకున్నాడు. అయితే `పెద్ది` రూపంలో అఖిల్‌కు రామ్‌చర‌న్ చెక్‌పెట్టాడు. అక్కినేని కుటుంబానికి మే నెల సెంటిమెంట్‌గా ఉండ‌టంతో మే 1ని లాక్‌చేశారు. అయితే ఇప్పుడు అంత‌కు ఒక్క‌రోజు ముందే అంటే ఏప్రిల్ 30న రామ్‌చ‌రణ్ బాక్సాఫీస్ బ‌రిలోకి దిగుతుండ‌టంతో `లెనిన్‌` మ‌రో తేదీని వెతుక్కోవాల్సిన ప‌రిస్థితి ఏర్ప‌డింది. ఇప్ప‌టికే పెద్దిపై భారీ అంచ‌నాలు ఉన్న నేప‌థ్యంలో అఖిల్ ఏంచేస్తాడో చూద్దాం..!