Pragathi -Venuswamy | వేణు స్వామి పూజ‌ల వ‌ల్ల ఎలాంటి ఫ‌లితం లేదు – న‌టి ప్ర‌గ‌తి కౌంట‌ర్‌

Pragathi -Venuswamy | సెలిబ్రిటీ ఆస్ట్రాల‌జ‌ర్ వేణు స్వామి తెలుగు సినీ ల‌వ‌ర్స్ అంద‌రికి సుప‌రిచితుడే. టాలీవుడ్ హీరోలు, హీరోయిన్ల జాత‌కాలు చెబుతూ ఫేమ‌స్ అయ్యాడు వేణుస్వామి. ప్ర‌భాస్‌, నాగ‌చైత‌న్య‌, స‌మంత‌తో పాటు ప‌లువురు స్టార్స్ గురించి వేణుస్వామి చెప్పిన జాత‌కాలు అప్ప‌ట్లో సోష‌ల్ మీడియాలో తెగ‌ వైర‌ల్ అయ్యాయి. జాత‌కాలు, పూజ‌ల‌తో త‌ర‌చుగా వార్త‌ల్లో నిలుస్తుంటాడు వేణు స్వామి. తాజాగా న‌టి ప్ర‌గ‌తిని ఉద్దేశించి వేణుస్వామి చేసిన కామెంట్స్ టాలీవుడ్‌లో హాట్ టాపిక్‌గా మారాయి. ఇటీవ‌ల ట‌ర్కీలో జ‌రిగిన ఏషియ‌న్ గేమ్స్‌లో ప‌వ‌ర్ లిఫ్టింగ్ పోటీల్లో సినీ న‌టి ప్ర‌గ‌తి ఓ గోల్డ్ మెడ‌ల్‌తో పాటు మూడు ర‌జ‌త ప‌త‌కాలు సాధించింది. యాక్టింగ్‌లోనే కాకుండా క్రీడ‌ల్లో స‌త్తా చాటింది. ప్ర‌గ‌తిపై సినీ ప్ర‌ముఖుల‌తో పాటు అభిమానులు ప్ర‌శంస‌లు కురిపిస్తున్నారు. తాను చేసిన పూజ‌ల వ‌ల్లే ప్ర‌గ‌తి ఏషియ‌న్ గేమ్స్‌లో మెడ‌ల్స్ గెలుచుకుంద‌ని వేణు స్వామి ఇటీవ‌ల కామెంట్స్ చేశారు.

పూజ‌లు చేయించుకున్నా...

వేణుస్వామి వ్యాఖ్య‌ల‌కు ప్ర‌గ‌తి గ‌ట్టి కౌంట‌ర్ ఇచ్చింది. అత‌డి పూజల వల్లే తాను మెడ‌ల్స్‌ గెల‌వ‌లేద‌ని ప్ర‌గ‌తి అన్న‌ది. ప‌వ‌ర్ లిఫ్టింగ్‌లో గేమ్‌లో ఎన్నో ఏళ్లుగా తాను చేసిన క‌ఠిన‌ సాధన, నిరంతర కృషి వల్లే ఎషియ‌న్ గేమ్స్‌లో విజ‌యాన్ని సాధించాన‌ని చెప్పింది.. వేణుస్వామి వద్ద రెండున్నరేళ్ల క్రితం తాను పూజలు చేయించుకున్న మాట నిజ‌మేన‌ని ప్ర‌గ‌తి చెప్పింది. అయితే మాన‌సికంగా ఒత్తిడిలో ఉన్న టైమ్‌లో ఆ పూజలు చేయించుకున్నాన‌ని తెలిపింది. స్నేహితుల సూచనతోనే తాను వేణు స్వామి వద్దకు వెళ్లానని... టైమ్ బాగోలేనప్పుడు పూజ‌లు, జాత‌కాల‌ను నమ్మడం స‌హ‌జ‌మ‌ని ప్ర‌గ‌తి పేర్కొన్న‌ది.

కలిసిరాలేదు...

వేణుస్వామి పూజల వల్ల ఎలాంటి ఫ‌లితం లేద‌ని ప్ర‌గ‌తి చెప్పింది. సినిమాల‌తో పాటు ప‌వ‌ర్ లిఫ్టింగ్‌లో అంత‌గా క‌లిసిరాలేద‌ని చెప్పింది. ఎప్పుడో చేసిన‌ పూజలకు, ఇప్పుడు తాను సాధించిన విజయానికి ముడిపెట్ట‌డం క‌రెక్ట్ ప్ర‌గ‌తి ఆగ్ర‌హం వ్య‌క్తం చేసింది. పూజ‌ల వ‌ల్లే తాను ప‌త‌కాలు సాధించాన‌ని వేణుస్వామి చెప్పుకోవ‌డం మానేస్తే మంచిద‌ని అన్న‌ది. ఒక‌రి విజయాన్ని ఇతరుల ఖాతాలో వేసుకోవడాన్ని వారి సంస్కారానికే వదిలేస్తున్నానని ప్ర‌గ‌తి ఫైర్ అయ్యారు.