Hansika Motwani | నాలుగేళ్ల బంధానికి తెర‌..! సోహైల్‌తో విడాకులు తీసుకున్న హ‌న్సిక మోత్వాని..!

Hansika Motwani | ఫిల్మ్ ఇండ‌స్ట్రీలో ప్రేమ‌లు, పెళ్లిళ్లు, బ్రేక‌ప్స్ స‌ర్వ‌సాధార‌ణం. ఇప్ప‌టికే ఎన్నో జంట‌లు ప్రేమ పెళ్లిళ్లు చేసుకొని విడిపోయాయి. తాజాగా ఈ జాబితాలో హ‌న్సిక మోత్వాని సైతం చేరింది. త‌న భ‌ర్త వ్యాపార‌వేత్త అయిన సోహైల్ ఖ‌తురియాతో డివోర్స్ తీసుకుంది. గత కొంతకాలంగా వీరి వివాహ జీవితంలో విభేదాలు ఉన్నాయంటూ వార్త‌లు వ‌స్తున్నాయి. హ‌న్సిక‌-సోహైల్ దంప‌తుల‌కు ముంబ‌యిలోని బాంద్రా ఫ్యామిలీ కోర్టు విడాకులు మంజూరు చేసింది. దాంతో వీరిద్ద‌రి నాలుగేళ్ల బంధానికి తెర‌ప‌డిన‌ట్ల‌య్యింది.

2022 పెళ్లి..

2022 డిసెంబర్ 4న వ్యాపారవేత్త అయిత‌న సోహైల్‌ను హన్సిక ఘనంగా వివాహం చేసుకుంది. పెళ్లి జరిగిన కొద్దికాలానికే వారి మధ్య విభేదాలు మొదలయ్యాయి. సోహైల్‌కు ఇది రెండో వివాహం. అంత‌కు ముందు హ‌న్సిక స్నేహితురాలు రింకీ బ‌జాజ్‌ను పెళ్లి చేసుకున్న విష‌యం తెలిసిందే. హన్సిక–సోహైల్ విడాకులకు అసలు కారణం తెలియ‌రాలేదు. గత రెండేళ్లుగా వారి వైవాహిక జీవితం ఇబ్బందిక‌రంగానే సాగింద‌ని స‌మాచారం. ఈ క్ర‌మంలో 2024 జులై నుంచి ఇద్ద‌రు వేర్వేరుగా కాపురం ఉంటున్న‌ట్లు తెలిసింది. ఇరు కుటుంబాలు సమస్యను పరిష్కరించే ప్రయత్నం చేసినప్పటికీ ఫలితం లేకపోయింది. చివరికి పరస్పర అంగీకారంతో విడాకులు తీసుకోవాలని ఇద్దరూ నిర్ణయించుకున్నారు.

గొడ‌వ‌ల‌తోనే..

చిన్నచిన్న విషయాలపై తరచూ గొడ‌వ‌లు జరగడం కూడా విభేదాలకు కారణమైనట్లు సమాచారం. విడాకుల సమయంలో హన్సిక ఎలాంటి భరణం (అలిమోని) కోరలేదని తెలుస్తోంది. కోర్టు విచారణ సందర్భంగా హన్సిక తరఫు న్యాయవాది అద్నాన్ షేక్ మాట్లాడుతూ.. పెళ్లి తర్వాత కొంతకాలం ఇద్ద‌రు కలిసి నివసించారని తెలిపారు. కాలక్రమేణా వారి ఆలోచనలు, స్వభావం, జీవనశైలి భిన్నంగా ఉన్నాయని ఇద్దరికీ అర్థమైందన్నారు. చిన్నచిన్న విషయాలపైనా ప్రతిరోజూ తగాదాలు జరుగుతుండడ‌డంతో ఒకే ఇంట్లో జీవించడం కష్టంగా మారిందని, అందుకే విడిపోవాలని నిర్ణయించుకున్నారని చెప్పారు.

బాల‌న‌టిగా..

హ‌న్సిక బాల‌న‌టిగా కెరీర్‌ను ప్రారంభించింది. ప్ర‌ముఖ టీవీ సీరియ‌ల్ ష‌కల‌క బుమ్ బుమ్ సిరియ‌ల్‌తో మంచి గుర్తింపు తెచ్చుకుంది. అనంతరం హృతిక్ రోష‌న్ న‌టించిన కొయి మిల్ గ‌యా చిత్రంలోనూ న‌టించింది. 2007లో తెలుగులో అల్లు అర్జున్ హీరోగా వ‌చ్చిన దేశ ముదురు సినిమాతో హీరోయిన్‌గా ఎంట్రీ ఇచ్చింది. ఈ చిత్రానికి హన్సికకు ఉత్తమ డెబ్యూ నటి అవార్డు కూడా లభించింది. ఆ త‌ర్వాత ద‌క్షిణాదిలో వ‌రుస చిత్రాల్లో న‌టించి టాప్ హీరోయిన్‌గా ఎదిగింది.

Read Also :

Vijay – Trisha | ర‌చ్చ చేయాల్సిన అవ‌స‌రం లేదు – విజ‌య్‌, త్రిష వ్య‌వ‌హారంపై ఖుష్బూ రియాక్ష‌న్‌

Sai Dhanshika | ఓటీటీలోకి హీరో విశాల్‌కు కాబోయే భార్య త‌మిళ మూవీ