Padmanabhaswamy Temple 7th Door Mystery | ప్రపంచంలోనే అత్యంత ధనిక ఆలయం.. తాళం లేని ఆ ‘7వ గది’ తెరిస్తే దేశానికి ముప్పా?

• పద్మనాభస్వామి ఆలయ మిస్టరీ ఇదే

Padmanabhaswamy Temple 7th Door Mystery | త్రినేత్ర న్యూస్ : భారతదేశంలోని ప్రాచీన దేవాలయాలు ఎన్నో అంతుచిక్కని రహస్యాలకు, ఆశ్చర్యపరిచే విశేషాలకు నిలయాలు. అందులో కేరళ రాజధాని తిరువనంతపురంలో ఉన్న 'శ్రీ అనంత పద్మనాభస్వామి ఆలయం' ప్రపంచవ్యాప్తంగా ప్రత్యేక గుర్తింపు పొందింది. శేషనాగుపై శయనించిన శ్రీ మహావిష్ణువు కొలువై ఉన్న ఈ ఆలయంలోని ఆరు రహస్య గదుల్లో ఇప్పటికే లక్షల కోట్ల సంపద బయటపడగా, తెరవకుండా మిగిలిపోయిన 'ఏడవ తలుపు' (7th Door) మాత్రం నేటికీ ఒక పెద్ద మిస్టరీగానే మిగిలిపోయింది. అసలు ఆ తలుపు తెరిస్తే ప్రళయం వస్తుందన్న ప్రచారం వెనుక ఉన్న నిజాలేంటో తెలుసుకుందాం రండి.

రూ.1,32,000 కోట్ల సంపద.. ప్రపంచంలోనే నంబర్ 1

అనంత పద్మనాభస్వామి ఆలయం ప్రపంచంలోనే అత్యంత సంపన్నమైన హిందూ దేవాలయంగా రికార్డు సృష్టించింది. 1947కు ముందు ఈ ప్రాంతాన్ని ట్రావెన్‌కోర్ రాజవంశం పాలించేది. స్వాతంత్య్రం తర్వాత ఈ సంస్థానం భారత్‌లో విలీనమైనప్పటికీ, ఆలయ నిర్వహణ బాధ్యతలను మాత్రం ప్రభుత్వం తీసుకోలేదు. నాటి నుంచి నేటి వరకు రాజకుటుంబానికి చెందిన ఒక ప్రైవేట్ ట్రస్ట్ (Private Trust) ఆధ్వర్యంలోనే ఈ గుడి పాలన సాగుతోంది.

ఆలయ నేలమాళిగల్లో అపారమైన సంపద ఉందన్న ప్రచారంతో, ఆ గదులను తెరవాలని ప్రజల నుంచి డిమాండ్లు వచ్చాయి. దీంతో సుప్రీంకోర్టు (Supreme Court) ఏడుగురు సభ్యులతో కూడిన ఒక ప్రత్యేక కమిటీని ఏర్పాటు చేసి, ఆలయంలోని రహస్య గదులను తెరవడానికి అనుమతి ఇచ్చింది. ఆ కమిటీ పర్యవేక్షణలో 6 తలుపులను తెరిచినప్పుడు కళ్లు చెదిరే స్థాయిలో బంగారు ఆభరణాలు, పురాతన నాణేలు, ఖరీదైన వజ్రాలు బయటపడ్డాయి. వీటి విలువ సుమారు రూ.1,32,000 కోట్లు ఉంటుందని అంచనా.

తాళం, గడియ లేని '7వ తలుపు' రహస్యం

ఆరు గదుల్లోని సంపదను లెక్కించిన అధికారులకు 'ఏడవ తలుపు' దగ్గర మాత్రం అడుగు ముందుకు పడలేదు. ఈ తలుపును తెరవాలా వద్దా అనే అంశంపై ఇప్పటికీ పెద్ద చర్చే నడుస్తోంది. అన్నిటికంటే ఆశ్చర్యకరమైన విషయం ఏంటంటే.. ఈ ఏడో తలుపునకు అసలు ఎలాంటి తాళం (Lock) కానీ, గడియ (Bolt) కానీ లేవు.

ఆ తలుపుపై కేవలం రెండు భారీ సర్పాల (పాముల) ఆకృతులు మాత్రమే చెక్కి ఉంటాయి. ఈ సర్పాలే ఆ గదికి కాపలాగా ఉంటాయని భక్తుల విశ్వాసం.

గరుడ మంత్రం తప్పుగా చదివితే ప్రాణాలకే ముప్పు

మరి తాళం లేని ఈ తలుపు ఎలా తెరుచుకుంటుంది? పురాతన ఆచారాల ప్రకారం, ఈ తలుపును భౌతిక శక్తితో లేదా ఆధునిక పరికరాలతో తెరవడం అసాధ్యం. కేవలం మంత్ర శక్తితో మాత్రమే దీన్ని బంధించారు. అత్యంత నిష్ణాతులైన సాధకులు 'గరుడ మంత్రం' (Garuda Mantra) స్పష్టంగా పఠిస్తేనే ఆ తలుపు దానంతట అదే తెరుచుకుంటుందని చెబుతారు.

అయితే ఇక్కడే అసలు ప్రమాదం ఉంది. ఆ మంత్రాన్ని ఉచ్చరించేటప్పుడు ఏమాత్రం తడబడినా, ఉచ్చారణలో చిన్న తప్పు దొర్లినా.. ఆ ప్రయత్నం చేసే వ్యక్తికి తీవ్రమైన అనర్థం జరుగుతుందని, ప్రాణాలకే ముప్పు వాటిల్లుతుందని నమ్ముతారు.

ఆ తలుపు తెరిస్తే దేశానికే అరిష్టం: రాజవంశీయుల హెచ్చరిక

ట్రావెన్‌కోర్ రాజకుటుంబ పెద్ద అయిన తిరునాళ్ మార్తాండ వర్మ (90 ఏళ్ల వయసులో) గతంలో ఇచ్చిన ఒక ఇంటర్వ్యూలో ఈ ఏడో గది గురించి కీలక వ్యాఖ్యలు చేశారు. తన జీవితాన్ని ఆలయ సేవకే అంకితం చేశానని చెబుతూ.. ఆ ఏడో తలుపును తెరవడం వల్ల దేశానికి పెను విపత్తు (Calamity) సంభవించే ప్రమాదం ఉందని ఆయన హెచ్చరించారు.

పురాతన కాలంలో ఎన్నో విలువైన వస్తువులను దుర్వినియోగం కాకుండా కాపాడేందుకు తాంత్రిక, మాంత్రిక శక్తులతో బంధించేవారు. ఏడో గది వెనుక ఏముందో తెలుసుకోవాలనే కుతూహలం సహజమే అయినప్పటికీ.. పవిత్ర మంత్రాలతో బంధించిన రహస్యాలను కదిలించడం మంచిది కాదని పండితులు చెబుతున్నారు. ఆ తలుపు మూసి ఉంచడం వల్ల ఎవరికీ ఎలాంటి నష్టం లేదు, కానీ బలవంతంగా తెరిస్తే ఊహించని ముప్పు ఎదురయ్యే అవకాశం ఉన్నందున దాన్ని అలాగే ఉంచడమే శ్రేయస్కరం.