Kondagattu | ఘనంగా హనుమాన్‌ పెద్ద జయంతి వేడుకలు.. కాషాయమయమైన కొండగట్టు..!

Kondagattu | కొండగట్టులో హనుమాన్‌ పెద్ద జయంతి వేడుకలు మంగళవారం వైభవంగా ప్రారంభమయ్యాయి. ఆలయ పరిసరాలన్నీ అంజన్న భక్తులతో కళకళలాడుతుండగా.. పరిసరాలన్నీ కాషాయమయ్యాయి. రాష్ట్రంలోని వివిధ ప్రాంతాల నుంచి వేలాది మంది భక్తులు, దీక్షాపరులు భారీగా తరలివచ్చి ఆంజనేయుడి దర్శనం కోసం బారులు తీరారు. ఉత్సవాల ప్రారంభ దినాన తెల్లవారుజాము నుంచే ఆలయంలో ప్రత్యేక పూజలు, అభిషేకాలు ప్రారంభమయ్యాయి. అర్చకులు స్వామి వారికి పంచామృతాభిషేకం, సహస్రనామార్చన, సుందరకాండ పారాయణం నిర్వహించారు. యాగశాలలో స్థాపిత దేవతలకు హోమాలు నిర్వహించి, అనంతరం మహానివేదనతో తీర్థప్రసాదాలను భక్తులకు అందించారు.

జయంతి సందర్భంగా ప్రభుత్వం తరఫున అంజన్నకు పట్టు వస్త్రాలు సమర్పించారు. హనుమాన్‌ దీక్షాపరులతో ఆలయ పరిసరాలన్నీ ‘ఓం శ్రీరామ జయరామ జయ జయరామ’ నినాదాలు మార్మోగుతుండగా.. భక్తులు భక్తిశ్రద్ధలతో స్వామివారిని దర్శించుకుంటున్నారు. సోమవారం అర్ధరాత్రి నుంచి దర్శనాల కోసం భక్తులు బారులు తీరారు. దీక్ష విరమణ కోసం వచ్చిన భక్తులు కల్యాణకట్ట భవనంలో మాల విరమణ కార్యక్రమాలను పూర్తి చేసుకుంటున్నారు. పలువురు భక్తులు సుదూర ప్రాంతాల నుంచి కాలినడకన స్వామివారి దర్శనం కోసం తరలివస్తున్నారు. జిల్లా యంత్రాంగం ప్రత్యేక ఏర్పాట్లు చేసింది. తాగునీరు, చలువ పందిళ్లు, ప్రత్యేక క్యూలైన్లు ఏర్పాటు చేయడంతో పాటు ట్రాఫిక్ నియంత్రణకు పెద్ద ఎత్తున పోలీసులను మోహరించారు. జేఎన్‌టీయూ మార్గం మీదుగా వచ్చే వాహనాల కోసం బొజ్జపోతన్న గుడి వద్ద పార్కింగ్‌ ఏర్పాట్లు చేశారు. అక్కడి నుంచి కొండపై ‘వై’ జంక్షన్‌ వరకు భక్తుల రాకపోకల కోసం ఉచిత ఆర్టీసీ బస్సులు నడిపిస్తున్నారు.