Indore Gold Theft Police | రక్షకులే భక్షకులు: మాస్టర్ కీతో డోర్ తెరిచి.. సీసీటీవీలు ఆఫ్ చేసి.. వ్యాపారి ఇంట్లో పోలీసుల భారీ చోరీ

Indore Gold Theft Police | త్రినేత్ర.న్యూస్ : ప్రజల ఆస్తులకు, ప్రాణాలకు రక్షణ కల్పించాల్సిన పోలీసులే దొంగలుగా మారిన దారుణ ఘటన మధ్యప్రదేశ్‌లోని ఇండోర్‌లో వెలుగుచూసింది. వారంట్ అమలు చేసే సాకుతో.. అర్ధరాత్రి ఓ వ్యాపారి ఇంట్లోకి చొరబడి ఏకంగా 22 తులాల (సుమారు 250 గ్రాములు) బంగారాన్ని దోచుకెళ్లారు. ఈ వ్యవహారంపై బాధితుడు ఆధారాలతో సహా ఉన్నతాధికారులకు ఫిర్యాదు చేయడంతో, ఏప్రిల్ 21, 2026న ఒక సబ్ ఇన్‌స్పెక్టర్‌తో సహా ఐదుగురు పోలీసులను సస్పెండ్ చేస్తూ ఉన్నతాధికారులు ఉత్తర్వులు జారీ చేశారు.

అసలేం జరిగిందంటే?

బాధితుడు గౌరవ్ జైన్ ఫిర్యాదు ప్రకారం.. ఏప్రిల్ 1, 2026 రాత్రి లాసుడియా పోలీస్ స్టేషన్‌కు చెందిన పలువురు పోలీసులు మఫ్టీలో అతని ఇంటికి వచ్చారు. రిటైర్డ్ ఏసీపీ రాకేష్ గుప్తాతో ఉన్న ఆర్థిక లావాదేవీలు, చెక్ బౌన్స్ కేసుకు సంబంధించిన వారంట్ ఇచ్చే నెపంతో వచ్చారు. అయితే, వారు లోపలికి వెళ్లే ముందు ఇంటి బయట ఉన్న సీసీటీవీ కెమెరాల కనెక్షన్‌ను తొలగించారు. ఆ తర్వాత ఒక మాస్టర్ కీ ఉపయోగించి తలుపులు తెరిచి దొంగల్లా లోపలికి ప్రవేశించారు.

బంగారం, నగదు అపహరణ.. కిడ్నాప్ ఆరోపణలు

ఇంట్లోకి వెళ్లిన పోలీసులు సోదాల పేరుతో బీరువాలో ఉన్న 22 తులాల బంగారంతో పాటు రూ. 27,000 నగదును దొంగిలించారని వ్యాపారి గౌరవ్ జైన్ ఆరోపించారు. అంతేకాకుండా, తనను అక్రమంగా నిర్బంధించి, ప్రైవేట్ కారులో గ్వాలియర్‌కు తీసుకెళ్లి ఒక గెస్ట్ హౌస్‌లో దారుణంగా కొట్టారని ఆయన ఫిర్యాదులో పేర్కొన్నారు. అయితే, బయట సీసీటీవీ కెమెరాలు ఆఫ్ చేసినప్పటికీ.. ఇంటి లోపల ఉన్న ఇంటర్నల్ సీసీటీవీ కెమెరాల్లో పోలీసుల బాగోతం అంతా రికార్డ్ కావడంతో వారి బండారం బయటపడింది.

Also Read : TCS Nashik Harassment Case | “నా చీర కొంగు లాగారు.. తొడపై చేయి వేశారు”: టీసీఎస్‌లో మహిళా ఉద్యోగికి నరకం

వెంటనే చర్యలు చేపట్టిన ఉన్నతాధికారులు

ఈ ఘటనపై సీసీటీవీ ఫుటేజీ ఆధారాలతో సహా ఫిర్యాదు అందడంతో డిప్యూటీ కమిషనర్ ఆఫ్ పోలీస్ (జోన్ 2) కుమార్ ప్రతీక్ తక్షణ చర్యలు చేపట్టారు. ఈ దోపిడీలో పాల్గొన్న ఎస్ఐ సంజయ్ విష్ణోయ్ తో పాటు మరో నలుగురు సిబ్బంది రణవీర్ కుష్వాహా, ప్రణీత్ బదౌరియా, దినేష్ గుర్జార్, దీపేంద్ర మిశ్రాలను సస్పెండ్ చేసినట్లు ఏప్రిల్ 21న అధికారికంగా వెల్లడించారు.

దర్యాప్తు ముమ్మరం.. పోలీసుల వాదన వేరేలా

లాసుడియా పోలీస్ స్టేషన్ ఇన్‌ఛార్జ్‌పై బాధితుడు అపనమ్మకం వ్యక్తం చేయడంతో.. ఈ కేసు దర్యాప్తు బాధ్యతను విజయ్‌నగర్ ఏసీపీ పరాగ్ సైనీకి అప్పగించారు. ఈ వ్యవహారంలో లాసుడియా టౌన్ ఇన్‌స్పెక్టర్ ప్రమేయం ఏమైనా ఉందా అనే కోణంలో కూడా లోతైన విచారణ జరుపుతున్నారు.

మరోవైపు, సస్పెన్షన్‌కు గురైన ఎస్ఐ సంజయ్ విష్ణోయ్ మాత్రం ఈ ఆరోపణలను తీవ్రంగా ఖండించారు. తాము చట్టబద్ధంగానే వ్యవహరించామని, ఫిర్యాదుదారుడు కావాలనే తమపై కుట్ర పన్నాడని ఆయన వాదిస్తున్నారు. ఏది ఏమైనా అర్ధరాత్రి పోలీసులు వ్యవహరించిన తీరు ప్రస్తుతం ఇండోర్ నగరంలో తీవ్ర దుమారం రేపుతోంది.

In Indore, Madhya Pradesh, policemen in plane clothes could be seen disconnecting a CCTV outside residence of a businessman Gaurav jain. They later allegedly broke inside the house and decamped with 22 tolas of gold. Five policemen have been suspended. pic.twitter.com/o2Lpp8zqyP

— Piyush Rai (@Benarasiyaa) April 21, 2026

This is how policemen in Indore (MP) broke inside the locked apartment of a businessman and allegedly stole 22 tolas of gold. One of the cops is seen stomping on the bean bag - most likey looking for some hidden treasure. https://t.co/ZIdsvD62eR pic.twitter.com/OjgxwAMXBm

— Piyush Rai (@Benarasiyaa) April 21, 2026