Delhi Narela Firecracker Accident | ఢిల్లీలో పండగ పూట పెను విషాదం: చాతీలోకి దూసుకెళ్లిన పటాకులు.. 10 ఏళ్ల బాలుడు మృతి

Delhi Narela Firecracker Accident | త్రినేత్ర న్యూస్ : దేశ రాజధాని ఢిల్లీలో పండగ పూట హృదయ విదారక ఘటన చోటుచేసుకుంది. నరేలా ప్రాంతంలోని రాజీవ్ కాలనీలో ఆదివారం (నవంబర్ 8) రాత్రి ఇంటి ముందు సరదాగా పటాకులు కాలుస్తున్న ఓ పదేళ్ల బాలుడు ప్రమాదవశాత్తు ప్రాణాలు కోల్పోయాడు. పైకి వెళ్లాల్సిన టపాసు నేరుగా బాలుడి చాతీకి బలంగా తగలడంతో తీవ్ర గాయాలై ఆ చిన్నారి కన్నుమూశాడు.

అసలేం జరిగిందంటే..

ఢిల్లీ పోలీసులు తెలిపిన వివరాల ప్రకారం.. ఆదివారం రాత్రి సుమారు 9:45 గంటల సమయంలో బాలుడు తన ఇంటి ముందు చేతిలో పట్టుకుని చిచ్చుబుడ్డి (Anar) కాలుస్తున్నాడు. ఆ సమయంలో అది ఒక్కసారిగా పేలడంతో బాలుడి చాతీ భాగానికి తీవ్ర గాయమైంది.

రక్తపు మడుగులో పడిపోయిన చిన్నారిని కుటుంబ సభ్యులు హుటాహుటిన సమీపంలోని ఆస్పత్రికి తరలించారు. అయితే, రాత్రి 10:50 గంటల ప్రాంతంలో బాలుడు అప్పటికే మృతి చెందినట్లు (Brought dead) ఆస్పత్రి వర్గాలు పోలీసులకు సమాచారం అందించాయి.

"నా బిడ్డకు న్యాయం కావాలి" - కన్నీరుమున్నీరవుతున్న తల్లి

పండగ రోజు కళ్ల ముందే కన్నబిడ్డ విగతజీవిగా మారడంతో తల్లిదండ్రులు కన్నీరుమున్నీరవుతున్నారు. ఈ ఘటనపై మృతుడి తల్లి అంజలి మాట్లాడుతూ.. "అందరిలాగే నా కొడుకు కూడా ఇంటి ముందు పటాకులు కాలుస్తున్నాడు. వాడు చిచ్చుబుడ్డి, స్కై షాట్స్ (Sky shots) కాలుస్తుండగా వెనుక నుంచి ఒక టపాసు వేగంగా వచ్చి వాడి చాతీకి తగిలింది. అది నేరుగా రక్తనాళాలకు (Arteries) తగలడంతో తీవ్ర రక్తస్రావమైంది" అని ఆవేదన వ్యక్తం చేశారు.

"మేము ఆస్పత్రికి తీసుకెళ్లేటప్పటికి నా బిడ్డ ఇంకా ఊపిరితోనే ఉన్నాడు. కానీ అక్కడి డాక్టర్లు వాడికి సరిగ్గా ట్రీట్‌మెంట్ చేయలేదు. పైగా మమ్మల్నే భయపెట్టి, బెదిరించే ప్రయత్నం చేశారు. నా బిడ్డ మృతికి కారణమైన వారిపై చర్యలు తీసుకుని నాకు న్యాయం చేయాలి" అని ఆమె కన్నీటిపర్యంతమయ్యారు.

పోస్ట్‌మార్టంకు మృతదేహం.. పోలీసుల దర్యాప్తు

ప్రస్తుతం బాలుడి మృతదేహాన్ని పోస్ట్‌మార్టం (Post-mortem) నిమిత్తం మార్చురీకి తరలించారు. చేతిలో పట్టుకున్న చిచ్చుబుడ్డి పేలడం వల్లే ఈ ప్రమాదం జరిగిందని పోలీసులు ప్రాథమికంగా చెబుతుండగా, వెనుక నుంచి స్కై షాట్ లేదా రాకెట్ తగిలిందని కుటుంబ సభ్యులు చెబుతున్నారు. ఈ ఘటనపై కేసు నమోదు చేసుకున్న నరేలా పోలీసులు తదుపరి దర్యాప్తు కొనసాగిస్తున్నారు. చిన్నారులు పటాకులు కాల్చే సమయంలో తల్లిదండ్రులు అత్యంత అప్రమత్తంగా ఉండాలని ఈ విషాద ఘటన మరోసారి హెచ్చరిస్తోంది.

#WATCH | Delhi: On her son's death, Anjali, the mother of the deceased child, says, "My son was bursting crackers; everyone was doing so. While he was bursting anar and sky shots, one hit him from behind, striking his chest. It struck his arteries; he was still breathing, so we rushed him to the hospital. They did not treat him well; in fact, they tried to scare and threaten us. I want justice..."

— ANI (@ANI) November 9, 2026