Personal Finance | 20 ఏళ్ల వ‌య‌స్సులో చేసే ఈ 5 ఆర్థిక తప్పుల‌తో.. భవిష్యత్తులో లక్షల నష్టం..

Personal Finance | 20 ఏళ్ల వయసులో సంపాదించడం ప్రారంభించిన యువత ఆర్థిక స్వేచ్ఛను ఆస్వాదిస్తూ ఖర్చులు పెంచుకుంటున్నారు. అయితే పెట్టుబడులను ఆలస్యం చేయడం, క్రెడిట్ కార్డు అప్పులు, బీమాను నిర్లక్ష్యం చేయడం, ఆదాయం పెరిగిన కొద్దీ ఖర్చులు పెంచుకోవడం, అత్యవసర నిధిని ఏర్పాటు చేసుకోకపోవడం వంటి ఐదు తప్పులు భవిష్యత్తులో లక్షల రూపాయల ఆర్థిక భారానికి కారణమవుతాయని ఆర్థిక నిపుణులు హెచ్చరిస్తున్నారు.

పెట్టుబ‌డుల‌ను ఆలస్యం చేయొద్దు..

ఉద్యోగం ద్వారా స్థిరమైన ఆదాయం వస్తున్నంత మాత్రాన ఆర్థిక భద్రత ఉన్నట్లు కాదని ఆర్థిక నిపుణులు సూచిస్తున్నారు. ఉద్యోగం కోల్పోవడం, వైద్య అత్యవసర పరిస్థితులు, అనుకోని ఖర్చులు ఎప్పుడైనా ఎదుర‌వుతాయి. ముఖ్యంగా 20 ఏళ్ల వయసులో సంపాదన ప్రారంభించిన యువత సొంత ఆదాయంతో ఖరీదైన స్మార్ట్‌ఫోన్లు కొనడం, తరచూ పర్యటనలకు వెళ్లడం, రెస్టారెంట్లలో భోజనం చేయడం, షాపింగ్‌కు అధికంగా ఖర్చు చేయడం వంటి అలవాట్లకు ప్రాధాన్యత ఇస్తున్నారు. అయితే ఈ ఖర్చులు క్రమంగా పొదుపును తగ్గించి భవిష్యత్తు ఆర్థిక లక్ష్యాలను దెబ్బతీస్తాయి. ముఖ్యంగా పెట్టుబడులను ఆలస్యం చేయడం వల్ల కాంపౌండింగ్ ప్రయోజనాన్ని కోల్పోతారు. ఉదాహరణకు 25 ఏళ్ల వయసులో నెలకు రూ.5వేల చొప్పున పెట్టుబడి పెట్టడం ప్రారంభించి, ఏటా 12 శాతం రాబడి వస్తుందని భావిస్తే 30 ఏళ్లలో గణనీయమైన సంపద సృష్టించుకోవచ్చు. అదే పెట్టుబడిని ఐదేళ్లు ఆలస్యంగా ప్రారంభిస్తే, నెలవారీ పెట్టుబడి మొత్తం ఒకటే అయినప్పటికీ చివరకు సమకూరే నిధి గణనీయంగా తగ్గుతుంది.

క్రెడిట్ కార్డుల‌తో అప్పుల ఊబిలోకి..

మరో ముఖ్యమైన తప్పు క్రెడిట్ కార్డు అప్పుల ఊబిలో చిక్కుకోవడం. ఆకర్షణీయమైన ఆఫర్లు, రివార్డుల కారణంగా యువత తమ ఆదాయానికి మించి ఖర్చు చేస్తున్నారు. క్రెడిట్ కార్డు బిల్లులను పూర్తిగా చెల్లించకుండా కనీస మొత్తం మాత్రమే చెల్లించడం వల్ల మిగిలిన బకాయిపై అధిక వడ్డీ పేరుకుపోతుంది. అదేవిధంగా ఆరోగ్య బీమా, టర్మ్ లైఫ్ ఇన్సూరెన్స్ తీసుకోవడాన్ని వాయిదా వేయకూడదు. చిన్న వయసులో ఆరోగ్య బీమా తీసుకుంటే తక్కువ ప్రీమియంతో ప్రయోజనం పొందే అవకాశం ఉంటుంది. తల్లిదండ్రులు, జీవిత భాగస్వామి లేదా పిల్లలపై ఆర్థిక బాధ్యత ఉన్నవారు టర్మ్ ఇన్సూరెన్స్ అవసరాన్ని కూడా పరిశీలించాలి. ఇక జీతం పెరిగిన ప్రతిసారీ ఖరీదైన గాడ్జెట్లు, మెరుగైన నివాసం, తరచూ విహారయాత్రలు వంటి ఖర్చులు పెంచుకోవడం వల్ల అదనపు ఆదాయం మొత్తం ఖర్చులకే సరిపోతుంది. పెరిగిన జీతంలో కొంత మొత్తాన్ని పెట్టుబడులు, పొదుపు, అత్యవసర నిధులకు కేటాయించడం ఉత్తమం.

ప్ర‌త్యేక నిధిని ఏర్పాటు చేసుకోవాలి..

అలాగే అత్యవసర పరిస్థితులను ఎదుర్కొనేందుకు ప్రత్యేక నిధిని ఏర్పాటు చేసుకోవడం చాలా ముఖ్యం. ఉద్యోగం కోల్పోవడం, అనుకోని ఆసుపత్రి ఖర్చులు, ఇంటి అవసరాల కోసం అకస్మాత్తుగా డబ్బు అవసరమైతే పొదుపు లేకపోవడం వల్ల క్రెడిట్ కార్డులు లేదా వ్యక్తిగత రుణాలపై ఆధారపడాల్సి వస్తుంది. ఆర్థిక ప్రణాళిక నిపుణుల సూచన ప్రకారం కనీసం మూడు నుంచి ఆరు నెలల అవసరమైన ఖర్చులకు సరిపడా మొత్తాన్ని అత్యవసర నిధిగా ఉంచుకోవాలి. అవసరమైనప్పుడు వెంటనే తీసుకునే వీలుండే ద్రవ రూపంలో ఈ నిధిని అందుబాటులో ఉంచుకోవాలి. 20 ఏళ్ల వయసులోనే సరైన ఖర్చుల నియంత్రణ, క్రమబద్ధమైన పెట్టుబడులు, బీమా రక్షణ, అత్యవసర పొదుపు అలవాట్లు ఏర్పరచుకుంటే భవిష్యత్తులో ఆర్థిక ఇబ్బందులను గణనీయంగా తగ్గించుకోవచ్చు.