T20 World Cup 2026 | టీ20 వ‌రల్డ్ క‌ప్‌కు జ‌ట్టును ప్ర‌క‌టించిన స్కాట్లండ్‌.. 15 మంది ఎంపిక‌..

T20 World Cup 2026 | టీ20 ప్రపంచకప్ 2026లో చివరి నిమిషంలో చోటు దక్కించుకున్న స్కాట్లండ్ తమ 15 మంది సభ్యుల జట్టును అధికారికంగా ప్రకటించింది. ఐసీసీ శనివారం (జనవరి 24) బంగ్లాదేశ్‌ను టోర్నీ నుంచి తప్పిస్తూ నిర్ణయం తీసుకున్న నేపథ్యంలో, స్కాట్లండ్‌కు ఈ అవకాశం లభించింది. భారత్‌లో మ్యాచ్‌లు ఆడేందుకు నిరాకరిస్తూ చేసిన‌ బంగ్లాదేశ్ అభ్యర్థనను ఐసీసీ తిరస్కరించడంతో ఆ జ‌ట్టు టోర్నీ నుంచి వైదొలగింది. ఇక స్కాట్లండ్ జట్టు విషయానికి వస్తే, రిచీ బెర్రింగ్టన్ మరోసారి నాయకత్వం వహించనున్నాడు. 2024 టీ20 ప్రపంచకప్‌లో ఆడిన జట్టులోని 11 మందిని ఈసారి కూడా కొనసాగించడం విశేషం. న్యూజిలాండ్ తరఫున 17 టీ20 అంతర్జాతీయ మ్యాచ్‌లు ఆడిన టామ్ బ్రూస్, గత ఏడాది స్కాట్లండ్ లో చేరాడు. ఆగస్టులో వన్డే అరంగేట్రం చేసిన అతడు, ఈ ప్రపంచకప్‌తో స్కాట్లండ్ తరఫున తొలి టీ20 ప్రపంచకప్ ఆడనున్నాడు.

వేగంగా ఏర్పాట్లు..

అలాగే ఆఫ్గ‌నిస్థాన్‌లో జన్మించిన జైనుల్లా ఇహ్సాన్, ఫిన్లే మెక్రీథ్, ఒలివర్ డేవిడ్‌సన్ ఈ టోర్నీలో తొలిసారి స్కాట్లండ్ తరఫున బరిలోకి దిగనున్నారు. ఈ పరిణామాలపై స్పందించిన హెడ్ కోచ్ డాకిన్స్ మాట్లాడుతూ, గత 48 గంటలు క్రికెట్ స్కాట్లండ్‌కు చాలా ఉత్కంఠభరితంగా గడిచాయి. స్టీవ్, ట్రుడీ లిండ్‌బ్లేడ్ సహా సంస్థలోని ప్రతి ఒక్కరూ ఆటగాళ్లు, సహాయక సిబ్బందికి సంబంధించిన ఏర్పాట్లన్నీ వేగంగా పూర్తిచేయడంలో నిమగ్నమయ్యారు, అని తెలిపారు. కాగా, చివరి నిమిషంలో ఎంపిక కావడంతో వీసా సమస్యలు తలెత్తవచ్చన్న ఆందోళనలపై క్రికెట్ స్కాట్లండ్ స్పందించింది. ఐసీసీ నుంచి తమకు పూర్తి సహకారం లభిస్తోందని, వీసాల విషయంలో ఎలాంటి ఇబ్బందులు ఉండవని హామీ ఇచ్చారని సంస్థ తెలిపింది. షెడ్యూల్ ప్రకారం స్కాట్లండ్ ఫిబ్రవరి 7న కోల్‌కతాలో వెస్టిండీస్‌తో ప్రారంభ మ్యాచ్ ఆడనుంది. అంతకుముందు ఫిబ్రవరి 2న ఆఫ్గ‌నిస్థాన్‌తో, ఫిబ్రవరి 4న నమీబియాతో బెంగళూరులో వార్మప్ మ్యాచ్‌లు ఆడనుంది.

పాక్ మూలాలు ఉన్న ఆట‌గాళ్ల విష‌యంలో..

అయితే సఫ్యాన్ షరీఫ్ విషయంలో కొంత ఆలస్యం జరిగే అవకాశముందని అధికారులు భావిస్తున్నారు. హడర్స్‌ఫీల్డ్‌లో జన్మించిన అతడికి పాకిస్థానీ తండ్రి, బ్రిటిష్-పాకిస్థానీ తల్లి ఉన్నారు. భారత్-పాకిస్థాన్ మధ్య రాజకీయ, దౌత్య సంబంధాలు ఉద్రిక్తంగా ఉండటంతో, పాకిస్థాన్ మూలాలున్నవారికి భారత వీసాల మంజూరులో గత కొన్నేళ్లుగా జాప్యం జరుగుతోందని గుర్తు చేస్తున్నారు. ఈ అంశంపై క్రికెట్ స్కాట్లండ్ సీఈఓ ట్రుడీ లిండ్‌బ్లేడ్ మాట్లాడుతూ, ఐసీసీ తమ పరిధిలో ఉన్న విషయాలపై పూర్తి హామీ ఇచ్చింది. మా జట్టుతో పాటు ప్రపంచకప్‌లో పాల్గొనే మరో 19 జట్లకు సంబంధించిన వ్యవహారాలను కూడా చూసే ప్రత్యేక బృందం పని చేస్తోంది. ప్రస్తుతం వారి ప్రధాన దృష్టి మాపైనే ఉంది, అని తెలిపారు.

టీ20 వ‌ర‌ల్డ్ క‌ప్ 2026కు స్కాట్లండ్ జ‌ట్టు ఇదే..

రిచీ బెర్రింగ్టన్ (కెప్టెన్), టామ్ బ్రూస్, మాథ్యూ క్రాస్, బ్రాడ్ కర్రీ, ఒలివర్ డేవిడ్‌సన్, క్రిస్ గ్రీవ్స్, జైనుల్లా ఇహ్సాన్, మైకేల్ జోన్స్, మైకేల్ లీక్, ఫిన్లే మెక్రీథ్, బ్రాండన్ మెక్‌మల్లెన్, జార్జ్ మున్సీ, సఫ్యాన్ షరీఫ్, మార్క్ వాట్, బ్రాడ్ వీల్. కాగా ఈ జ‌ట్టుకు ట్రావెలింగ్ రిజర్వులుగా జాస్పర్ డేవిడ్‌సన్, జాక్ జార్విస్ ల‌ను, నాన్-ట్రావెలింగ్ రిజర్వులుగా మెకెంజీ జోన్స్, క్రిస్ మెక్‌బ్రైడ్, చార్లీ టియర్ ల‌ను ప్ర‌క‌టించారు.