Zepto | జెప్టో ఐపీవో వ‌చ్చేస్తోంది.. జూన్ ప్ర‌థమార్థంలో లిస్టింగ్‌..?

Zepto | భారత్‌లో వేగంగా ఎదుగుతున్న క్విక్ కామర్స్ సంస్థ జెప్టో (Zepto) తన తొలి పబ్లిక్ ఆఫర్ (ఐపీఓ) కోసం కీలక అడుగులు వేస్తోంది. మార్కెట్ వర్గాల సమాచారం ప్రకారం కంపెనీ జూన్ ప్ర‌థ‌మార్థంలో ఐపీఓ పత్రాలను బహిరంగంగా దాఖలు చేయడానికి సిద్ధమవుతోంది. ఈ ఐపీఓ ద్వారా గరిష్ఠంగా 1 బిలియన్ డాలర్ల వరకు నిధులు సమీకరించే అవకాశముంది. 10 నిమిషాల డెలివరీ సేవలతో గుర్తింపు పొందిన జెప్టో, వచ్చే నెలలో ఇన్వెస్టర్ రోడ్‌షోలను ప్రారంభించే అవకాశం ఉంది. మార్కెట్ పరిస్థితులు అనుకూలంగా ఉంటే జూలైలోనే ఐపీఓను ప్రారంభించాలని సంస్థ లక్ష్యంగా పెట్టుకున్నట్లు తెలుస్తోంది. ఈ ఐపీఓలో కొత్త షేర్ల జారీతోపాటు ప్రస్తుత పెట్టుబడిదారులు తమ వాటాల్లో కొంత భాగాన్ని విక్రయించే సెకండరీ షేర్ సేల్ కూడా ఉండనుంది. సమీకరించే నిధులను వ్యాపార విస్తరణ, కొత్త మార్కెట్లలో ప్రవేశం, కార్యకలాపాల బలోపేతానికి వినియోగించే అవకాశం ఉంది. అయితే ఐపీఓ పరిమాణం, సమయం వంటి అంశాలపై ఇంకా అంతర్గత చర్చలు కొనసాగుతున్నాయని సమాచారం.

1 బిలియన్ డాల‌ర్ల‌కు పైగా స‌మీక‌ర‌ణ‌..

జెప్టో ఐపీఓ విజయవంతమైతే, 2026లో భారత్‌లో 1 బిలియన్ డాలర్లకు పైగా నిధులు సమీకరించే రెండో అతిపెద్ద ఐపీఓగా నిలవనుంది. ఇప్పటికే ఎస్‌బీఐ ఫండ్స్ మేనేజ్‌మెంట్ భారీ షేర్ విక్రయానికి సిద్ధమవుతోంది. ఇటీవలి కాలంలో ఇరాన్ యుద్ధ ప్రభావంతో గ్లోబల్ ఆర్థిక అనిశ్చితి పెరగడంతో భారత ఐపీఓ మార్కెట్ వేగం తగ్గింది. 2026లో ఇప్పటివరకు దేశీయ కంపెనీలు ఐపీఓల ద్వారా సుమారు 3.5 బిలియన్ డాలర్లు మాత్రమే సమీకరించాయి. ఇది గత రెండేళ్ల రికార్డు స్థాయిలతో పోలిస్తే చాలా తక్కువ. జెప్టో తన చివరి ఫండింగ్ రౌండ్‌లో 2025 అక్టోబర్‌లో 450 మిలియన్ డాలర్ల‌ను సమీకరించి 7 బిలియన్ డాలర్ల విలువను సాధించింది. భారత క్విక్ కామర్స్ మార్కెట్లో కంపెనీకి అమెజాన్‌, స్విగ్గీ, జొమాటో, బిగ్ బాస్కెట్ వంటి దిగ్గజ సంస్థల నుంచి గట్టి పోటీ ఎదురవుతోంది.

21 రోజుల పాటు అందుబాటులో ఉంచాలి..

ఈ ఐపీఓ నిర్వహణ కోసం యాక్సిస్ క్యాపిట‌ల్‌, మోతీలాల్ ఓస్వాల్ ఇన్వెస్ట్‌మెంట్ అడ్వ‌యిజర్స్‌, మోర్గాన్ స్టాన్లీ, హెచ్ఎస్‌బీసీ, గోల్డ్‌మ‌న్ శాక్స్ సంస్థలతో జెప్టో కలిసి పనిచేస్తోంది. కంపెనీ గత డిసెంబర్ చివర్లో గోప్యంగా డ్రాఫ్ట్ ఐపీఓ పత్రాలను దాఖలు చేయగా, మే 10న నియంత్రణ సంస్థ నుంచి పరిశీలన అందుకుంది. భార‌త్‌లోని నిబంధనల ప్రకారం ఐపీఓ ప్రారంభానికి ముందు కనీసం 21 రోజుల పాటు ప్రాస్పెక్టస్‌ను బహిరంగంగా అందుబాటులో ఉంచాల్సి ఉంటుంది.