Union Budget 2026 | ఫిబ్రవరి 1 లేక 2.. కేంద్ర బడ్జెట్ ఎప్పుడు? ఎందుకు ఈ గందరగోళం?

Union Budget 2026 | సాధారణంగా 2017 నుండి కేంద్ర బడ్జెట్‌ను ప్రతి సంవత్సరం ఫిబ్రవరి 1వ తేదీన ప్రవేశపెడుతున్నారు. అయితే, 2026 ఫిబ్రవరి 1వ తేదీ ఆదివారం (Sunday) రావడం వల్ల ఈసారి బడ్జెట్‌ను అదే రోజున ప్రవేశపెడతారా లేక మరుసటి రోజు అంటే ఫిబ్రవరి 2 (సోమవారం)కి మారుస్తారా అనే దానిపై చర్చ మొదలైంది.

పదేళ్లుగా వస్తున్న ఆనవాయితీ

కేంద్ర బడ్జెట్‌ను ఫిబ్రవరి 1నే ప్రవేశపెట్టాలనేది గత పదేళ్లుగా వస్తున్న ఆనవాయితీ. కానీ ఆదివారం సెలవు దినం కావడంతో గందరగోళం నెలకొంది.

నిర్ణయం ఎవరిది?

కేంద్ర బడ్జెట్ 1నా లేక 2నా అనే దానిపై తుది నిర్ణయం 'పార్లమెంటరీ వ్యవహారాల కేబినేట్ కమిటీ' (Cabinet Committee on Parliamentary Affairs) తీసుకుంటుందని కేంద్ర మంత్రి కిరణ్ రిజిజు స్పష్టం చేశారు.

గతంలో సెలవు దినాల్లో బడ్జెట్

2025లో బడ్జెట్‌ను శనివారం (ఫిబ్రవరి 1, 2025) ప్రవేశపెట్టారు. అలాగే గతంలో అరుణ్ జైట్లీ ఆర్థిక మంత్రిగా ఉన్నప్పుడు 2015 బడ్జెట్‌ని ఫిబ్రవరి 28, 2015న (శనివారం), 2016 బడ్జెట్‌ని ఫిబ్రవరి 28, 2016న (ఆదివారం) ప్రవేశపెట్టిన సందర్భాలు ఉన్నాయి. కాబట్టి ఆదివారం బడ్జెట్ ప్రవేశపెట్టడం కొత్తేమీ కాదు.

పాత పద్ధతి

2017కి ముందు బడ్జెట్‌ను ఫిబ్రవరి చివరి రోజున ప్రవేశపెట్టేవారు. కానీ కొత్త ఆర్థిక సంవత్సరం (ఏప్రిల్ 1) లోపు చర్చలు పూర్తి కావాలనే ఉద్దేశంతో దీనిని ఫిబ్రవరి 1కి మార్చారు.

ఈసారి ఫిబ్రవరి 1న ఆదివారం వస్తుండటంతో పార్లమెంట్ వ్యవహారాల కేబినేట్ కమిటీ నిర్ణయం తర్వాత బడ్జెట్ ప్రవేశపెట్టే తేదీని కేంద్రం ప్రకటించనున్నట్లు తెలుస్తోంది.